Charter Document - 04271111

Ruedolf von gotes genaden Roemischer chuenig alle zeit meraer des reiches allen ewichleich Der ersam man Eberhart probst des muensters ze Sand Ypoliten chom zu unserr kunichleichen gegenwuertichait und pracht fuer ein hantfest di im und seiner chirichen von weilent dem durchlaeuchtigen herzog Fridreichen von Oesterreich verlihen was und pat diemuetichleich und andaechtleich daz wier geruechten von unsern gnaden di selben handfest ze staettigen von wort ze wort uberschriben Der selben hantfest behebnuezz ist so getan [] Da von wier egnanter kuenig Ruedolf genaigt sein den andaech tigen peten des vorgenanten probsts haben geschafft di vorgeschriben hantfest in gesaet werden disen briefen und bestaeten si miltichleich von kuenichleicher guet Darumb dhainen menschen erloubt sei ze prechen dis gegenwuertig schrift unserr bestaettung oder getuerren mit fraeveleicher kuenhait da wider ze sein welicher ez dar ueber taet der wizz sich verfallen in swaere laidigung unsers zorns Und zu zeugnuezz der sache und vestung der ewigen sterk haben wir dise schrift gesterkchent mit insigel unserr majestat Geben ze Wienn an dem neunten kalend des jennaer der achten indicion unsers herren jar dem tausentisten zwaihundertisten und in dem neun und sibenzkistem aber in dem sibenden jar unsers reiches