Charter Document - 04821122

A touz ceux qui ces lettres verront nous Jehan de Cères trésaurier de Lisieux chevalier et Guillaume de Marcilly [] notre sire le Roy commis et députez de par lui aus choses qui s'ensuient salut Comme nous eussions fait convenir par devant nous le chapitre de l'église de Saint Sepire de Corbueil pour finer à nous pour le Roy de aucuns acques faiz par eux contenanz les choses qui s'ensuient c'est assavoir une meson et soissantesolz de menu cens ou environ qui furent Nicolas l'Orfèvre séanz en la ville de Corbueil item un quartier de vigne séant à Every du lais feu Aubert Minet item un quartier de vigne seant au Viel Corbeil sachent touz que par la vertu du povoir qui nous est commis contenent entre les autres choses ceste clause Item et per personas certas et ad hec ydoneas per vos specialiter deputandas super quo vobis concedimus potestatem secundum instructionem quam super hoc vobis mittimus sub nostro contra sigillo inclusam faciatis levari finencias de acquisitis per ecclesias aut pro ecclesiis in feodis retro feodis allodiis et censibus temporalibus et eciam de acquisitis per personas innobiles in feodis nobilibus que fieri nequeunt absque nostro interveniente consensu juxta instructionem super hoc vobis missam le dit chapitre a finé à nous à vint et trois livres dix et neuf solz Parisis quar des acques faiz par devant [quant] il finèrent à mestre Guillaume de Marcegny à quarante livres Parisis si comme il nous apparut par ses lettres faites sur ce l'an mil et trois cens le jour de la Saint Martin d'iver Et nous apparut aussi par lettres de la date de l'an mil trois cens et cinq que ledit chapitre avoit paié à notre sire le Roy Philippe le Bel que Diex absoille le disième pour lequel il avoit octroié aus églises que par ycel disième paient il tenissent touz leurs acquez faiz du temps passé jusques alors sans faire en jamès finence Laquele somme d'argent je Philippe de Every commis et député de par notre sire le Roy à recevoir lesdites finences cognois et confesse avoir eu et receu dudit chapitre et m'en tien à bien paié et l'en quitte ou non dudit seigneur à touz jourz mais En tesmoing des choses devant dites nous trésaurier chevalier et receveur devant diz pour tant comme à chascun de nous et à noz offices peut touchier et appartenir avons mis noz seaulx en ces présentes lettres qui furent faites l'an de grâce mil trois cens vint et six le mercredi avant la Nativité Saint Jehan Baptiste