Charter Document - 05360020

En nom de Nostre Seigneur amen L'an de l'incarnacian d'icelli courant mil troiscens soixante dixnuef le vnzieme jour du mois de mars nous Jehan de Maroilles clerc Lambert de Saint Miel demeurant a Diion et Perrenote femme de feu Estienne Fremiot de Diion executeurs et en nom de executeurs du testament ou darreniere voulente de feu le dit Estienne Fremiot faisons sauoir atous ceulx qui verront et orront ces presentes lettres que comme le dit feu Estienne ait en son dit testament ou darreniere volente entre les autres choses laissie et donne la some de deux cens frans de bon or et de juste pois du coing du Roy nostre seigneur pour fonder vne chapellenie perpetuelle de trois messes la sepmainne pour le remede de l'ame de lui et de ses deuanciers a fonder au regart et ordonnance de nous les diz executeurs si comme il appert parmi certainne clause contenue ou dit testament insere en la publicacion d'icelli de la quelle publicacion la teneur est escripte en la fin de ces presentes Il est ainssi que nous les diz executeurs volens de nostre pouoir acomplir la volente et ordonnance dudit testateur fondons et ordonnons la dicte chapellenie perpetuelle en l'eglise du monastiere de Saint Estienne de Diion Pour la fondacion et dotation de la quelle chapellenie nous auons baillie et deliurey et par ces presentes baillons et deliurons perpetuelment realment et de fait en la presence du coadiuteur et des tesmoins cy apres nommez aux prieur et couuent dudit monastere cent et cinquante frans de bon or du coing du roy nostre seigneur et de juste pois pour conuertir et emploier en rentes perpetuelles pour la dicte fondation Item deux frans d'or et demi de rente ou cense annuelle et perpetuelle qui deuz estoient audit feu Estienne Fremiot sur la moitie par indeuis de vne maison fons mex et appertenances d'icelle assise a Diion en la rue des Grans Champs decoste le mex messire Hugue Aubriot de Diion cheualier d'une part et le mex et maison des hoirs de feu Esteuenin Paignot d'autre part de la quelle maison fons mex et appertenances dessus confinee l'autre moitie par indiuis est et appartient a Jehannote niepce dudit feu Estienne ensemble deux frans et demi de cense perpetuelle deuz chascun an ala dicte Jehannote sur ycelle moitie Item baillons et deliurons aux diz prieur et couuent deux frans et demi de cense perpetuelle assis sur trois chambres qui sont dariers la dicte maison deuers la Tournelle Des quelx deux frans d'or et demi de cense sur la moitie par indiuis de la dicte maison et des autres deux frans d'or et demi sur les dictes chambres nous deuestons nous et les hoirs dudit feu Estienne et les diz prieur et couuent au proffit de la dicte chappellenie en reuestons perpetuelment pour eulx et leurs successeurs par la teneur de ces presentes lettres et leur transportons tout le droit action et raison que nous auons en nom que dessus et que le dit feu Estienne auoit en la dicte moitie de la dicte maison et en la dicte cense de deux frans d'or et demi qui li estoient deuz sur ycelle moitie et es dictes chambres en la dicte cense de deux frans d'or et demi deuz sur ycelle comme dit est sauf tousiours et reserue a la dicte Jehannote sa moitie par indiuis en ycelle maison fons et appertenances d'icelle et les deux frans d'or et demi de cense perpetuelle qui li sont deuz sur ycelle Et parmi ces choses les diz religieux prieur et couuent seront tenuz celebrer ou faire celebrer perpetuelment chascune sepmene en leur eglise trois messes pour le remede de l'ame dudit Estienne et de ses deuanciers et successeurs Promettens nous les diz executeurs en nom que dessus par noz seremens pour ce donnes corporelment aux sains euuangiles de Dieu et soubz l'obligacion de touz les biens de la dite execucion toutes les choses contenues