Charter Document - 03409352

Nunc autem ad viros religiosos et personas regulares transeundum est qui de communi electione et concordi provisione dominarum leprosorum et fratrum secundum privilegia domus et antiquas consuetudines in spiritualibus et temporalibus illis debent providere quorum qui superior est et per unanimem voluntatem dominarum leprosorum et fratrum electus prioris nomen inter eos accepit alii vero sacerdotes et confratres nominantur Circa hoc statuimus ut quanto arcius divinis officiis se manciparunt tanto ab inquinamentis huius mundi se studiosius abdicare teneantur Sub regula beati Augustini vivant et proprio renuntient continencie votum emittant et priori suo devotam et fidelem obedienciam promittant et teneant et professionem secundum regulam beati Augustini prout superius de sororibus dictum est in maiori ecclesia faciant Regulari habitu utantur secundum quod inferius plenius continetur non obstante constitucione bone memorie Herberti Sarr episcopi que fuit quod omnes fratres albis mantellis et nigro signo et in capis chori albo signo uterentur Prior vero et sacerdotes sui pro negociis domus sue exeuntes capis nigris sine signo prout ad regulam beati Augustini pertinet utantur In ecclesia vero in predicta domo de Bradeligh et extra cum necesse fuerit a festo sancti Michaelis usque ad vigiliam Pasche superpelliciis vel rochetis seu albis tunicis et capis nigris sine signo et a predicta vigilia Pasche usque ad predictum festum sancti Michaelis superpelliciis et albis capuciis utantur Omnes vero fratres tam clerici quam laici in scapulariis suis predicto signo utantur Statuimus etiam quod nullus frater solus vel cum sociis portas predicte domus egrediatur sine prioris vel eius substituti licencia nisi tamen obedienciarii et tunc demum cum ad utilitatem domus et officii sibi iniuncti necessitatem vertatur set post divinum officium completum in tempore vacacionis morentur in ecclesia seu claustro vel alio loco honesto studendo legendo vel scribendo seu ecclesiastica servicia prout decet repetendo vel alicui labori honesto infra clausam domus et in suis obedienciis insistendo et quod intrantes de cetero religionem predictam in tempore vacacionis stent in claustro et redd[a]nt magistro ordinis ad minus psalterium ympnarium servicium mortuorum una cum communi servicio sanctorum Statuimus etiam quod fratres minores in ordine diaconatus et infra existentes successive per septimanas in suo ordine serviant ad magnam missam legant in refectorio per se vel per alium vel clericum secularem cum ipsi circa hoc vacare non potuerint secundum modum religionis dum sunt in mensa Et ibidem silencium habeatur et in choro et dormitorio Et si oporteat predictos fratres in predictis locis quia signis non utantur aliqua verba proferre sint submissa voce prolata Statuimus etiam quod nullus decetero in refectorio prioris et fratrum dum sunt in mensa admittatur nisi sit religiosa persona vel honesta cui sit propter honestatem persone deferendum set cum priore in camera sua vel cum hostiario in aula hospitum comedant hospites et bibant ac secundum hostilarii disposicionem et statum domus et personarum honorifice recipiantur Numerus vero fratrum clericorum sub ordinacione et disposicione illa subsistat quem dominus Henricus Saresbur episcopus constituit et scripto confirmavit nisi aliquis fidelis per suas terras facultates vel redditus pro salute anime sue eorum numerum de novo voluerit augere Statuimus etiam ut horas suas ordinate et horis suis competentibus predicti fratres aperte et distincte ac devote dicant secundum usum Sarr una cum suffragiis ad ordinem suum pertinentibus et hucusque ab eisdem usitatis Fratres et clerici qui sub obtentu religionis in predicta domo sunt admissi et infra valvas predicti loci continuo commorantur ad horas canonicas venire non differant nisi aliqua infirmitate vel rationabili causa impediantur Et si venire per suam negligenciam obmiserint condigna satisfactio eis iniungatur quod si in consuetudinem duxerint secundum disposicionem prioris et magistri ordinis gravius puniantur Singulares commessaciones et potaciones extra refectorium et cubicula extra dormitorio sine prioris vel sui substituti licencia fieri districte inhibemus Statuimus etiam districte precipientes quod clerici et laici qui in predicta domo sub obtentu religionis vel alio modo sunt admissi ut in predictis locis scilicet in choro et refectorio et dormitorio [et] claustro honeste et ordinate et sine strepitu se gerant ita quod per eos predictis religiosis non possit aliquod scandalum oriri vel gravamen nec silencium infringi et si contra hoc venire presumpserint regulariter puniantur Litem in capitulo rumorem in claustro tumultum in refectorio clamorem in dormitorio ingressum mulierum per loca suspecta et ludos illicitos ut alearum et talorum et ceterorum huiusmodi ludorum fieri districte prohibemus Item fratres eiusdem domus in villa de Bradeligh preter priorem vel qui loco eius in sua absencia remanserit neque comedant neque bibant absque prioris sui licencia nec prior in villa nisi propter honestam personam vel domus sue utilitatem Statuimus etiam quod prior in refectorio cum fratribus suis quam sepius commode poterit commedat et bibat et ad eorum informacionem presenciam suam ibidem eis et in ecclesia et in dormitorio prout decet exhibeat nisi per hospites vel per aliam necessitatem vel debilitatem seu domus sue utilitatem inpediatur