Charter Document - 05399001

In nomine Patris et Filii et Spiritus sancti Anno secundo regnante domno nostro Chlodoveo gloriosissimo rege sub die V kal Julii Virtute et firmissimo robore adquiritur ut agreste et docte menti testificatio suffragetur et quoniam ita est Dei protegente dextera ego Leodebodus ista conscribo ac si indignus et peccator abba Dum me divina pietas basilice domni Aniani ubi ipse domnus in corpore requiescit abbatie sublimatum honore ejusdem loci custodem esse instituit congruum duxi et devotione plenissima michi consensit voluntas ut de re proprietatis mee tam in ipsa basilica quam et basilice domne Marie quam Johannes Floriacus a novo quondam construxit ubi venerabilis vir Fulcaldus abba custos preesse dinoscitur seu et in agro Floriaco quem cum glorioso atque precelso domno Chlodoveo rege et gloriosa domna uxore ejus Baltilde regina visus sum de rebus meis propriis commutasse ubi pro salute regia vel cuncto populo exorandum monasterium in honore sancti Petri edificare delibero ubi jam dictus vir Dei sanctus videlicet presul Anianus condigne jacet tumulatus in quo monachi juxta regulam sanctissimi Benedicti et domni Columbani consistere debeant singulariter de facultate proprietatis mee Christo presule conferre delibero Dono igitur ante dicte basilice domni Aniani vel monachis ibidem deservientibus ubi ad presens divinitate propicia funguntur officio et de jure meo in jus ante dicte basilice a die presenti transfundo portiones terrule infra agrum Nogrometense sitas in territorio Biturico nuncupatas Litmaro et Mariniaco quas de Aviana et Prosperiana feminis per instrumenta cartarum visus sum recepisse cum domibus edificiis mancipiis qui a me liberati non fuerint vineis silvis campis pratis pascuis cum omni jure et beneficio suo vel omnigeno pecude ibidem residente sicut a me possessum est similiter portionem meam que est infra agrum Littidum in Secalonia quam de Agana femina dato precio per venditionis titulum visus sum comparasse cum domibus edificiis mancipiis preter quos ingenuos relaxavero vineis silvis campis pratis pascuis omnique beneficio suo sicut a me possessum est itemque et portionem meam que est ad Vetulam Casam quam de Abbone et filio suo Fraterno dato precio per venditionis titulum comparavi et que per epistolas donationis ad me pervenit cum mansis vineis campis pratis silvis pascuis omnique genere pecudum et beneficio suo sicut a me possessum est simili modo et portionem meam que est in villa Frietoni in Secalonia sicut a me possessa est cum mansis acolabus silvis pratis campis pascuis in integrum cum termino vel omnigeno pecude ibidem residente simulque terras vel prata que ab Albuna in pago Stampensi visus sum comparasse sicut a me possessum est in integrum pari modo vasa dono argentea anacleta pensantia libris VIII et uncias duas sandalia II ad missas et oralia ad mensam una cum cappis et omni apparatu et vela II acu picta ista omnia ut in potestate et dominatione ipsius monasterii et monachorum ibidem Deo servientium perhenniter maneant integra devotione instituo Simulque et quod in pago Biturico cognominante Monte qui est juxta Carbrias vico portionem terrule quam de Domolo et uxore sua Ingara vel de pluribus hominibus visus sum comparasse dono vel quodcumque ibidem per donationis epistolam aut quolibet contractu ad me pervenit seu et quod in Bria que est super fluvium Flironte habeo que de pluribus hominibus visus sum comparasse et ad ipsum montem subjungitur cum domibus edificiis mancipiis qui a me liberati non fuerint vineis silvis campis pratis pascuis cum omi jure et termino earum omnique genere pecudum sicut a me possessum est dono idemque et villam Camberon que est juxta terminum Clariacense vel Ucello vico quam de heredibus Mummoli dato precio per venditionis titulum visus sum comparasse cum domibus edificiis mancipiis qui a me liberati non fuerint vineis silvis campis pratis pascuis omnique genere pecudum cum omni jure et beneficio vel termino ad se pertinente sicut a me possessum est dono sancto Petro Floriacensi idemque et in Rausedone villa que est in pago Magdunense quam de heredibus Wagini dato precio [visus sum comparasse] suprascripta pars ante dicte basilice domni Petri Floriacensis perpetuo jure atque proprietario ut possideat integra voluntate decerno Idemque antedicte basilice domne Marie portionem meam que est juxta Colomne vicum IIIIam partem ex ipso agro Colomnensi cum mansis acolabus campis cultis et incultis cum omni genere pecudum in integrum sicut a me possessum est delego perpetualiter possidendum idemque in Simpliciacense quod est in Secalonia quod de homine quodam Aregisilo nomine vel de aliis dato precio per venditionis titulum visus sum comparasse portionem ipsam cum mansis silvis pratis campis pascuis vel omni genere pecudum et beneficio suo sicut a me possessum est basilice domne Marie tribuo et ut in perpetuum possideat plenissima voluntate exopto Pari modo et ad memoratum monasterium quod in honorem domni Petri sicut predictum est in agro Floriaco edificare delibero ubi monachi regulariter consistere debeant dono a die presenti fiscum Floriacum cum domibus edificiis mancipiis preter quos jugo servitutis non relaxavero silvis campis pratis pascuis vineis aquis aquarumve decursibus cum adjunctis et