Charter Document - 03400352

Universis sancte matris ecclesie filiis ad quos presens scriptum pervenerit Robertus miseracione divina Sarresbur ecclesie minister humilis salutem in domino eternam Cum ad omnes solicitudini nostre commissos ex suscepto officio bonum operari teneamur et specialius quodam modo ad eorum proveccionem et tranquillitatem nos teneri credimus qui ex occulto dei iudicio continuis cruciatibus affliguntur et quos artioris vite propositum et religio inmaculata deo efficit acceptos et in facie omnium commendat laudabiles Nos itaque attendentes et diligenter perpendentes honestatem conversacionem sororum leprosarum ancillarumque Cristi de Maydenebradeligh et fratrum sanorum ibidem deo serviencium et curam earum gerencium ad predictam domum causa visitacionis et correccionis personaliter accedentes ut ibidem episcopali auctoritate plantaremus que essent plantanda et exstirparemus que nobis viderentur exstirpanda et etiam ibidem fructum faceremus et inperpetuum fructus noster maneret inspectis primo privilegiis et cartis prememorate domus et facta deinde diligenti inquisicione super statutis tam spiritualium quam temporalium corrigendorum communicato discretorum virorum consilio nec non et interveniente insuper communi consensu dominarum leprosarum prioris et fratrum eiusdem loci ad informacionem dicte domus auctoritate episcopali statuta que sequuntur ut formam inperpetuum habeant honestius vivendi tam sororibus quam fratribus et conversis ibidem degentibus iniunximus inperpetuum observare incipientes a dominabus leprosis quia ut in privilegiis domus et cartis manifeste patet bona ex fidelium devocione primo collata sunt et intuitu earum domus primo et principaliter est fundata Quoniam igitur facultates predicti loci paciuntur quod ibidem degentes possint vivere de communi statuimus quod heedem sorores factam professionem secundum regulam beati Augustini precipue in articulis substancialibus regule supradicte cuius substancia in tribus articulis maxime continetur scilicet ut proprio renuncient continencie votum emittant et priori suo devotam et fidelem obedienciam promittant et faciant et in capella sua in debita forma profiteantur que talis est Ego soror N offerens trado me ipsam divine pietati in ecclesia beate Marie et beati Mathei apostoli de Maydenebradeligh servaturam et promitto obedienciam domino N priori prefate ecclesie et successoribus suis quos sanior pars congregacionis sororum et fratrum canonice elegerint Promitto etiam vivere sine proprietate et in castitate In nomine patris et filii et spiritus sancti Dicta vero professione facta prior domus qui pro tempore fuerit missam celebret prout decet in altari capelle memorate Post hec autem iniungat idem prior priorisse quatinus subditam sibi sororem religiose et devote ac ordinate per se vel per aliam idoneam sororem instruat Regulam beati Augustini totam semel in anno audiant et articuli qui poterunt ab infirmis observari observentur ad articulos autem qui propter infirmitatem et sexus fragilitatem importabiles sunt nequaquam astringantur Habitu religioso utantur et regulari et talia sint earum vestimenta velum album mantellus de russeto tunica alba vel nigra vel de roseto pellicia agnina vel edina sive catina Ista predicta habeant de domo una cum liberacione linee tele et sotularibus cum reparacione earundem quando necesse fuerit prout antiquitus recipere consueverunt Qualia autem vestimenta attulerunt talia si ordinata sint dum duraverint habeant Anulos autem et firma cula ficalia aurea vel argentea eis omnino interdicimus nisi prioris sui habeant licenciam Numquam autem de domo sua vel clauso sine prioris sui licencia exeat aliqua soror nec iocalia vel alia donet vel accipiat exceptis rebus minutis que ad licenciam priorisse pertinent Statuimus etiam quod nulle mulieres leprose in sorores apud Maydenebradeligh nisi de communi consensu prioris sororum et fratrum recipiantur Districte etiam prohibemus ut nulla admittatur nisi prius libera fuerit et absoluta a qualibet obligacione fidei et debito et si maritata fuerit maritus eius ad religionem se transferat antequam admittatur Simoniacum earum ingressum detestantes precipimus ut leprose mulieres gratis et sine exaccione pecunie vel pacto admittantur Si autem aliqua secum deferant que gratis conferre voluerint in utilitatem