Charter Document - 05199639

Universis sancte matris ecclesie filiis ad quos presens scriptum pervenerit Henricus de Lacy comes Lincoln constabularius Cestrie et dominus de Ros et de Reweynnok salutem in Domino Noveritis nos caritatis contemplatione dedisse concessisse et hac presenti carta nostra confirmasse Deo et beate Marie et abbati et monachis nostris loci benedicti de Stanlawe advocationem ecclesie de Whalleye videlicet illius partis quam prius non habuerant de dono alicuius antecessorum nostrorum et ad quam Petrus de Cestria fuit admissus ad presentationem nobilis viri Iohannis de Lasci comitis Lincoln avi nostri ita quod dicti abbas et monachi nobis in Cristo karissimi de cetero habeant ius patronatus totius predicte ecclesie de Whalleie et capellarum eiusdem ecclesie cum omnibus pertinentiis integritatibus iuribus et libertatibus ad ipsam pertinentibus quantum pertinet ad laicalem donationem tenendo de nobis et heredibus nostris sibi et successoribus suis inperpetuum dictam advocationem sive ius patronatus totius predicte ecclesie de Whalleie cum omnibus prenominatis ad ipsam pertinentibus in puram et perpetuam elemosinam nichil inde nobis vel heredibus nostris faciendo vel reddendo nisi salutaria suffragia orationum Et nos predictus Henricus et heredes nostri dictis abbati et monachis nostris et eorum successoribus dictam advocationem sive ius patronatus predicte ecclesie ut pretactum est contra omnes gentes inperpetuum warentizabimus et defendemus Considerantes etiam oculata fide dictis abbati et monachis nostris nobis in Cristo karisissimis grave periculum imminere ex vicinitate maris quod iam terram ipsorum ex una parte monasterii consumpsit et devastavit et ex alia in proximo est consumpturum adeo quod propter ipsius maris nimias et insuetas inundationes diutinam moram ibidem facere non possunt volentesque quod ad honorem Dei et ipsius sanctissimi cultus augmentum tempore nostro predictis abbati et monachis et eorum successoribus de securitate mansionis provideatur et status eorum tam in numero personarum quam in sustentationis possessione amplietur volumus quantum in nobis est et pro nobis et heredibus nostris concedimus quod dicti viri religiosi pericula maris fugiendo monasterium suum ab eo loco quo per antecessores nostros fundatum est amoveant et in terra dicte ecclesie de Whalleie ubicunque sibi viderint expedire de novo construant et edificent ossa antecessorum nostrorum et aliorum ibidem humatorum per consensum diocesani episcopi secum transferendo et aput Whalleie honorifice recondendo Quia vero quidam antecessorum nostrorum Iohannes de Lasci nomine constabularius Cestrie primus fundator dicte domus mutato nomine de Stanlawe voluit locum benedictum nominari nos predictus Henricus eam transferentes et in loco quieti religiosorum competentiori collocantes volumus quod idem nomen optineat et locus benedictus de Whalleye appelletur Omnesque terras possessiones tenementa iura libertates pasturas et prata et omnia quecunque dicti abbas et monachi habent in feodo nostro ex dono sive concessione alicuius antecessorum nostrorum sive ex dono nostro eisdem et successoribus suis inperpetuum possidenda et habenda confirmamus ut eisdem iuribus feoffamentis et libertatibus gaudeant aput Whalleye per nos translati quibus gaudere solebant aput Stanlawe per predictum Iohannem de Lasci primo fundati In cuius rei testimonium presenti scripto sigillum nostrum fecimus apponi Act aput Pontemfractum anno gratie MCC octuagesimo tertio et anno regni illustris regis Edwardi filii regis Henrici duodecimo