adjacentibus suis omnique genere pecudum cum omni jure et termino suo sicut acto tempore ad fiscum fuit possessum vel ad nos pervenit idemque in potestate Melliaco quod per venditionis titulum visus sum comparasse cum domibus edificiis mancipiis qui a me liberati non fuerint cum campis cultis et incultis seu officina molendini quod in Malua in ipso territorio esse videtur in integrum cum termino suo et omni genere pecudum sicut a me possessum est concedo seu et quod de heredibus Pauloni negociatoris quondam visus sum comparasse areas scilicet in oppido civitatis Aurelianensium cum domibus desuper positis acolabus ibidem residentibus vel vineas ad oppidum ipsius civitatis pertinentes seu et locella villarum cognominata Curun Canavarias Simpliciaco et Caliace ultra fluvium Ligeris quod dato precio anteacto tempore visus sum comparasse Unde et in judicio ante virum apostolicum domnum Audoenum episcopum et illustrem virem Chramnulfum optimatem vel reliquos abbates convenit ut ex omnibus tam in terris quam in mancipiis seu et vineis medietatem exinde pars basilice domne Marie retineret et aliam medietatem in meo jure in integro deberem recipere quam medietatem eorum judicio visus sum recepisse ipsam enim in integrum ad memoratum monasterium sancti Petri Floriaco constructum delego perpetualiter possidendam simulque et Asinarias villam que est in valle quam de ratione illustris viri Trodovei per commutationis epistolas quantum textus earum declarat ad me pervenit dum ego e contra portionem illam que est in Suncanto vel Warentias quod de Machilde femina quondam dato precio per venditionis titulum comparavi et hoc ad vicem memorati Trodovei dedisse visus fui in ipsa villa Asinarias pars memorati monasterii domni Petri quod est Floriaco constructum in integrum absque cujuslibet inpedimento cum omni jure et termino sicut a me possessum est omneque genus pecudum ibidem residens recipiat possidendum areas vero infra muros Aurelianis quas de Chronulfo clerico dato precio per venditionis titulum visus sum comparasse ubi Leobastus accola commanere videtur ad predictum monasterium domni Petri vel monachis ibidem degentibus integra voluntate dare decerno Simili modo et caballos XXX bonos greges equinos V cum emissariis eorum boum greges XX vacarum V armentorum X Argentum quod ad ipsum monasterium domni Petri vel monachis ibidem deservientibus dono per hujus texti vigorem inserendum putavi hoc est bacchoaicha pura sigillata transmarina pensantia pondo libras X quorum unus habet in medio crucem auream dono et scutellam que habet in medio effigiem capitis hominis simili modo auream idemque et scutellas II minores massilienses deauratas que habent in medio cruces niellatas que speties argenti in jure et dominatione memorati monasterii domni Petri perhenniter permaneant volo De vestimentis vero que in paupertate mea habere videor preter id quod superius basilice domni Aniani delegavi reliquum quod superfuerit pars domni Petri Floriacensis recipiat ad possidendum Spero autem non futurum nec quolibet modo fieri posse credo ut aliquis de heredibus meis aut quelibet persona contra presentem venire temptet epistolam quod si fecerit et factum meum irrumpere conatus fuerit in primis iram celestis incurrat Trinitatis et insuper partibus basilice domni Aniani et basilice domne Marie vel monasterio sancti Petri quod est constructum Floriaco duplum quod ad ipsas basilicas dedi juxta quod res ipse meliorate fuerint ipsis abbatibus vel monachis ibidem deservientibus reformet et fisci juribus auri libras III argenti pondo XX teneatur obnoxius Quam donationem ut firmior habeatur gestis municipalibus alligare decrevi et duas epistolas uno tenore conscriptas feci de re superius nominata una que in archivo domni resideat Aniani aliam vero pars monasterii domni Petri per futura tempora reservandam recipiat qualiter monachi ibidem Deo servientes id quod eis per ipsam dedi defensare valeant et presens nichilominus a me facta donatio firma omni tempore et inviolata permaneat stipulatione in omnibus comprehensa Actum Aurelianis publice Addi vero convenit quod superius intimare debueramus ut quicquid prefato monasterio domni Petri Floriacensis quod nos a novo construximus delegavimus et a timoratis viris delegatum fuerit in posterum quicquid abbas qui ibidem prefuerit exinde voluerit facere pro usu aut utilitate monasterii ipsius vel lucro anime aut fratrum necessitate liberam habeat potestatem absque detrimento et impedimento sepedicti monasterii Leodebodus peccator abba epistola a me facta [S] Audoenus peccator episcopus rogante venerabili viro Leodebodo abbate hanc epistolam relegi et subscripsi Leodegarius ac si indignus episcopus rogante Leodebodo abbate hanc devotionis ejus epistolam firmavi in Christi nomine Betcelenus abba Ado abba Salomon abba Leotsindus abba Burgulfus presbiter Higecius diaconus et vicedominus Martinus diaconus Boso diaconus Agneramnus Mummolenus Sigirigus Autbertus Pappolus Amnegisilus testis Manasses Nonno Grimoldus Dagobertus Vapingus Framesindus Salomon sive Boso Sisobald[us] sive Saxo [] Authacarius Hildulfus Segoinus Anno incarnationis dominice DCXXIII data in mense Junio anno II domni Chlodovei Francorum regis filii Dagoberti senioris sanctorum Dionisii sociorumque ejus loci mirifici constructoris