Charter Document - 07212022
| Charter Number: | 07212022 |
|---|---|
| Cartulary Title: | Registrum Episcopatus Aberdonensis |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1250 |
| Date type: | Internal, Calendar, Papal |
| Resource Link(s): |
Reference Document for this Embedded Document People of Medieval Scotland |
Charter:
Innocentius episcopus seruus seruorum Dei dilectis filiis Cancellario Morauiensi Thesaurario et magistro Johanni de Euerley canonico Dunkeldensi salutem et apostolicam benedictionem Presentata nobis dilectorum filiorum de Kelsouch de Abbirbrothoc et de Londoris abbatum sancti Andree dioecesis sancti Benedicti ac Prioris cathedralis ecclesie sancti Andree sancti Augustini ordinum conuentuumque suorum petitio continebat quod cum bone memorie Abberdonenses episcopi capituli sui accedente consensu quasdam ecclesias Abberdonensis dioecesis in quibus abbates prior et conuentus earundem ius obtinent patronatus in proprios vsus eorum sibi duxerint concedendas et quod per eosdem episcopos taliter factum extitit in hac parte per apostolicam sedem fuerat postmodum confirmatum Venerabilis frater noster Abberdonensis episcopus illorum successor pro sua nobis suggerens voluntate quod nonnulli abbates priores alijque prelati tam religiosi quam seculares in ciuitate Abberdonensi et dioecesi constituti vicariis quarundam ecclesiarum quas in proprios vsus tenent supponentes nouas contra Lateranensis statuta concilij pensiones terras et alias possessiones ad vicarias spectantes easdem ipsis subtrahunt vicariis eas in vsus proprios conuertendo quidam vero prelatorum ipsorum tantum de reditibus ecclesiarum percipiunt predictarum quod earum vicarii nequeunt de residuo commode sustentari a nobis optinuit literas continentes ut super hiis auctoritate nostra statueret prout vtilitati ecclesiarum ipsarum secundum Deum expedire videret non obstantibus concessionibus quibuscunque et confirmationibus etiam a sede apostolica impetratis contradictores per censuram ecclesiasticam appellatione postposita compescendo Cumque litterarum ipsarum pretextu niteretur idem episcopus ordinare fines tenoris earum perperam excedendo quod prefati abbates prior et conuentus de prouentibus dictarum ecclesiarum certam annuatim reciperent portionem et omnes reliqui prouentus ipsarum assignarentur vicariis earundem jam dicti abbates prior et conuentus se ac ecclesias seu monasteria sua per ordinationem hujusmodi sentientes indebite aggrauari per appellationis remedium nostram audientiam inuocarunt cui dictus episcopus detulit reuerenter sicut in eius litteris perspeximus contineri Quocirca discretioni vestre per apostolica scripta mandamus quatenus facultatibus ipsarum ecclesiarum diligenter solliciteque pensatis in eis prout discretio vestra secundum Deum expedire viderit certas et determinatas curetis statuere vicarias et de prouentibus ipsarum ecclesiarum portionem ipsis congruam assignantes nominatos abbates priorem et conuentus postea contra ordinationem vestram super hijs nullatenus permittatis ab aliquibus indebite molestari molestatores hujusmodi per censuram ecclesiasticam sublato appellationis obstaculo compescendo non obstantibus ali quibus litteris veritati et iustitie preiudicantibus per quas executio mandati presentis impediri valeat aut differri et de quibus specialem oporteat in presentibus fieri mensionem quod si non omnes hiis exequendis poteritis interesse duo vestrum ea nihilominus exequantur Datum Lugduni xii Kalendas Maij pontificatus nostri anno septimo