Charter Document - 07191005

Anastasius Episcopus Servus Servorum Dei venerabili fratri Johannii Trudensi Archiepiscopo ejusque successoribus canonice substituendis jn perpetuum Licet omnibus discipulis eadem ligandi et solvendi sit concessa potestas licet unum preceptum ad omnes idemque pervenerit predicandi Evangelium omni creature velut quedam tamen inter eos habita est discretio dignitatis et Dominicarum ovium curam que omnibus equaliter inminebat unus singulariter suscepit habendam dicente ad eum Domino Petre amas me pasce oves meas Qui etiam inter omnes Apostolos principatus nomen obtinuit et de fratrum confirmatione singulare a Domino preceptum accepit ut in hoc secuture posteritati daretur intelligi quoniam quamvis multos ad regimen Ecclesie contingeret ordinari unus tamen solummodo supreme dignitatis locum fastigiumque teneret et unus omnibus et potestate judicandi et gubernandi onere presideret Unde et secundum hanc formam in Ecclesia distinctio servata est dignitatum Et sicut in humano corpore pro varietate officiorum diversa ordinata sunt membra ita in structura Ecclesie ad diversa ministeria exhibenda diverse persone in diversis sunt ordinibus constitute Aliis enim ad singularum ecclesiarum aliis autem ad singularum urbium dispositionem ac regimen ordinatis constituti sunt in singulis provinciis alii quorum inter fratres sententia habeatur et ad quorum examen subjectarum personarum questiones et negotia referantur Super omnes autem Romanus Pontifex tanquam Noe in arca primum locum noscitur obtinere qui ex collato sibi desuper in Apostolorum principe privilegio de universorum causis judicat et disponit Et per universum orbem Ecclesie filios in christiane fidei firmitate non desinit confirmare talem se curans jugiter exhibere qui vocem Dominicam videatur audisse qua dicitur Et tu aliquando conversus confirma fratres tuos Hoc nimirum post beatum Petrum illi Apostolici viri qui per successiones temporum ad gerendam curam sedis Apostolice surrexerunt indesinenti curaverunt studio adimplere et per universum orbem nunc per se nunc per legatos suos corrigenda corrigere et statuenda statuere summopere studuerunt quorum quoque vestigia subsecutus felicis memorie Papa Eugenius antecessor noster de corrigendis his que in regno Norvegie correctionem videbuntur exposcere et verbo ibi fidei seminando juxta sui officii debitum sollicitus extitit Et quod per se ipsum universalis Ecclesie cura obsistente non potuit per legatum suum venerabilem fratrem nostrum Nicolaum Albanensem Episcopum exsecutioni mandavit Qui ad partes illas accedens sicut a suo patre familias acceperat in mandatis talentum sibi creditum largitus est ad usuram et tanquam fidelis servus et prudens multiplicatum in fructum studuit reportare Inter cetera vero que illic ad laudem nominis Dei et ministerii sui commendationem implevit juxta quod predictus antecessor noster preceperat pallium Fraternitati tue indulsit Et ne de cetero provincie Norvegie Metropolitani possit cura deesse commissam gubernationi tue urbem Thrudensem ejusdem provincie perpetuam Metropolim ordinavit et Afloensem Hammacopiensem Bergenensem Stawangriensem Insulas Orcades Insulas Guthraie Insulas Islandensium et Grenelandie Episcopatus tanquam sue Metropoli perpetuis temporibus constituit subjacere et earum episcopatus sicut Metropolitanis suis tibi tuisque successoribus obedire Ne igitur ad violationem constitutionis istius ulli unquam liceat aspirare nos eam auctoritate Apostolica confirmamus et presenti privilegio communimus statuentes ut Trudensis civitas perpetuis temporibus supradictarum urbium Metropolis habeatur et earum Episcopi tam tibi quam tuis successoribus sicut Metropolitanis obediant et de manu vestra consecrationis gratiam sortiantur Successores autem tui ad Romanum Pontificem