Charter Document - 06191272

Calixtus episcopus servus servorum Dei carissimo in Christo filio Pontio Cluniacensi abbati ejusque successoribus regulariter substituendis inperpetuum Religionis monastice modernis temporibus speculum et in Galliarum partibus documentum beati Petri Cluniacensis monasterium ab ipso sue fundationis exordio sedi apostolice in jus proprium est oblatum Proinde patres nostri sancte recordationis Johannes undecimus item Johannes duodecimus Agapitus secundus Benedictus sextus item Benedictus septimus Leo septimus item Leo nonus Gregorius sextus item Gregorius septimus Alexander secundus Stephanus Victor tertius Urbanus secundus Pascalis secundus et Gelasius secundus ecclesie Romane pontifices locum ipsum singularis dilectionis ac libertatis prerogativa donarunt et universa ei pertinentia privilegiorum suorum sanctionibus munierunt Statutum est enim ut ecclesie omnes cimiteria monachi clerici et laici universi infra terminos habitantes qui sunt a rivo de Salnay et ab ecclesia Rusiaci et cruce de Lornant a termino quoque molendini de Tornasac per villam que dicitur Varrentia cum nemore Burseio a termino etiam qui dicitur Periois ad rivum usque Salnay sub apostolice tantum sedis jure et tuitione permaneant neque ipsius Cluniacensis loci presbiteri aut etiam parochiani ad cujuslibet nisi Romani Pontificis et Cluniacensis Abbatis cogantur ire symodum vel conventum Sane pro abbatis monachorum seu clericorum infra predictos terminos habitantium ordinatione pro chrismatis confectione pro sacri olei ecclesiarum altarium et cimiteriorum consecratione Cluniacense monasterium quem maluerit antistitem convocet Cluniacenses monachos ubi libet habitantes nulla omnino persona preter Romanum Pontificem et Legatum qui ad hoc missus fuerit excommunicet aut etiam interdicat Porro si monachus clericus aut laicus sive cujuslibet ordinis professionisve persona nisi forte certa de causa excommunicata sit Cluniacensium claustrorum mansiones elegerit absque alicujus contradictione suscipiatur et que de suo jure attulerit libere a monasterio habeantur Altaria cimiteria et decime Cluniacensium monachorum et quecunque juris eorum sunt a nemine auferantur vel minuantur De monachis aut monasteriis Cluniacensibus nulli episcoporum salvo jure canonico si quod in eis habent liceat judicare sed ab Abbate Cluniacensi justitia requiratur quam si apud eum invenire nequiverit ad sedem apostolicam recurratur In abbaciis que cum suis abbatibus ordinationi Cluniacensis monasterii date sunt videlicet Sancti Martialis Lemovicensis Sancti Eparchi Engolismensis monasterii novi Pictavensis Sancti Johannis Angeriacensis monasterii Lesatensis Moysiacensis Figiacensis Sancti Egidii Nemausensis In Arvernia Mauziacensis Tiernensis Menatensis In episcopatu Eduensi Vizeliacensis In Autisiodorensi Sancti Germani In Cameracensi Hunulcurtensis In Rothomagensi abbatia apud Pontisaram In Tarvennensi Sancti Bertini et Sancti Wlmari In Italia Sancti Benedicti super Padum sine Cluniacensis Abbatis precepto abbas nullatenus eligatur Pro altaribus et ecclesiis sive decimis vestris nulli episcoporum facultas sit gravamen vobis aliquod aut molestias irrogare sed sicut promissione quedam eorum ex parte quedam ex integro habuistis ita et in futurum habeatis Ecclesiarum vestrarum decimas que a laicis obtinentur si secundum Deum eorum potestati subtrahere vestre religionis reverentia poterit ad vestram et pauperum gubernationem vobis liceat possidere Decimas laborum vestrorum pro quibus tam vos quam alios monastice religionis viros inquietare episcopi consuerunt illorum videlicet quos dominicatus appellant qui vestro sumptu a monachis et cellarum vestrarum clientibus excoluntur sine omni episcoporum et episcopalium ministrorum contradictione deinceps quietius habeatis qui vestra peregrinis fratribus et pauperibus erogatis Ecclesie omnes que ubi libet posite sunt seu capelle vestre et cimiteria libera sint et omnis exactionis immunia preter consuetam Episcopi paratam et justitiam in presbiteros si adversus sui ordinis dignitatem offenderint Liceatque vobis seu fratribus vestris in ecclesiis vestris presbiteros eligere ita tamen ut ab episcopis vel episcoporum vicariis animarum curam absque venalitate suscipiant quam si committere illi quod absit ex pravitate noluerint tunc presbiteri ex apostolice sedis benignitate officia celebrandi licentiam consequantur Ecclesiarum vestrarum consecrationes si dioecesani ipsi gratis noluerint exhibere a quolibet catholico suscipietis episcopo Nec cellarum vestrarum ubi libet positarum fratres pro qualibet interdictione vel excommunicatione divinorum officiorum suspensionem patiantur sed tam monachi ipsi quam et famuli eorum et qui se monastice professioni devoverunt clausis ecclesiarum januis non admissis dioecesanis divine servitutis officia celebrent et sepulture debita peragant Percussuram quoque proprii numismatis vel monete quandocunque vel quamdiu vobis placuerit habeatis Hec igitur omnia sicut a nostris predecessoribus constituta sunt ita et nos auctoritate apostolica constituimus et presentis privilegii pagina confirmamus Preterea fili in Christo carissime Ponti quem nos in Viennensis ecclesie regimine positi nostris per Dei gratiam manibus in Abbatem consecravimus et personam tuam et locum cui Deo auctore presides totis dilectionis visceribus amplectentes et quieti vestre attentius providentes hec adjicienda censuimus ut abbatiarum vestrarum electis nullus episcoporum sine commendatitiis Cluniacensis Abbatis litteris consecrationis vel ordinationis manus imponat alioquin et consecrator tanquam constitutionis apostolice prevaricator graviori subjaceat ultioni et consecrati electio sive ordinatio donec apostolice sedi et ejus Cluniacensi monasterio satis fiat irrita habeatur Porro presbiteris parochialum ecclesiarum Sancte Marie et Sancti Odonis Cluniacensium ejiciendi et suscipiendi in ecclesiam ex antiqua consuetudine penitentes et nuptiales cartas faciendi licentiam indulgemus prohibentes tam Matisconensem Episcopum quam et alios super hoc vel super aliis que statuta sunt vobis molestias impostorum irrogare Si quis igitur ausu temerario impiaque presumptione contra Deum et sanctos ejus apostolos contraque animam suam hoc nostre apostolice auctoritatis privilegium in aliquo infringere temptaverit incunctanter se noverit nostre apostolice maledictionis aculeo transpunctum nostre apostolice excommunicationis telo perfossum nostri etiam apostolici anathematis gladio transverberatum nec nisi per dignam satisfactionem saluti pristine reparandum Ei vero qui conservator extiterit sit pax Domini nostri Jesu Christi quatenus et hic fructum bone actionis percipiat et apud districtum judicem premia eterne pacis inveniat Amen Amen Amen Datum Valentie per manus Chrisogoni sancte Romane ecclesie diaconi cardinalis et bibliothecarii viii Kalendas Martii indictione xiii incarnationis Dominice anno millesimo centesimo vicesimo pontificatus autem domini Calixti secundi pape anno secundo