Charter Document - 06480108

Clemens episcopus servus servorum Dei venerabili fratri archiepiscopo Eboracensi salutem et Apostolicam benedictionem Quotidiana instantia sollicitudo ecclesiarum omnium Romanum pontificem pastorem gregis Dominici speculatorem datum super domum Israel non immerito angit et stimulat de quorumlibet pravis actibus et detestandis excessibus corrigendis et virtutum seminibus spargendis in populo Domini ex quibus Omnipotenti Deo laus et gloria subditis per salutaris exempli productionem salutis et bonorum occasio Divina ministretur Verum edificare non sufficit et plantare virtutes nisi errores et vitia disperdat ei dissipet quoniam virtutis ingressus egressus est vitiorum Hec sollicitudo siquidem cunctos tangit ad universos extenditur quoniam pastor et rector ac speculator universalis gregis Dominici constitutus preficitur super reges et regna linguas et populos ut edificet et plantet dissipet et disperdat In ipso namque verissime impletur verbum Propheticum pronuntiatum Divinitus de Illo Cujus existit vicarius Cui data est omnis potestas in celo et in terra ut adorent Eum omnes reges terre et omnes gentes serviant Illi Erit pastor unus omnium Nec mirum autem utique non mirum si de prelatorum excessibus circa curam gregis Dominici in partem sollicitudinis vocatorum et qui deberent alios doctrina verbi et operis multipliciter informare et per illicitos gestus temerarios et presumptuosos deformant ad delinquendum alliciunt et quantum in eis est per mali exempli perniciem de via ad invium de reverentia ad irreverentiam de obedientia ad presumptionem prave seducere moliuntur materiam majoris zeli ad defensionem domus Domini Divineque legis et mandatorum majorisque indignationis et ire que non sine peccato est patenter assumit Sane ut ob honorem Dei et status ecclesiastici reverentiam precipue prelatorum de Roberto Glasguensi episcopo plurima que non immerito nostrum turbaverunt auditum in offensam Dei in contemptum ecclesie ac nervi ecclesiastici dissolutionem et turbationem non modicam sed gravissimam sibi circumposite regionis per ipsum commissa enormia non sine quadam conscientie violentia sub silentio transeamus Quis dissimulare poterit ejus actus nefarios et detestandos ac presumptuosus excessus quibus sedi Apostolice specialiter reservata temerarie sibi nisus est ac nititur usurpare Quis tuta conscientia sine offensa Dei tacere aut dissimulare valeret tantam presumptionis arrogantiam ut que solus Romanus potest pontifex inferior contra fas et licitum Divina et humana jura usurpet et in contemptum Dei nostrum et Romane ecclesie dedecus inauditam exempli perniciem usurpare nitatur ac falso et temerarie sibi vindicare conetur Solus summus sacerdos Aaron cujus Romanus pontifex cippum gerit intrat in Sancta Sanctorum Solus perscrutatur et tractat que intra Sancta Sanctorum sunt adeo ut dum voce jubeat Moyses ut si quis exterus ad perscrutandum et contrectandum accesserit moriatur Glasguensis autem episcopus Dei timore postposito nostra et ecclesie reverentia vili pensa sedi Apostolice reservata ac nobis qui Divina providentia presidemus in ipsa sibi temerarie ac presumptuose usurpat continue temerarie mala malis accumulans et excessus excessibus jam super astra coli conscendere nititur ac super altitudinem nubium et detestandam ac damnatam de celo cadentis Luciferi superbiam imitatus sedem suam in Aquilone ponere et simul nititur esse [altior] altissimo specialiter sedi Apostolice et Romano pontifici reservata continue presumptuose et temerarie usurpando Nos itaque volentes sicuti ex debito pastoralis tenemur officii reformare tante presumptionis audaciam nec impunitam relinquere nec impunitam coalescere sinere sed ad viam reducere reverentie et obedientie debite et per Apostolice correctionis limina tante presumptionis et temeritatis audaciam exstirpare fraternitati tue per Apostolica scripta in virtute obedientie districte precipiendo mandamus quatenus per te vel alium seu alios prefatum episcopum ex parte nostra peremptorie citare procures ut infra mensem post citationem tuam ad nos iter arripiens veniendi infra xl dierum spatium mensem ipsum immediate sequentium a spiritualium et temporalium administratione suspensus quem ex nunc prout ex tunc a predictis suspendimus nostro se conspectui personaliter representet super premissis et aliis pro meritis recepturus ac facturus que justitia suadebit Nihilominus expresse injungas eidem ut infra dictum mensem post citationem tuam sine more dispendio iter arripiat supradictum Predicta autem cum omni sollicitudine et efficacia prout de tua circumspectione credimus exequaris non obstante si aliquibus a sede Apostolica sit indultum quod interdici suspendi vel excommunicari non possint per literas Apostolicas non facientes plenam et expressam ac de verbo ad verbum de indulto hujusmodi mentionem contradictores auctoritate nostra appellatione postposita compescendo Diem vero hujus citationis et formam et quicquid inde duxeris faciendum nobis per tuas literas harum seriem continentes fideliter intimare procures Data Burdegal quinto idus Maii pontificatus nostri anno primo