en ces presentes lettres tenir perpetuelment sens jamaiz contreuenir et renuncons en ce fait atoutes excepcions ad ce contraires Et quant ad ce tenir et acomplir nous les diz executeurs par nom que dessus voulons estre contrains ainsii comme de chose adiugie par la court de monseigneur le duc de Bourgoingne a la juridicion et contrainte de la quelle court quant ad ce nous submettons et obligeons les hoirs dudit feu Estienne et touz les biens de la dite execucion meubles et nonmeubles presens et auenir quelconques la teneur de la publicacion dudit testament sensuit de mot a mot en ceste forme A tous ceulx qui verront et orront ces presentes lettres nous Guillaume Plue lieutenant a Diion de honorable saige et discrete personne monsieur le chancellier de Bourgoingne faisons sauoir que comme par vertu de mandement donne du dit monsieur le chancellier et d'office aient este adiournez a Diion par deuant le dit monsieur le chancelier ou son lieutenant au mardi aprez la feste de l'assumpcion nostre Dame Hugue Fremiot de Diion et Jehannote fille feu Jehan du Nuefchastel femme Jehan de Maroilles clerc demeurant a Diion hoirs ne feu Estienne Fremiot de Diion messire Diemonche de Monfort prestre demeurant a Diion Lambert de Saint Mier ledit Jehan de Maroilles et Perrenote femme de fu dudit Estienne executeurs ordonnez et establiz ou testament d'icelli feu Estienne cestassauoir la dicte Jehannote ensemble l'auctoritey de son dit mary et son dit mary pour donner a elle auctoritey de plaidoier se mestier est et mesmement les diz hoirs pour approuer ou jmpugner le dit testament ou pour accepter ou repudier la hoierie dudit feu Estienne et les diz executeurs pour pranre en eulx ou recuser la charge de l'execucion du testament d'icelli feu Estienne cellui jour se comparurent en jugement a Diion par deuant nous les diz hoirs et executeurs et en la presence d'eulx feisme lire le dit testament judicialment par deuant nous contenent la forme qui s'ensuit [] Lequel testament ainsi lehu judicialment par deuant nous comme dit est nous d'icelli feismes et faisons publicacion en et par la maniere qu'il est acoustumez a faire en la court de la ditte chancellerie Et apres ce fuit requis et demande de par nous au dit Hugue Fremiot se il vouloit approuer ou jmpugner ledit testament et se il vouloit accepter ou repudier la hoerie dudit feu Estienne li quelx nous respondit que en aucune maniere jl ne vouloit jmpugner ledit testament mais ycelli approuer et accepter la hoerie d'icelli feu Estienne en tant comme illi en competoit et ne vouloit point venir encontre l'ordonnance et voulente dudit feu Estienne et semblablement fut requis et demande a la dicte Jehannote de par nous se elle voloit approuer ou jmpugner le dit testament et si elle vouloit accepter ou repudier la dite hoerie li quelle Jehannote de l'auttorite dudit Jehan son mari et lidiz Jehans son mari pour tant comme il lui tuiche nous demanderent et requirent auoir auis sur ce et la dilacion de droit qui en tel cas appartient la quelle nous li auons ottroie et octroions par ces presentes Et ces choses ainssi faites fuit demande et requis de par nous es diz executeurs se il vouloient en eulx pranre la charge de l'execution dudit testament Li quelx nous ont respondu et respondirent judicialment par deuant nous que oil sur la condicion qui s'ensuit C'est assauoir entant comme il viendra a leurs mains des biens demeurant de la succession dudit feu Estienne par benefice de jnuentoire le quel se fera par Guiot le Tanron de Coichey et Hugue de Cirey ou l'un d'eulx les quelx et chascun d'eulx par soy et pour le tout nous y auons commis et commettons par ces presentes a faire le dit jnuentoire et les autres choses a faire le dit jnuentoire appertenantes et necessaires Pour quoy nous confiens du sens leaulte