Charter Document - 05320025

Uniuersis presentes litteras inspecturis nos frater Hugo abbas Sancti Stephani Dyuionensis totusque conuentus eiusdem loci ac frater Hugo gardianus totusque conuentus Fratrum Minorum Dyuionensis notum facimus quod cum inter nos abbatem et conuentum predictos Sancti Stephani ex una parte et nos gardianum et conuentum prefatos Fratrum Minorum ex parte altera discordia uerteretur super eo uidelicet quod nos abbas et conuentus prefati a gardiano et fratribus predictis petebamus seu petere intendebamus uirtute cuiusdam constitutionis a sanctissimo patre nostro Bonifacio papa octauo nuper edite canonicam portionem legatorum singularium ceteris fratribus dicti conuentus relictorum et in posterum legandorum Item quartam partem legatorum conuentui dictorum fratrum generaliter relictorum a pluribus personis parrochianis nostris post dicte constitutionis promulgationem in ipsorum fratrum cymiterio inhumatis specificandis et nominandis coram arbitris inferius scriptis necnon portionem canonicam omnium oblationum et obuentionum que occasione sepulture dictorum funerum predictis fratribus obuenerunt de quibus premissis gardianus ac fratres predictis nobis satisfacere recusarunt licet super hoc pluries requisiti Preterea super hoc quod prenominati fratres quoddam funus de parrochiatu nostro coram arbitris loco et tempore declarandum quod elegerat ut asserunt dicti fratres in eorumdem cymiterio sepeliri in suo dicto cymiterio inhumarunt nulla representatione dicti funeris facta in sua ecclesia parrochiali prout decet et in uilla Dyuionis hactenus extitit consuetum in nostri preiudicium et iacturam et approbate consuetudinis corumptelam Et ex aduerso super eo scilicet quod nos gardianus et fratres predicti petebamus a prefatis abbate et conuentu Sancti Stephani tria funera cum obuentionibus inde perceptis nobis restitui coram arbitris nominanda in suis cymiteriis nobis contradicentibus inhumata et quod apud nos suas elegerant sepulturas in ipsorum defunctorum et nostri preiudicium et grauamen Necnon super quibusdam aliis loco et tempore declarandis nos abbas et conuentus predicti ex parte una et gardianus et conuentus prefati ex alia super premissis omnibus et singulis premissorum ac super omnibus actionibus discordiis questionibus et querelis inter nos exortis et habitis necnon super omnibus dubiis constitutionem ipsam contingentibus quo ad sepulturarum articularum a dictis partibus proponendis concorditer et unanimiter compromisimus in religiosos uiros et discretos fratrem Poncium priorem prioratus de Mirabello et in fratrem Petrum Corbetom lectorem Fratrum Minorum tanquam in arbitros seu amicabiles compositores dantes et concedentes eisdem arbitris potestatem cognoscendi declarandi et diffiniendi super predictis et quolibet premissorum diebus feriatis et non feriatis sedendo stando in scriptis uel sine scriptis pronunciare Tenebuntur autem dicti arbitri ante omnia iurare quod articulos claros et liquidos quam citius commode poterunt terminabunt articulos non dubios infra festum Purificationis Beate Uirginis proxime uenturum usque ad quod festum potestatem eorum uolumus durare requisito peritorum consilio pro iuribus declarabunt Statutum est etiam inter nos quod prefati arbitri super premissis et singulis premissorum possunt pronuntiare terminare et etiam diffinire partibus presentibus uel procuratoribus earumdem seu altera parte presente uel procuratore eiusdem alia parte uel procuratore ipsius per contumaciam absente Promittimus etiam bona fide nos partes predicte quod super hiis que premissa tangunt interrogate ab arbitris non occultabimus ueritatem Promittentes etiam bona fide et sub uoto religionis nostre nos omnia predicta quousque super ipsa constitutione per sedem apostolicam aliud fuerit ordinatum seu etiam declaratum rata et firma tenere et inuiolabiliter obseruare Alioquin nos abbas et conuentus predicti obligamus nos predictis gardiano et fratribus ad penam centum librarum Turonensium super quibus dominum Iohannem dictum Teste presbiterum fideiussorem constituimus ac etiam debitorem Et ego Thomas procurator dictorum fratrum ad penam consimilem me obligo predictis abbati et conuentui et debitorem me constituo principalem si prefati gardianus et fratres contra premissa uel aliquod premissorum uenirent uel in aliquo resilirent Super qua pena commissa nos predicti abbas et conuentus et ego Thomas prefatus uolumus et expresse consentimus per curiam domini officialis Lingonensis tanquam de re adiudicata posse compelli omni exceptione cessante Insuper actum est inter nos quod si dictam penam committi contigerit ab aliqua partium predictarum resiliente in toto uel in parte a terminacione pronuntiatione seu diffinitione predictorum arbitrorum dicta pena applicabitur parti parenti Promittentes nos partes predicte sub pena predicta coram dictis arbitris comparare per nos uel per procuratores ydoneos quocienscunque papa negotium huiusmodi nos duxerit euocari In cuius rei testimonium sigilla nostra presentibus litteris duximus apponenda una cum sigillo uenerabilis uiri et discreti domini officialis curie Lingonensis quod sigillum nos partes prefate et nos Iohannes et Thomas prelibati rogauimus et obtinuimus presentibus hiis apponi cuius officialis prefati iuridicioni quam ad hoc nos Iohannes presbiter et Thomas predicti duximus supponendos Et nos officialis predictus ad supplicationem partium predictarum necnon Iohannis et Thome premissorum de quidem supplicatione nobis constat per appositionem signi Thierrici de Tylicastro clerici iurati nostri cui quantum ad hoc et maiora fidem plenariam adhibemus sigillum dicte curie presentibus litteris apposuimus in testimonium ueritatis Datum et actum die Mercurii post festum Omnium Sanctorum anno Domini millesimo trecentesimo tertio Datum die Mercurii post festum Omnium Sanctorum presentibus Guidone de Sancto Juliano Jacobe de Auxona Othoni de Bretigneyo anno Domini millesimo trecentesimo tertio Thierrici de Tylicastro ita est []