Charter Document - 06480109

Sanctissimo in Christo patri et domino suo reverendissimo domino Clementi Divina providentia sacrosancte Romane et universalis ecclesie summo pontifici sua creatura humilis et devota Willelmus Ejusdem permissione Eboracensis archiepiscopus Anglie primas cum reverentia et subjectione omnimodis devotissima pedum oscula beatorum Sanctissime beatitudinis vestre literas xvij kalendas Julii anno gratie millesimo CCC sexto apud Lanum per manus discreti viri magistri Petri de Lacu canonici Claremontensis juris civilis professoris cum reverentia debita recepi humiliter tenorem qui sequitur continentes [] Quarum auctoritate literarum statim in presentia dicti magistri Petri per nuntium meum juratum propter magnam locorum distantiam venerabilibus fratribus dominis Karlioli et Candide Case episcopis suffraganeis meis separatim per diversas literas meas ex certis causis ac etiam dilectis filiis dominis Willelmo de Bevercotes cancellario et Johanni de Sandale camerario Scotie per alias meas literas conjunctim et divisim mandavi auctoritate Apostolica firmiter injungendo ut ipsi sub certis penis literis meis insertis dictum episcopum juxta traditam mihi formam citarent meque de die receptionis literarum mearum predictarum et citationis facte ac forma ejusdem infra certum eis per me statutum terminum per suas redderent patentes literas certiorem originalibus literis Apostolicis supradictis sub bulla prout illas recepi eisdem transmissis ad hujusmodi rei certitudinem pleniorem Verum quia dictus Glasguensis episcopus a dioecesibus predictorum suffraganeorum meorum distabat nuntius meus prefatus ad dictos Cancellarium et Camerarium accedens eisdem memoratas eis directas literas presentavit Qui illis cum debita devotione admissis mihi concorditer rescripserunt quod priusquam dicte ad eos litere pervenissent prefatus episcopus in castro de Coupre in comitatu de Fif in Scotia [quod ipse episcopus et nonnulli alii capitales inimici domini mei regis Anglie illustris cum eo manu armata et hostili incursu super homines ejusdem domini regis castrum illud ex parte sua tenentes ceperant et sic captum tenuerant et defenderant quousque per supervenientem ex parte predicti domini regis potentiam super dictum episcopum et alios secum intrusos castrum hujusmodi potenter postea recuperatum extiterat] tanquam hostis et contra pacem domini regis veniens captus fuit et per potentiam regiam ibidem premissam velut hostis et hostiliter captus carcerali custodie mancipatur Asseruerunt etiam dicti Cancellarius et Camerarius Scotie quod licet parati essent mandatis Apostolicis humiliter obedire inconsulto tamen domino meo rege prefato episcopo Sic in custodia regia existenti citationem aliquam facere non audebant Super quo regiam consului majestatem que mihi rescribere dignabatur quod rebus se habentibus ut prefertur non videbatur eidem fore necessarium seu expediens quod episcopo ad presens fieret citatio memorato nam ipse dominus rex ut intellexi et ex serie literarum suarum concepi certos ad vestram presentiam nuntios in proximo est missurus per quos vestre beatitudini intimare proponit totam seriem rei geste et in causa premissa vestrum requirere consilium ac beneplacitum et quid in hujusmodi negotio ulterius sit agendum paratus in eo vestram facere voluntatem et in omnibus que vestra sanctitas sibi duxerit demandanda Vestre igitur sanctitatis clementie humiliter supplico et devote quatenus consideratis premissis me vestrum humilem sacerdotem in executione mandati vestri predicti habere dignemini favorabiliter excusatum quem semper annuente Domino invenietis paratum ad vestra beneplacita et mandata Ceterum cum premissis vestris literis alias per prefatum magistrum Petrum beatitudinis vestre literas recepi in quibus vidi inter cetera contineri quod si prefatus Glasguensis episcopus tanquam presumptuosus et in profundum malorum descendens mandatis Apostolicis obedire contemneret ex tunc ubicumque eum contingeret reperiri etiamsi in loco ecclesiastico et exempto auctoritate vestra sine more dispendio eum capi facerem invocato ad hoc si opus foret auxilio brachii secularis Quarum executionem facere non oportuit pro eo quod ut premittitur antea captus et detentus fuerat episcopus memoratus Ad exaltationem universalis ecclesie et pacis ejusdem per multos annos prosperos et longevos vestra valeat et vigeat sanctitudo In quorum omnium testimonium presentes literas per Ricardum de Clifton notarium publicum infrascriptum scribi et publicari feci et sigilli mei appensione muniri Acta et data apud Scroby sub anno Domini ab incarnatione millesimo CCC sexto indictione quarta quarto idus Julii presentibus magistro Willelmo de Estden ac domino Roberto de Notingham clericis testibus et aliis