Charter Document - 05580002

Innocentius episcopus servus servorum Dei venerabili fratri episcopo et dilectis filiis priori Coventrensi et archidiacono de Norhamptonia Lincolniensis dioeceseos salutem et apostolicam benedictionem Constitutis in presentia nostra venerabili fratre nostro Wigornensi episcopo et dilectis filiis E[rmefredo] et Rogerum nuntiis abbatis et monachorum Eveshamensium quum super subjectione ac exemptione ipsius monasterii vellent adinvicem litigare dilectum filium B[enedictus] tunc sancte Susanne presbyterum cardinalem eis concessimus auditorem In cujus presentia proposuit episcopus memoratus quod quum abbas et monachi de Evesham hactenus ecclesia Wigornensi dioecesana extiterint lege subjecti et predicti loci abbates ab episcopo Wigornensi benedictionis munus suscipere sibique per libellum professionis canonicam obedientiam exhibere ad synodum Wigornie vocati accedere consueverunt et ipsos episcopos ad eorum monasterium accedentes cum processione recipere ac in multis aliis ipsis quasi devoti filii obedire et omnia spiritualia ab ecclesia Wigornie percipere nunc in spiritu contumaci debitam eidem episcopo reverentiam et obedientiam subtrahere moliuntur Quum enim nuper idem episcopus una cum dilectis filiis abbate Winchelcumbie priore Gloecestrie clericis pluribus et jurisperitis certo die prefixo et ab eis recepto ad eorum monasterium causa visitationis accederet ipsum recipere noluerunt sed contumaciter resistentes eidem neque jure uti communi nec speciale privilegium per quod essent exempti ostendere voluerunt sed nec etiam indulgentiam eidem episcopo a nobis concessam cujus auctoritate de intrinseca et extrinsecus religiosarum domorum administratione que ipsi dioecesana sunt lege subjecte appellatione remota potest cognoscere curaverunt audire multotiens requisiti Episcopus vero communicato predictorum virorum et jurisperitorum consilio tam manifestam ipsorum contumaciam et inobedientiam canonica pena percellens ipsos et eorum monasterium et capellas pertinentes ipsos a divinorum celebratione suspendit Sed ipsi contumacia contumaciam adjungentes illam sententiam contempserunt et officium exequi minime formidarunt Wigornensem ecclesiam ac episcopum memoratum jurisdictione atque obedientia in eos hactenus habita et obtenta pacifice pretermisso juris ordine spoliantes Preterea in ecclesiis et capellis vallis Eveshamie quum vacant personas et vicarios instituere causas matrimoniales et sacrilegii tractare licet nullum super his privilegium habeant vel ostendant presumunt et injungere penitentias publicas et solemnes Nuntii vero prefati abbatis et monachorum ex adverso proponere curaverunt quod quum monasterium de Evesham ad Romanam ecclesiam nullo pertineat mediante sicut in privilegio felicis memoria Constantini pape tertii et aliorum predecessorum nostrorum noscitur contineri predictus episcopus contra libertatem ab apostolica sede obtentam et jam per quingentos annos in pace possessam presumit contra justitiam molestare illud cum omnibus ad idem in dioecesi sua pertinentibus post appellationem ad nos legitime interpositam et coram officialibus venerabilis fratris nostri Cantuariensis archiepiscopi et ipso episcopo sepius innovatam ecclesiastico interdicto et excommunicationi supponens Pensiones insuper prohibuit eis reddi et multa alia gravamina eis non cessat pro sue voluntatis arbitrio irrogare Volentes igitur tam episcopi predicti quam memorati monasterii jura integre conservari discretioni vestre per apostolica scripta mandamus quatenus episcopo si de spoliatione constiterit sicut justum fuerit appellatione postposita restituto revocantes in irritum si quid post appellationem ad nos legitime interpositam temere fuerit attentatum et facientes predicti interdicti sententiam si rationabiliter lata est usque ad satisfactionem debitam inviolabiliter observari audiatis que adinvicem duxerint proponenda et omnia redigentes in scriptis eadem sigillis vestris inclusa et originalia etiam si qua habent nobis mittere procuretis prefigentes partibus terminum competentem quo cum ipsis sententiam auctore Domino recepture nostro se conspectui representent Testes autem qui fuerint nominati si se gratia odio vel timore subtraxerint per censuram ecclesiasticam cessante appellatione cogatis veritati testimonium perhibere nullis literis obstantibus si qua apparuerint harum mentione non habita a sede apostolica impetrate Quod si non omnes his exequendis interesse potueritis tum frater episcope cum altero eorum ea nihilominus exequaris Datum Ferentini xi Kalendas Junii pontificatus nostri anno vi