Charter Document - 07211022
| Charter Number: | 07211022 |
|---|---|
| Cartulary Title: | Registrum Episcopatus Aberdonensis |
| Charter Language: | Latin |
| Charter Origin: | Lay |
| Charter Type(s): | Recitation |
| Date: | 1250 |
| Date type: | Internal, A.D., Feast |
| Resource Link(s): |
Reference Document for this Embedded Document People of Medieval Scotland |
Charter:
Vniuersis sancte matris ecclesie filiis hoc scriptum visuris vel audituris Cancellarius Morauiensis Thesaurarius et magister Johannes de Euerley canonicus Dunkeldensis eternam in Domino salutem Nouerit vniuersitas vestra nos mandatum domini Pape suscepisse in hec verba [] Hujus igitur auctoritate mandati abbate et conuentu de Abberbroth ordinis sancti Benedicti per procuratorem suum legitime constitutum vicariis vero ecclesiarum quas habent in dioecesi Abberdonensi quibusdam personaliter quibusdam per procuratores legitime constitutos coram nobis comparentibus in ecclesia parochiali de Banquhori terny anno gratie MCC quinquagesimo die iouis proxime post festum sancti Petri ad vincula die precedenti continuata facultatibus singularum ecclesiarum diligenter solliciteque pensatis Deum habentes per oculis habitoque prudentum virorum et iuris peritorum consilio certas et determinatas sententialiter taxauimus vicarias in eisdem et de prouentibus ipsarum per juramentum singulorum vicariorum et aliorum fide dignorum vicariis singularum ecclesiarum congruas assignauimus portiones videlicet vicarie ecclesie de Banchoryterny taxate xvj marcas totum alteragium cum acra terre et decimam garbarum eiusdem ville de terris tunc cultis saluis singulis annis fabrice ecclesie de Abberbrothoc xl denariis per manum vicarii recipiendis decimis garbarum predicte ville postea colendarum cum terris ad ecclesiam spectantibus et aliis decimis garbarum totius parochie integre inperpetuum predictis abbati et conuentui de Abbirbroth remanentibus Vicarie ecclesie de Banff taxate xxx marcas alteragium ipsius ecclesie cum manso et alteragium de Inuerbouin cum vna acra terre tota decima piscaria tam albi piscis quam rubei et terris spectantibus ad matricem ecclesiam et capellam et decimis garbarum totius parochie remanentibus perpetuo abbati et conuentui supradictis Vicarie ecclesie de Gamery taxate xviii marcas totum alteragium cum duabus acris terre terra ecclesie et decima garbarum totius parochie predicte remanentibus predictis abbati et conuentui Vicarie ecclesie de Fywin taxate ad xxxiij marcas alteragium cum terra Ardingros seruatis singulis annis quinque marcis in lana pacabili vel agnis et decimis garbarum tam de Ardingros quam totius parochie predictis abbati et conventui Vicarie ecclesie de Bothelny taxate xv marcas totum alteragium cum vj marcis in decimis garbarum certis locis eiusdem parochie annuatim percipiendis de terris tunc cultis residuo decimarum garbarum ipsius parochie integre remanente perpetuo predictis abbati et conuentui Vicarie ecclesie de Tarwas taxate ad xxxij marcas alteragium cum vna acra terre reservatis octo marcis annuis percipiendis annuatim de decima lane vel agnorum vel vtraque et decimis totius parochie cum terra ecclesie integre in perpetuum predictis abbati et conuentui Vicarie ecclesie de Kynnerny taxate x marcas totum alteragium cum manso et v marcis cum dimedio in decimis garbarum in certis locis de terris ipsius parochie tunc cultis residuo decimarum garbarum totius parochie remanente integre inperpetuum predictis abbati et conuentui Vicarie ecclesie de Forge taxate c solidos totum alteragium cum manso et decimis garbarum de terris tunc cultis residuo prouenientium que postmodum extiterint vltra c solidos in vsus predictorum abbatis et conuentus remanente Reservata nobis inperpetuum potestate predicte sententie [molestatores] per censuram ecclesiasticam compescendi Et sciendum quod omnes predicti vicarij predictarum ecclesiarum omnia onera ordinaria sustinebunt et de fabrica cancellorum ecclesiarum et oneribus extraordinariis proportione sua inperpetuum respondebunt