Charter Document - 05321015

In nomine Domini amen Reuerendo in Christo patri ac domino domino Iohanni Dei gratia Lingonensi episcopo fratres Iohannes magister domus Dei de Tile Castro uestre dyocesis Petrus de Uarennis Iohannes de Selongeyo presbiteri Guillermus de Tile Castro Simon de Uarennis Iacobus de Selongeyo clerici Clemens de Tile Castro Hugo de Uarennis et Odo de Escheuanniis conuersi domus Dei predicte ac sorores Ligeneta de Escheuanniis Iaqueta de Auellangiis Arguina de Grossa Silua Ysabellis Hospitalaria Ysabellis de Ycio Uillelmeta de Grossa Silua et Iaqueta de Poissons conuerse domus eiusdem prefate domus Dei et eorum recommendationem cum omni reuerencia obediencia et honore cum secundum canonicas sanctiones episcopo sub cuius moderamine aliqui degunt cure sit causas illorum utilitates que disponere ualde enim indecens est ut obmisso eo alius quilibet se illorum causis ammisceat si ille eorum uitas competenti regularique moderamine dicitur disponere qui per commissis eorum animabus compellitur reddere rationem Et ea propter reuerende pater nos fratres et sorores predicti diligencius attendentes quod bone rei dare consultum et presentis habetur uite subsidium et eterne remunerationis exspectare decernitur premium Considerantes etiam quamuis uirtutum domino seruiamus et quibusdam predecessorum meorum institutionibus et regulis gubernemur tamen ex speciali deuotione sub Beati Augustini ordine habitu et regula per sedem apostolicam appelatis in Dei ecclesia militare affectantes tanquam gloriosum habere patronum ut in uia salutis dirigamur et eius meritis et intercessione ad patriam perducamur eternam ad uicinam et proximam nobis ecclesiam monasterii Prothomartyris Stephani de Dyuione predicti ordinis Sancti Augustini nostre Lingonensis dyocesis quequidem ecclesia Sancti Stephani abbatis regimine gubernata uiget auctore domino Re et fama regularibus obseruatiis et moribus appelatis duxerimus occulos mentis nostre Confidentes rationabiliter et sperantes quod domus nostra predicta cum iuribus et pertinenciis uniuersis que multorum patent insidiis ad quorum malignos impetus repellendos uirtus plena nobis non competit nec facultas si abbatis et conuentus monasterii predicti patrocinio fulciatur ea poterit utilius et salubrius in spiritualibus et temporalibus gubernari quo membrum corporis ipsi corpori uicinoque capiti coniungetur domus enim nostra predicta a predicto monasterio Sancti Stephani Dyuionensis non multum distat sed est proxima et uicina prioratui de Tile Castro in eadem uilla pertinenti ad dictum monasterium pleno iure possessiones nostre predicte domus contigue uicine et commixte sunt possessionibus prioratus predicti ac pro maiori parte et fere omnes infra fines parrochiatus ecclesie Tile Castro constitute sunt eidem prioratui decimales deseruientes que in diuinis officiis tam in dicta domo nostra quam in prioratu predicto sub uno rectore habitu et regula in unum poterunt commorari in utroque loco per unum dispensatorem Deo seruientibus ceterisque fratribus et sororibus ac familiaribus necessariis in temporalibus poterit commode prouideri ac expense pro cultura terrarum et uinearum diminui poterunt et fructus uberius habundare Dissensiones quoque que plerumque inter nos inuicem fuerunt tam super prestatione decimarum quam limitatione et diuisione terrarum nostrarum sopientur omnino si dicta domus predicto monasterio uiuatur et nos qui interdum usque nunc discordes fuimus amodo cum Dei adiutorio uiuemus unanimes et concordes uerum predicta domus nostra propter sterelitates fortuitas grauesque oppressiones et uarias et pecudum mearum et animalium mortalitatem et pestem a Deo est diuersis creditoribus in magnis debitis obligata quod per nos uix aut nunquam poterit liberari seu caritatis opera uel hospitalitas in ea more solito exerceri Timebunt etiam uolentes delinquere se tantum et tam uicinam correctorem habere qui remotum uel alias impotentes minime formidarent Et si forte quod absit delinquerent eorum excessus sine difficultate et dispendio poterint de facili refrenari status etiam in habitus atque mores ordini predicto magis quam alii conueniunt et applaudunt propterea ratio consentit natura dictat sapientis scriptura attestatur quod in habentibus simbolum hoc est similitudinem uel conuenienciam facilior transitus inuenitur nomine cuius similitudinis uel conueniencie carnes comeste in ueritate humane nature citius conuertuntur et corpus humanum melius nutriunt et confortant Igitur