Charter Document - 05400518
| Charter Number: | 05400518 |
|---|---|
| Cartulary Title: | Recueil des chartes de l'abbaye de Saint-Benoît-sur-Loire |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1240 |
| Date type: | Internal, A.D. |
| Resource Link(s): |
|
Charter:
Ego Stephanus de Sacro Cesare dominus de Sancto Bricio notum facio omnibus presentes litteras inspecturis quod cum diu in proposito habuissem ut infra fortericiam meam de Sancto Bricio capellaniam instituerem charissimi mei in Christo abbas et conventus Sancti Benedicti Floriacensis voluntatem ac propositum nec non devotionem meam attendentes intuitu Dei et ob amoris integritatem et sinceram amicitiam quam erga me et meos habent et habuerunt et ego erga ipsos et ecclesiam suam mihi amicabiliter et benigne presbytero parochialis ecclesie de Sancto Bricio id volente concesserunt ut in ipsa fortericia mea et non extra ob salutem anime mee et antecessorum meorum quandam instituam capellaniam que de domo meo et successorum meorum dominorum de Sancto Bricio in perpetuum remaneat sub forma inferius annotata percipiet enim vicarius capelle predicte oblationes que venient ad manum suam sive ad altare suum tam meas quam uxoris mee quam etiam familie mee aut aliorum etiam extraneorum nisi forte de ipsa familia sint aliqui residentes parochiani ecclesie de Sancto Bricio in quorum oblationibus sepe dictus vicarius nihil percipiet sed easdem statim restituet priori et presbytero de Sancto Bricio ad quos pertinere dignoscuntur tali etiam modo quod idem vicarius me aut uxorem sive aliam familiam meam sive dominum sive dominam quicumque sint pro tempore ad sacramenta ecclesiastica non admittetur nisi assensu presbyteri parochialis ecclesie et prioris de Sancto Bricio pro recompensatione siquidem harum oblationum assignavi ecclesie de Sancto Bricio viginti quinque solidos turonensium annui redditus in pedagio nostro de Sancto Firmino et viginti quinque solidos turonensium in pecunia numerata ad emendos redditus ita quod emptionem si de illis viginti quinque solidis facta fuerit in terra mea ecclesie de Sancto Bricio teneor laudare preterea reddet dictus vicarius annuatim ecclesie de Sancto Bricio in vigilia Assumptionis Beate Marie unum cereum de duabus libris cere et jurabit priori et presbytero de Sancto Bricio quotiens idem vicarius in capellania de novo fuerit institutus et suffraganeus ejus si forte ipsum suffraganeum habere contigerit qui missas publicas vel privatas ad requisitionem parochianorum ecclesie de Sancto Bricio nec prece nec pretio celebrabunt nec infirmos parochie visitabunt nec testamentis eorumdem parochianorum intererunt faciendis nec de re aliqua ad jus parochiale pertinenti se aliquo modo intromittent et quod servabunt mandata domini archiepiscopi Bituricensis et officialium suorum prout ex parte eorumdem per dictum presbyterum eis fuerint injuncta et quod venient ad processiones ecclesie annuales nisi negotiis capelle sue vel domini de Sancto Bricio legitime fuerint occupati Predictus autem vicarius cum de novo fuerit institutus jurabit quod predicta omnia bona fide servabit sicut superius est expressum Quod ut firmum et stabile permaneat presentes litteras in perpetuam memoriam abbati et conventui Sancti Benedicti tradi precepi sigilli mei impressione communitas Actum anno dominice incarnationis MCCXL mense junio