Charter Document - 06190285

Honorius episcopus servus servorum Dei venerabili fratri Episcopo Lesmoriensi et dilectis filiis de Kilwinnyn et de Dercongal Abbatibus Glasguensis dioecesis salutem et apostolicam benedictionem Dilectus filius Abbas de Passelet Cluniacensis ordinis in nostra proposuit presentia constitutus quod venerabiles fratres nostri Sancti Andree et Glasguensis episcopi occasione cujusdam constitutionis in generali consilio promulgate qua continetur ut consuetudine qualibet episcopi vel patroni seu cujuslibet alterius non obstante parochialium ecclesiarum presbiteris de ipsarum proventibus portio sufficiens assignetur ecclesiis monasterii sui per eorum dioeceses constitutis graves existunt plurimum et molesti taxationem portionis eisdem presbiteris assignande sibi cum ex tenore constitutionis ejusdem non habeant usurpantes Unde predictus Abbas humiliter petiit ut providere super hoc ipsi monasterio et eisdem ecclesiis dignaremur Quocirca discretioni vestre per apostolica scripta mandamus quatenus Abbate prefato vocato ut per se vel procuratorem intersit et qualitatibus personarum ac supradictarum ecclesiarum facultatibus provida deliberatione pensatis de ipsarum ecclesiarum proventibus sufficientem portionem juxta ipsius statuta consilii auctoritate nostra earum presbiteris assignetis Quod si non omnes hiis exequendis potueritis interesse tu frater Episcope cum eorum altero ea nihilominus exequaris Datum Reati xv Kalendas Januarii pontificatus nostri anno decimo