Charter Document - 05100061

In nomine Domini amen Ex tenore hujus publici instrumenti ad universorum noticiam deducatur quod anno Incarnationis Domini millesimo CCC sexagesimo quarto XXVI die mensis novembris indictione tertia Pontificatus Sanctissimi in Christo patris ac Domini nostri Domini Urbani divina providentiæ Pape quinti anno secundo regnante illustrissimo ac potentissimo principe domino Karolo Dei gratia Francorum rege in mei notarii publici et testium subscriptorum præsentia illustrissimus princeps dominus Philippus quondam filius regis Francorum dux Burgundie una cum domino duce Andegavensi fratre suo domino episcopo Eduensi domino Abbate Sancti Benigni et aliis prelatis nobilibus et aliis quam plurimis personaliter accessit ad ecclesiam Sancti Benigni Divionensis Lingonensis diocesis ante magnum altare dicte ecclesie hora quasi tertia dicte diei prima die sui adventus ad dictam villam Divionensem tanquam Dux et dominus dicti loci Qui quidem dominus Dux coram omni populo ibidem congregato exponi fecit per venerabilem virum et discretum magistrum Philibertum Paillardi consiliarium et cancellarium suum Burgundie quasdam litteras regias inter cetera continentes donationem sibi factam de dicto ducatu Burgundie per bone memorie regem Johannem patrem suum noviter defunctum et confirmationem dicte donationis factam per dictum illustrissimum et potentissimum dominum Karolum Dei gratia Francorum regem fratremque germanum predicti domini Ducis quibus expositis fuit ex parte Johannis dicti Chopillart clerici ibidem præsentis procuratoris et procuratoris nomine Majoris scabinorum et totius communie dicte ville Divionensis requisitum habere copiam predictarum litterarum et specialiter clausularum continentium dictas donationem et confirmationem que quidem copia habenda eidem procuratori et aliis patrie qui habere voluerint liberaliter fuit concessa Deinde ad dictum dominum Ducem accesserunt personaliter Johannes Poisseneti Maior Divionis una cum pluribus scabinorum suorum et plures alii de dicta communia Divionis qui ibidem voluerunt et poterunt interesse Qui humiliter et devote supplicando requisierunt dictum dominum Ducem quod cum ipsi haberent libertates et franchisias sibi datas et concessas ac etiam confirmatas a prædecessoribus suis ducibus Burgundie quas quicumque dux Burgundie jurare et observare tenebatur juxta formam earundem ipse dominus Dux eas jurare et observare placeret nec non eas laudare ac etiam approbare et confirmare et super his dare litteras suas prout prædecessores suis hactenus fecerunt et facere juraverunt Super quibus pro parte dicti domini Ducis habita super hiis ibidem deliberatione cum dicto fratre et venerabili consilio suo per vocem dicti cancellarii sui gallice fuit responsum in hunc modum [] Quibus dictis et expositis per dictum cancellarium predictus dominus Dux pro se juravit ad sancta Dei evangelia in præsentia corporis Christi et præfati Maior et plures de scabinis ibidem præsentes nec non et dictus Johannes Chopillardi procurator et procuratoris nomine dicte communie Divionis tendentes manus ad sanctos juraverunt omnia et singula supradicta et exposita per dictum cancellarium eodem et simili modo quo ipse cancellarius eisdem exposuerat et quod supra continetur De et super quibus omnibus et singulis voluerunt dicte partes quod ego notarius publicus infra scriptus sibi darem et conficerem publicum instrumentum et michi dictum instrumentum de predictis instantissime requisierunt dictus cancellarius pro et nomine dicti domini Ducis præsentis et dictus Johannes Chopillardi procurator et procuratoris nomine dicte communie Divionis quod eisdem concessi Acta fuerunt hec anno die mense hora et loco indictione et pontificatu predictis præsentibus prefato domino Duce Andegavensi domino episcopo Eduensi domino Abbate Sancti Benigni domino Abbate Sancti Stephani domino de Sombernone domino de Couches magistro Johanne Blancheti secretario et consiliario dicti domini Ducis Simone de Chailleyo domicello et pluribus aliis testibus ad præmissa vocatis et rogatis Et ego Johannes Descutigney commorans apud Belnam Eduensis diocesis publicus apostolica et imperiali auctoritate notarius predictis accessioni expositioni requisitioni responsioni et aliis omnibus et singulis supradictis dummodo predicta agerentur et fierent una cum predictis testibus et aliis præsens interfui eaque sic fieri vidi et audivi et in hanc publicam formam redegi signumque meum consuetum apposui huic præsenti publico instrumento manu mea propria scripto et consimili per eadem verba duplicato ad requisitionem predictarum partium in testimonium præmissorum vocatus et rogatus