Charter Document - 05049000

A touz ceus qui ces lectres verront nous Jehan de Monci enquesteur député de par nostre seigneur le roy de France des acquès que les églises et les religieus ont fait en la prévosté de Paris et en resort d'icelle et des fiez qui sunt en main de non nobles faisons assavoir que nous avons eu et receu de religious hommes l'abbe et le couvent du Vau de Sarnay de l'ordre de Cistiaus ou non de nostre seigneur le roy devant dit pour leur acquez depuis cinquante ans et de plus qu'il ont faiz en ladite prévosté et en resort c'est assavoir de IIII arpens de bruyères et de pasturages ou environ séanz entre Chaumuce et les Crèches et de vint et un arpent et un quartier et neuf perches ou environ de terre arable ou terrouer de Sernay qui valent et sont prisié par an de rente seize livre ou là entour soissante et quatre livres de Paris de la finance des quatre années desquex deniers devant diz nous nous tenons pour bien paiez et en quitons lesdiz religious à touzjours sauf le droit de nostre seignour et l'autrui s'il i est En tesmoing de laquel chose nous avons scelé ces lettres de nostre seel qui furent fetes l'an de grace mil trois cenz et un le samedi veille Nostre Dame en marz