Charter Document - 05190646

Universis Cristi fidelibus presentes litteras inspecturis Rogerus Dei gratia Coventr et Lich episcopus salutem in Domino Cum super exemptione prioratus de Stanes inter Nicholaum priorem et conventum de Kenilleworth ex parte una et fratrem Rogerum de Wygorn tunc priorem de Stanes et canonicos ibidem Deo servientes ex altera aliquotiens fuisset tractatum tandem partes sponte et concorditer super exemptione facienda ac subiectione predicti prioratus de Stanes priori et conventui de Kenill retinenda ordinationi nostre se submiserunt prout in litteris earundem partium sup hoc confectis plenius continetur Nos igitur utriusque prioratus utilitate et religionis honestate pensatis in nomine Domini nostri Ihesu Cristi ordinamus quod prior de Stanes qui pro tempore fuerit libere possit perpetuis temporibus canonicos ad habitum et professionem recipere et de bonis omnibus mobilibus et immobilibus spiritualibus et temporalibus ad prioratum de Stanes pertinentibus de consilio fratrum suorum de Stanes irrequisita voluntate priorum et conventus de Kenill libere disponere quodque prior de Stanes et canonici singuli ibidem Deo servientes et perpetuo servituri liberi sint et exempti ab omni subiectione districtu et potestate prioris et conventus de Kenill inperpetuum hiis duntaxat exceptis quod prior de Kenill qui pro tempore fuerit semel singulis annis prioratum de Stanes visitabit cum vectura decem equorum per duos dies tantum moram facturus et officium suum ibidem rite peracturus nullum canonicorum de Stanes amovendo Nec liceat priori de Kenill de cetero ad prioratum de Stanes aliquem canonicum mittere ibidem moraturum et cum contingat domum de Stanes vacare tantum duo de canonicis de Kenill unacum canonicis de Stanes parem vocem cum duobus senioribus eiusdem loci habentes intersint electioni celebrande Celebrabitur autem electio licentia eligendi petita a priore de Kenill si infra regnum Anglie extiterit vel ab eo qui vices ipsius gerit si extra regnum fuerit et infra octavum diem post petitam licentiam veniant predicti duo canonici ne malitiose retardetur electio Alioquin per canonicos de Stanes libere procedet electio canonicorum de Kenill presentia minime exspectata Preterea in vacatione domus de Stanes prior et canonici de Kenill tanquam patroni per unum canonicorum vel servientum suorum custodiam dicte domus habeant quousque eis de priore provideatur qui inter canonicos moderate procurabitur nec quoad alienationem bonorum suorum de Stanes mobilium et immobilium se intromittere valeat Ad hec ordinamus quod vacante domo de Kenill prior de Stanes si professus fuerit de Kenill et non aliene professionis legitime monitus intersit electioni de priore de Kenill celebrande locum in capitulo et choro quem eius predecessores habere consueverunt obtinendo ratis et perpetuis manentibus donationibus et concessionibus secundum formam cartarum cirografforum necnon et quorumcumque aliorum instrumentorum per priorem et conventum de Kenill domui de Stanes et aliis quibuscumque personis factis Insuper ordinamus quod omnes carte de Kenill que pro domo de Stanes operantur sub sigillo nostro et prioris de Kenill priori de Stanes tradantur et cum opus fuerit carte originales priori de Stanes vel suo certo procuratori ad defensionem domus sue vel ad prosequendum ius ecclesie sue sine dilatione et difficultate liberentur et expedito negotio apud Kenill reportentur Hanc autem ordinationem nostram perpetuis temporibus valituram et duraturam legi fecimus et recitari presentibus de Kenill et de Stanes prioribus et subsequenter in capitulo de Kenill in presentia conventus ad hoc convocati id idem fieri fecimus dictique priores pro se et successoribus suis interveniente ad hoc expresso consensu conventus de Kenill hanc nostram ordinationem sic lectam et recitatam approbaverunt et acceptarunt ac in testimonium acceptationis et approbationis sue postquam sigillum nostrum presenti scripture apponi fecimus sigilla sua apposuerunt Actum die translationis beati Thome martiris anno Domini MCCLX