domus recepta [con]vertantur Crescat autem numerus leprosarum secundum facultates domus per ipsas crescentes ita tamen quod semper ad minus de sororibus leprosis plenus habeatur conventus Circa sanas mulieres hoc [] eiusdem domus sustentari Habitum regularem suscipiant et sub regula pretaxata honeste et regulariter vivant et sine omni exactione et illicita pactione recip[] admittantur et hoc ad servicium dominarum leprosorum vel propter evidentem domus utilitatem et inter predictas sorores infirmas maneant et sibi serviant prout decet et opus fuerit Et dictarum sororum sanarum numerus ultra tres vel quatuor ad plus non excedat Sint probati testimonii et honeste conversacionis et nullis nexibus astricte Precipimus etiam quod nulla soror infirma vel sana de novo in sororem admissa antequam a conventu sororum fuerit de conversacione sua competenter probata et de moribus suis secundum consuetudinem predicte domus satis examinata velum in predicta domo portare presumat Statuimus etiam ut omnes predicte sorores simul comedant simul dormiant et horis canonicis intersint ille que interesse possint nisi gravi infirmitate vel aliqua rationabili causa impediantur Et si ad horas prout decet non venerint a priorissa earum primo et secundo et tercio corripiantur Si autem venire potuerint et noluerint vel neglexerint et hoc sepius eis contingat in capitulo coram priore vel qui loco eius fuerit culpam suam recognoscant et satisfactio congrua eis iniungatur et penitenciam condignam agant secundum quod magister ordinis eis iniunxerit Superfluas confabulaciones et frequentes collocuciones cum omnimodis personis susceptis devitent Comessationes et potaciones cum secularibus et viris religiosis eis omnino interdicimus nisi licenciam a priore suo habeant specialem Nullam habeant infirme nec sane sorores sequelam puerorum vel secularium mulierum nisi de licencia prioris et de voluntate sororum leprosorum Viri seculares vel religiosi non ingrediantur domum predictarum mulierum nec cum eis loquantur nisi ex prioris vel sui substituti licencia vel ex rationabili et certa causa et alicuius sororis testimonio Masculus vero leprosus nullo modo cum predictis sororibus admittatur Preterea ne sanguis earum in die districti iudicii de manibus prelatorum suorum requiratur precipimus districte ut prior qui eis preest sacerdotes habeat in regulari habitu existentes de salute animarum suarum diligentes quibus quinquies in anno confiteantur scilicet semel in inicio quadragesime et iterum in fine cum debent communicare et in adventu domini et contra Pentecosten et contra festum Assumpcionis beate Marie Quando ipse prior in propria persona non poterit ipsi quibus iniunxerit predictarum sororum et fratrum audiant confessiones ita tamen quod omnes fratres et sorores predicte domus semel in anno ad minus predicto priori vel quibus iniunxerit plenaria confiteantur et quod omnes fratres et sorores gravi infirmitate detenti semel in quindena eucharistiam devote percipiant Illud autem omnino iustum videtur ut bona que ex fidelium devocione dominabus leprosis principaliter sunt collata usibus earum potissima et meliora secundum facultates domus deputentur statuimus etiam ut de meliori pane et servicia eis ministretur iuxta pondus antiquum et mensuram antiquam et de alimentis et liberacionibus sibi debit[is] provideatur secundum quod hactenus sibi provideri consuevit De reliquiis autem cibariorum predictarum sororum disponatur aliqua soror quam prior substituerit sub dei timore prout viderit melius expedire et per illam exhibeantur predicte reliquie elemosinario qui a predicto priore ad hoc fuerit deputatus Si autem circa reliquiarum distribucionem fraudem fecisse convincantur a priore domus regulariter puniantur Si que autem matrone honeste et omni suspicione carentes voluerint ibi de proprio vivere et separatas habere mansiones poterunt admitti de unanimi consensu prioris et dominarum leprosorum et fratrum si viderint utilitati et honestati domus sue expedire [] Ut autem confirmacionis nostre ordinacio et predictorum statutorum correccio perpetue firmitatis robur optineant eam presentis scripti munimine et sigilli nostri apposicione duximus roborandam Datum apud Maydenebradelighe xiiii kalendas Novembris anno domini millesimo ducentesimo septuagesimo quarto anno pontificatus nostri primo