Charter Document - 05361003

En nom de nostre seigneur amen En l'an de l'incarnacion d'icelli courant mil trois cens cinquante et cinc le dixhuitaime jour du mois de mars nous Perrenins de Thorey demorants à Diion serruriers et Guillemote sa femme faceons sauoir atous ceulx qui verront et orront ces presentes lettres que nous retenons a cense perpetuel a touz jours mais pour nous et pour noz hoirs de Perrin dit Petit Perrin de Diion poutier de coure demee maison c'est assauoir l'oureur deuant le soulier dessus le chas du moitant de la chambre descoste le pois et le dit pois ainsint comme il se portent la quelle maison est assise a Diion en la rue es Belioz de coste la maison es religieux du saint Esprit de Diion d'une part et la maison maistre Jehan du Pautez d'autre part Et ceste retenue faisons pour le pris et pour la somme de cinquante soulz tournois monnoie courant communement a Diion a la vendue du pain et du vin a paier chascun an de nous ou de noz hoirs audit Perrin ou a ses hoirs es termes qui s'ensuiguent c'est assauoir la moitie de la dite somme a la feste de la natiuite Nostre Signeur et l'autre moitie a la feste de la natiuite saint Jehan Baptiste la quelle demie maison ensint comme dessus est diuisie nous li diz reteneurs deuons et sumes tenuz de conuenances maintenir en bon estat a noz propres missions et despens saul tant que li diz Perrins et si hoirs doiuent la dite chambre darriers maintenir de couuerture Et pour les chouses dessus dites mieulx et plus fermement tenir garder et acomplir nous li reteneurs dessus diz obligeons de certainne science en la main dudit Perrin et de ses hoirs touz noz biens generalment et especialment la dite demie maison et deuhes piecies de terre contenant enuiron quatre journaulx assises ou finaige de Thorey la premiere ou lieu que l'on dit en Longeroie de coste la terre Guillemote fille a la Chappe d'une part et la terre es enfans Gillot Petit d'autre part la seconde est assise es Yssars de Longecourt de coste la terre Jehan le Conuerset d'une part et la terre Felisse femme Huguenot le fournier d'autre part Et voulons et expressement nous consentons que ou cas que nous ou noz hoirs deffauriens de paier la dite cense audit Perrin aux termes dessus diz que ycilz Perrins ses hoirs ou ses certains commandemens ou aiens de li cause puissent recourre de leur autorite aus dites maisons et terres pour nous ensint obligiees et ycelles tenir cultiuer et possider comme leur propre heritaige jusques a ce que paie et satisfacion soit faite entierement audit Perrin ou a ses hoirs de la dite cense et de touz interest qui s'en pourrient ensuir Promectans pour nous et noz hoirs par noz seremens pour ce donnes corporelment sur sains euuangilles de Dieu et sus l'obligacion de touz noz biens mobles et non mobles presens et auenir quelx qu'il soient toutes les choses dessus dites et vne chascune d'icelles par la maniere que dessus sunt diuisees faire tenir garder et acomplir firmement senz corrumpre et senz venir encontre par quelque maniere que ce soit taisiblement ou en appert par nous ou par aultre ou temps a auenir et la dite cense paier chascun an de nous ou de noz hoirs audit Perrin ou a ses hoirs aus termes et pour la maniere que dessus est dit et diuisiez Renuncens de nostre certainne science par noz seremens et soubz l'obligacion dessus diz a toutes excepcions decepcions barres fintes aides cauillacions et raisons tant de droit comme de fait qui contre la teneur de ces presentes lettres pourroient estre dites ou obicies et meismement au droit qui dit que generaulx renunciacion ne vault Et quant es choses dessus dites mieulx firmement faire tenir garder et acomplir vuillons estre controins auxi comme de chose adiugie par la court monseigneur le duc de Bourgoingne a la jurisdicion de la quelle court nous submectons nous noz hoirs et touz noz biens et de noz hoirs En tesmoingnance de la quel chose nous auons requis et obtenu le seaul de la dite court estre mis en ces presentes lettres C'est fait en la presence de Huot de Saulon clerc coadiuteur de monsieur Hugue Poissenot prestre notaire de Diion de monsieur Richart Misardje de Diion prestre et de Girart Moreaul d'Auxonne tesmoins à ce appellez et requis l'an le jour et le mois dessus diz