et discrecion des diz executeurs leur auons baillie et deliure et par ces presentes baillons et deliurons la charge de la dite execucion Et li diz executeurs nous ont promis et jure promettent et jurent par leurs seremens et soubz l'obligacion de tous leurs biens meubles et nonmeubles de faire afaire le dit jnuentoire par les commis que dessus ou l'un d'eulx et de faire et acomplir la dite execucion bien et lealment et en rendre bon compte et leal audit monsieur le chancellier son lieutenant et atouz ceulx a qui il appartiendra toutes et quantes fois que mestier sera et requis en seront En tesmoin de ce nous auons requis le seel du quel l'on vse a Diion es causes de la court de la dite chancellerie estre mis en ces presentes lettres faites et donnees le mardi auant la feste de l'assumpcion nostre Dame l'an mil CCC soixandit dix et huit H de Cirey Item s'ensuit la teneur des lettres de la dite cense de mot a mot en ceste forme En nom de nostre seigneur amen L'an de l'incarnacion d'icelli mil troicens soixante quatorse le Ve jour du mois de feuvrier nous Demoingeot de Seles demeurant a Diion et Jehannote sa femme cest assauoir je la dite Jehannote du loux consentement et auctorite dudit Demoingeot mon mary ad ce present et consentant et je li diz Demoingeot quant a ce et les choses cy aprez escriptes faire et acomplir a la dite Jehannote ma femme je ay donne et donne licence puissance et auctorite faisons sauoir a touz ceulx qui verront et orront ces presentes lettres que nous non contrains ne deceuz ne en aucune maniere circonuenuz maiz de nostre bon grez plainne voulentey et pour proffit cuident de nous et de noz hoirs auons retenu et retenons a cense perpetuelle par titre et en non de titre de loy qui est nommee ou appellee emphiteosim de Estienne Fremiot bourgeois de Diion et de Jehannote sa niepce fille de fut Jehan de Chasteauneuf et de vn chascun d'aulx pour tant comme il lui toiche et appartient et en seul et pour le tout vne maison ensemble le fons mex et appertenances le curtil et le troige darriers deuers la tournelle assise a Diion en la rue des Grans Champs de coste le mex messire Hugue Aubriot de Diion cheualier d'une part et le mex et maisons des hoirs feu Estienne Paignot autrement dit Petit Maistre d'autre part Sauf et reserue audit Estienne et Jehannote sa niepce les trois chambres darriers la dite maison Et ceste retenue nous auons fait et faisons pour le pris et somme de cent solz tournois de la monoie vn franc d'or du coing du Roy nostre seigneur de bon or et de bon pois compte pour vint solz tournois vn florin de Florence de bon or et de bon pois pour seze solz huit deniers tournois et vn gros viez tournois d'argent pour vint deniers tournois de annuel et perpetuel cense ou rente par nom de tiltre que dessus rendant et paiant par nous ou les aiens cause de nous ou temps auenir aux diz Estienne et Jehannote sa niepce ou a leurs hoirs chascun an perpetuelment aux termes et par la maniere qui s'ensuit C'est assauoir cinquante solz de la dite monnoie a la feste de la natiuite nostre seigneur et cinquante solz d'icelle monnoie a la feste de la natiuite saint Jehan Baptiste et commencera le premier paiement dudit annuel et perpetuel cense ou rente a la feste de la natiuite nostre seigneur proichain venans Pour quoy nous sommes tenuz de conuenances et promettons pour nous et pour noz hoirs et vn chascun de nous en seul et pour le tout mesmement je la dite Jehannote du loux consentement et auttorite que dessus par noz seremens pour ce donnes corporelment aux sains euuangilles de Dieu et soubz l'obligacion de touz noz biens meubles et non meubles presens et auenir quels qui soient le dit annuel et perpetuel rente ou cense rendre paier bailler et deliurer aux diz Estienne et Jehannote sa niepce et a leurs hoirs ou