tantum recepturi donum consecrationis accedant et ei simili modo et Romane Ecclesie subjecti semper existant Porro concesso tibi pallio pontificalis scilicet officii plenitudine infra ecclesiam tantum ad sacra missarum sollempnia per universam provinciam tuam hiis solummodo diebus uti fraternitas tua debebit qui inferius leguntur inscripti Nativitate Domini Epiphania Cena Domini Resurrectione Ascensione Pentecostes in sollempnitatibus sancte Dei genetricis semperque Virginis Marie in Natalitio beatorum Apostolorum Petri et Pauli in Nativitate sancti Joannis Baptiste in festo Beati Joannis Evangeliste commemoratione omnium Sanctorum in consecrationibus Ecclesiarum vel Episcoporum Benedictionibus Abbatum ordinationibus presbyterorum in die dedicationis Ecclesie tue ac festis sancte Trinitatis et Sancti Olavi et Anniversario tue consecrationis die Studeat ergo tua fraternitas plenitudine tante dignitatis suscepta ita strenue cuncta peragere quatenus morum tuorum ornamenta eidem valeant convenire Sit vita tua subditis exemplum ut per eam agnoscant quid debeant appetere et quid cogantur vitare Esto discretione precipuus cogitatione mundus actione purus discretus in silentio utilis in verbo Cure tibi sit magis hominibus prodesse quam preesse Non in te potestatem ordinis sed equalitatem oportet pensare conditionis Stude ne vita doctrinam destituat nec rursum vite doctrina contradicat Memento quia ars est artium regimen animarum Super omnia studium tibi sit Apostolice sedis decreta firmiter observare eique tamquam matri et domine tue humiliter obedire Ecce frater in Christo karissime inter multa alia hec sunt pallii ista sunt sacerdotii que omnia facile Christo adjuvante adimplere poteris Si virtutum omnium magistram caritatem et humilitatem habueris et quod foris habere ostenderis intus habebis Decernimus ergo ut nulli omnino hominum liceat eandem Ecclesiam temere perturbare vel ejus possessiones auferre vel ablatas retinere minuere seu quibuslibet vexationibus fatigare Sed illibata omnia et integra conserventur eorum pro quorum gubernatione et sustentatione concessa sunt usibus omnimodis profutura salva sedis Apostolice auctoritate Si qua igitur in futurum ecclesiastica secularisve persona hanc nostre Constitutionis paginam sciens contra eam temere venire temptaverit secundo tertiove commonita nisi presumptionem suam congrua satisfactione correxerit Potestate honorisque sui dignitate careat reamque se divino judicio existere de perpetrata iniquitate cognoscat et a sacratissimo corpore et sanguine Dei et Domini redemptoris nostri Jesu Christi aliena fiat atque in extremo examine districte ultioni subjaceat cunctis autem eidem loco sua jura servantibus sit pax Domini nostri Jesu Christi quatenus et hic fructum bone actionis percipiant et apud districtum Judicem premia eterne pacis inveniant Amen Amen Ego Anastasius catholice Ecclesie Episcopus Ego Imarus a Tusculanus Episcopus Ego Nicolaus Albanensis Episcopus Ego Hugo Hostiensis Episcopus Ego Cencius Portuensis et Sancte Rufine Episcopus Ego Gregorius Sabinensis Episcopus Ego Guido Presbyter Cardinalis Sancti Crysogoni Ego Manfredus Presbyter Cardinalis Sancte Sabine Ego Aribertus Presbyter Cardinalis Sancte Anastasie Ego Astaldus Presbyter Cardinalis Sancte Prisce Ego Johannes Presbyter Cardinalis Sanctorum Johannis et Pauli Ego Henricus Presbyter Cardinalis Sanctorum Nerei et Achillei Ego Guido Diaconus Cardinalis Sancte Marie in Porticu Ego Johannes Diaconus Cardinalis Sanctorum Sergeii et Bacchi Ego Odo Diaconus Cardinalis Sancti Nicolai in carcere Tulliani Datum Lateran per manum Rolandi Sancte Romane Ecclesie Presbyteri Cardinalis et Cancellarii [] Kalendas Decembris indictione iii Incarnationis Dominice anno MCLIIII Pontificatus vero Domini Anastasii Pape iiii anno ii