Charter Document - 05320015

Uniuersis presentes litteras inspecturis Iohannes miseratione diuina Lingonensis episcopus salutem in Domino Noueritis nos supplicationem Iohannis rectoris domus Dei de Thile Castro nostre Lingonensis diocesis necnon fratrum et sororum eiusdem domus super unione annexione et incorporatione predicte domus Dei faciendis a nobis cum monasterio Sancti Stephani Dyuionensis ordinis Sancti Augustini dicte dyocesis recepisse in hunc modum [] Et ego Guido de Uergeyo clericus Eduensis dicte sacrosancte Romane ecclesie auctoritate notarius publicus predictis omnibus dum per prefatos magistrum fratres et sorores congregatos ad sonum campane in dicta capella agerentur prout supra legitur una cum predictis testibus uocatus interfui et hoc presens instrumentum exinde confectum manu propria scribsi in hanc publicam formam redegi signoque meo signaui a supradictis magistro fratribus et sororibus Nos igitur episcopus supradictus considerantes attente tam pie supplicationis affectum et iteratis intimorum cogitatibus reuoluentes per quum infirmi accinti robore spiritum fortitudinis uolunt assumere regulisque laxioribus insistantes artiorem uoluntarie siciunt disciplinam et iugo Domini magis subieciunt colla sua attentesque quia decet domum Domini sanctitudo et insuper pastoralis officii cura nos ammonet ut bene agentes etiam ad melius inducere studeamus uolentes eorum supplicationum et proposito laudabili benigne exauditionis gratiam aperire recolentes in doctrinam apostoli dicentis Nemini cito manum imponas cum debita maturitate in dicto negocio procedere cupientes longa deliberatione pluries habita comperitis causas propter quas ad predictas unionem annexionem incorporationem procedere debemus examinari per multos doctores regentes Parisuis in iure et per plures alios iuriperitos decreuimus diligenter et tandem post multos tractatus habitos cum uiris uenerabilibus et discretis decano et capitulo Lingonensibus et collatione diligenti habita pluribus diebus ad hoc specialiter assignatis super examinatione causarum predictarum et consilio super predictis nobis de Parisuis reportato supplicationem eorumdem rectoris fratrum et sororum domus Dei de Tile castro predicte tam per procuratores prefatos quam per se ipsos personabiliter cum instancia nobis factam et pluribus iteratam prefati rectoris sepe dicte domus Dei spontanea et libera resignatione ipsius domus a nobis recepta iustis de causis in eorum supplicatione consentis quos agnouimus esse ueras duximus admittendam eorumque proposito laudabili et pie supplicationi fauorabiliter annuentes predictam domum Dei de Tile castro cum omnibus bonis membris pertinenciis et appendiciis eiusdem predicto monasterio Sancti Stephani Dyuionensis in nomine Patris et Filii et Spiritus Sancti auctoritate et potestate ordinaria de uoluntate et assensu expresso uirorum uenerabilium decani et capituli Lingonensium in perpetuum unimus anectimus coniungimus incorporamus subicimus in spiritualibus et temporalibus pleno iure retentis nobis et successoribus nostris Lingonensis episcopi in futurum iuribus episcopalibus ut inferius declarantur Mandantes omnibus fratribus et sororibus dicte domus ut in omnibus abbati monasterii Sancti Stephani predicti qui pro tempore fuerit tanquam patri et superiori obediant pariter et intendant et omnino moribus et habitu dicto monasterio se conforment ac omnibus aliis prout ad eas spectare dignoscitur ut de omnibus prouentibus et exitibus dicte domus et pertinenciarum eius dicto abbati respondeant Committentes eidem abbati pro se et suis successoribus auctoritate presencium administrationem dicte domus membrorum bonorum et pertinenciarum eiusdem in spiritualibus et temporalibus ipsum in possessionem dicte domus auctoritate ordinaria inducentes iuridictione institutione destitutione correptione reformatione uisitatione et procuratione ac aliis iuribus episcopalibus nobis et nostris successoribus semper saluis Saluo etiam iure uirorum uenerabilium decani et capituli ecclesie Lingonensis archidiaconi et decani christianitatis Dyuionensis et persone alterius