les aiens cause de leur ou temps auenir chascun an perpetuelment aux termes et par la maniere dessusdiz et diuisee et la dite maison et appertenances bien et loyalment edifier et maintenir en bon estat par nom et tiltre que dessus a noz despens et missions et ycelle maison fons mex curtil et appertenances ne pourrons ne deurons par conuenances expresses vendre aliener permuer ne mettre en aultre main se n'est de la licence grey voulente et consentement des diz Estienne et Jehannote sa niepce et de chascun d'eulx mas la dite maison fons mex curtil et appertenances obligons especialement et expressement aux diz Estienne et Jehannote et a vn chascun d'eulx pour le dit annuel perpetuel cense ou rente Voulons et ottroyons que lidiz Estienne et Jehannote sa niepce leurs hoirs ou les aiens cause d'eux ou temps auenir a la dite maison mex curtil et appertenances de leur propre auctoritey comme a leur propre heritaige ou cas que nous deffraidriens de paier le dit annuel et perpetuel rente ou cense puissent recourre yceulx et possider les fruiz yssues et emolumens faire leurs mettre conuertir et tourner en leur proffit jusque atant que paie et entiere satisfaccion soit fait aux diz Estienne et Jehannote ou aus aiens cause d'eulz ou temps auenir dudit annuel et perpetuel cense ou rente de touz arraiges de touz coux missions despens interest pour ce par eulx faiz soustenuz ou encouruz Renuncens en ce fait de nostre certainne science vn chascun de nous en seul et pour le tout mesmement [je la dicte] Jehannote du loux consentement et auctorite que dessus atoutes excepcions et atout droit escript et nom escript canon coustumier et ciuil a toutes excepcions de mal de barat de deception a l'action en fait a la condicion sens cause ou senz juste cause a toute lesion circonuencion grief errour [] droiz et a toutes loix par les quelx les contraulx et besoingnes sont rescindees quant il appert les contrahens estre bleciez en aucune maniere ou deceuz atoutes constitucions status ordonnances graces lettres et priuileges empetres ou empetrer donne ou adonner de quelconque prelat ou prince que ce soit atouz droiz escripz et non escripz introduz en la faueur des femmes et atoutes autres exceptions deceptions barrez futez cauellacions allegacions et raisons que l'an pourroit dire proposer ou obicier par quelque voie ou maniere que ce soit contre la teneur de ces presentes lettres ou aucunes des choses dessus dites et au droit disant general renunciacion non valoir se l'especial ne precede Et quant a tenir garder et acomplir fermement toutes les choses dessus dites et vne chascune d'icelles nous voulons cest assauoir je la dite Jehannote de l'autorite que dessus estre contrains et noz hoirs ainsi comme de chose adiugie par la court de le duc de Bourgoingne a la jurisdicion et cohercion de la quelle court quant ad ce nous submettons nous et noz hoirs et les aiens cause de nous et tous noz biens quelconques En tesmoin de la quelle chose nous auons requis et obtenu le seel de la dite court estre mis a ces presentes [Lettres faites en la] présence de Jacot de Fontaines coadiuteur de Andrie de Faanai notaire de Diion de messire Jehan du Dongeon prestre et de Perrenot Coustain de Diion tesmoins ad ce appellez et requis l'an et le jour dessus diz En tesmoing des quelx choses nous [Jehan de Maroilles Lambert de] Saint Miel et Perrenote de Longeaul executeurs dessus nommez auons requis et obtenu le seel de la dite court monseigneur le duc estre mis a ces presentes lettres Cest fait par deuant Guillemot Girart de Diion clerc coadiuteur de Andrie de Faanay [notaire de Diion] pour mon dit seigneur le Duc Presens Ythier Arnoulot de Flurey et Michelot Rouhier de Rouure clers demeurant a Diion tesmoins ad ce appellez et especialment requis l'an et le jour premiers diz