cum Beati Augustini regulam concorditer eligamus ut ex bonis opibus finaliter coronemur uirtuosaque opera delectabiliter prosequamur ac seruicium nostrum Domino acceptetur et consensu libero non coacto Deo quodam spirituali matrimonio copulemur atque a nostris opibus anxietas et tristicia precindantur quibus mediantibus humana opera deprauantur et ut nos iocundius Domino seruiamus paternitati nostre reuerende quantum deuotius possumus tenore presentis instrumenti uoto unanimi humiliter supplicamus quatenus nostro predicto proposito fauorabiliter annuentes predictam domum nostram cum suis bonis iuribus appendenciis et pertinenciis uniuersis tanquam membrum corpori et capiti predicto monasterio Sancti Stephani Dyuionensis annectere incorporare et subicere de consensu uestri capituli Lingonensis dignemini ac uelitis ita quod sub Beati Augustini ordine habitu et regula nos et successores nostri possimus in perpetuum Domino famulari et sub abbatis ipsius monasterii et successorum eius regimine regulariter uiuere et in spiritualibus et temporalibus gubernari Credimus enim firmiter et indubitanter speramus quod in predicta domo nostra cum adiutorio Dei et abbatis dicti monasterii qui pro tempore fuerit diligencia melius et honestius obseruabitur religio hospitalitas uberius tenebitur et fient orationes et elemosine ac diuina officia habundancius et frequentius in eadem statusque nostri mutatio que quorumdam annos exasperare solet ex eo quo domnium aditus difficiles comprobantur et natura mutationes refugit repentinas et assueta que cum difficultate maxima deseruntur nobis tolerabilior et animabus utilior appareret insuper quia libant Domino prospera qui ab afflictis pellit aduersa si indilate faciatis predictam unionem annexionem et incorporationem nobis uoluntariam acceptabilem atque gratam et impediatis omnem aliam coniunctionem nobis grauem anxiem et molestam fructum eterne glorie non immerito poteritis adipisci Supplicamus etiam dominis decano et capitulo Lingonensibus ut in unione annexione et incorporatione predictis dignentur fauorabiliter consentire Sane reuerende pater predicte quod nos omnes fratres et sorores prefati ad uos aut ad dictos decanum et capitulum Lingonenses possumus commode personaliter accedere ad supplicandum super premissis uobis ac decano et capitulo supradictis idcirco nos uniuersi et singuli prenominati fratres et sorores dominum Iohannem magistrum domus nostre prefate et fratrum Hugonem de Uarenniis conuersum domus eiusdem predictos et eorum quemlibet insolidum itaquod non sit melior conditio occupantis procuratores nostros facimus et ordinamus ad presentandum uobis et predictis decano et capitulo nostro nomine atque suo supplicationem predictam et ad faciendum omnia alia et singula que in premissis et circa premissa necessaria et opportuna fuerit et quid nos faceremus si presentes coram uobis et predictis decano et capitulo essemus ita quod ipsi procuratores aut alter eorum generalem et liberam administrationem habeant seu habeat in hiis omnibus quo ad personas nostras quantum ad premissa et quodlibet premissorum qualitercumque pertinere noscuntur Promittentes bona fide nos ratum et gratum perpetuis temporibus habituros quicquid per dictos procuratores uel eorum alterum impremissis aut circa premissa factum fuerit seu etiam procuratum ceterum ut uos reuerende pater et uos decanum et capitulum prefati euidencius cognoscatis nos et quemlibet nostrum in premissis omnibus et singulis consensisse et in hanc supplicationem existere unanimes et concordes Presens instrumentum continens factum et seriem predictam supplicationis nostre uobis per predictos procuratores nostros aut eorum alterum duximus transmittendum ac etiam presentandum quod quidem instrumentum per Guidonem de Uergeyo tabellionem publicum qui premissis dum per nos agerentur interfuit una cum infrascriptis testibus scribi et publicari rogauimus in testimonium et certitudinem omnium premissorum Actum in capella nostre predicte domus nobis ibidem propter hoc ad sonum campane more solito congregatis presentibus discretis uiris Bartholomeo de Luco maiore de Tile Castro Regnaudo matricularii Gileto carnificis eiusdem loci de Tile Castro Odone dicto Chardin de Dyuione Lingonensis dyocesis testibus ad predicta uocatis et rogatis anno Domini millesimo trecentesimo mense decembris die uicesima quarta uidelicet die Sabbati ante Natiuitatem Domini pontificatus sanctissimi patris Bonifacii diuina prouidencia pape octaui anno sexto