cuiuscumque prout hactenus habuerunt et etiam perciperunt Uolumus autem et precipimus quod in dicto domo diuina officia studiose et sollicite celebrentur et hospitalitas pauperum ad quam precipue locus ille fuisse dignoscitur institutus infirmorum etiam et aliarum personarum miserabilium ac aliorum transeuntium teneatur et plene exerceatur ad quam tenendam et obseruandam in perpetuum locum illum uolumus specialiter obligari ac alia caritas opera impendantur absque diminutione aliqua prout hactenus fieri consueuit et quod abbas qui pro tempore fuerit in predicta domo personas ydoneas continue tenere pertinet ad seruiendum Deo et ad hospitalitatem tenendam et debita suffragia offerendum pro animabus illorum qui dictam domum fundauerunt et dotauerunt quibus uite necessaria dictus abbas congrue subministret Ordinamus etiam et statuimus ad declarationem iuris nostri quod electus in abbatem Sancti Stephani predicti postquam fuerit confirmatus infra tres menses iusto impedimento cessante ad nos et successores nostros episcopos Lingonenses pro tempore uenire personaliter teneatur curam et regimen dicte domus Dei a nobis aut successoribus nostris predictis sine difficultate aliqua recepturus saluis iuribus supradictis Et si infra predictum tempus trium mensium iusto cessante impedimento ad episcopum Lingonensem uenire distitulerit negligenter curam et regimen dicte domus Dei de Tile castro spiritualium et temporalium petiturus illa uice eidem domum de rectore episcopo prouidebit et instituet unum canonicum regularem ordine Beati Augustini ita quod in aliis uacationibus postea frequentibus abbati qui pro tempore fuerit et predicta seruauerit et impleuerit non fiet aliquod preiudicium nec dicto monasterio in futurum quandocumque autem monasterium predicti Sancti Stephani abbate uacare contigerit episcopus Lingonensis qui pro tempore fuerit unum de canonicis dicti monasterii Sancti Stephani sacerdotem in predicta domo ponet et instituet qui taliter institutus spiritualia et temporalia gubernabit quousque abbas assumptus postea confirmatus curam et regimen dicte domus recepit ab eo qui pro tempore fuerit episcopo Lingonensi cum autem curam et regimen dicte domus recepit idem abbas canonicus institutus a nobis uel successoribus nostris de temporalibus preceptis uacationis tempore eidem abbati reddet integraliter rationem nobis uero aut episcopo Lingonensi qui pro tempore fuerit ante et post quocienscumque requisitus fuerit ac spiritualibus respondebit Et si ecclesiam Lingonensem prelato uacare contigerit predicta potestas ponendi et instituendi canonicum uacationis tempore ad capitulum Lingonensem deuoluetur et post modum creato episcopo per eundem episcopum committetur cura et regimen dicte domus ipsi abbati sine difficultate aliqua prout superius est expressum et dictus abbas qui pro tempore fuerit pro tempore sui regiminis ab episcopo Lingonensi qui pro tempore fuerit requisitus reddet rationem eidem episcopo pro spiritualibus et temporalibus dicte domus que tenebit ab eodem episcopo et sibi subrettus erit prout de alia spiritualitate et temporalitate monasterii predicti consueuit subici episcopo supradicto et eidem episcopo tenetur super hoc respondere et de administratione dicte domus rationem reddere competentem In cuius rei testimonium sigillum nostrum una cum sigillo dictorum decani et capituli presentibus litteris duximus apponendum Et nos decanus et capitulum predicti omnia et singula supra dicta prout superius sint expressa que de uoluntate et expresso consensu nostro per predictum dominum episcopum recognoscimus et asserimus esse facta statuta precepta et ordinata capitulo nostro ad hoc specialiter more solito congregato rata et grata habentes eadem laudamus ac etiam appelamus In cuius rei testimonium sigillum nostrum una cum sigillo predicti Domini episcopi presentibus litteris duximus apponendum Actum et datum anno Domini millesimo trecentesimo primo die uicesima septima mensis maii uidelicet die Sabbati post festum Penthecostem indictione quarta decima pontificatus sanctissimi patris Domini Bonifacii pape VIII anno VII