Charter Document - 04210281

Nos Otto de Haslowe judex prouincialis per austriam Otto de Berhtoltstorf Camerarius Stephanus de Misschowe marschalcus Liutholdus de Chvnringen pincerna austrie vlricus de capella judex prouincialis supra anasum Fridericus de lengenpach Erkengerus de Landeser Otto de Liehtinstein et Fridericus de pettouia Ad vniuersorum tam presencium quam eciam futurorum noticiam cupimus peruenire recognoscentes humiliter et publice profitentes quod etsi princeps magnificus dominus noster karissimus dominus Rudolfus dei gracia Romanorum Rex jnclitus nos suos fideles tunc sibi et Romano jmperio inmediate subiectos multis amplis et variis beneficencie sue donis liberaliter hactenus respexisset in hoc tamen sue liberalitatis eximie thesauros in nos copiofius et exuberancius noscitur effudisse quod prouisionem de duobus dominis siue principibus jllustribus dominis alberto et Rudolfo filiis suis preclaris nobis ac terris austrie Styrie carniole et marchie factam sollempniter apud augustam reseruata sibi tunc temporis super eo plenaria potestate ad nostram ac incolarum terrarum predictarum deuotam instanciam in personam karissimi domini nostri domini alberti ducis et principis gloriosi adhibito sano deliberacionis sue consilio graciose restringere est dignatus Ipsius solius et heredum suorum suaui nos iugo subiciens in ea forma et modo qui in suo Regali priuilegio super eo confecto lucidius continetur Cuius quidem priuilegij nobis exhibiti et monstrati de uerbo ad uerbum talis est tenor [] Nos igitur tantorum beneficiorum nobis a regali clemencia collatorum non inmemores nec ingrati et propter hoc nostre deuocionis et fidei uice reciproca debitum exsoluentes ordinacionem Regiam supradictam in nostrum ac dictarum [terrarum] fauorem commodum et honorem editam et concessam cum deuotis graciarum accionibus acceptamus approbamus recipimus et in ipsam vnanimiter consentimus et nichilominus nos facturos et curaturos quod premissa ordinacio in omnibus suis articulis firmiter obseruetur bona fide promittimus et ad hoc nos eciam fidei dacione ac iuramenti super eo prestiti vinculo obligamus volentes quoque beneplacito Regio in omnibus satisfacere et placere ambobus fratribus dominis nostris alberto et Rudolfo predictis tam nos quam predictarum terrarum incole sub forma et tempore in ordinacione premissa contentis fidelitatis et homagij prestitimus publice iuramentum Post cuius tamen temporis lapsum predicto domino nostro alberto soli et eius heredibus masculis ex ordinacione premissa et iuramento nostro prehabito ligati erimus et a dicto domino nostro Rudolfo liberi et soluti nisi forte dominus noster albertus ordinacionem predictam quatenus ipsum respicit et contingit non attenderet nec seruaret jn quo casu ius domino Rudolfo in concessione terrarum apud augustam primitus acquisitum simpliciter reuiuiscet Nosque per consequens eidem sicut et fratri suo domino nostro alberto predicto ad paris deuocionis et fidei debitum erimus obligatj Demum expresse promittimus quod si sepedictum dominum nostrum albertum et eius heredes masculos dicto domino nostro Rudolfo superstite contingat decedere extunc ipsi domino Rudolfo in omnibus tanquam vero domino nostro perpetuo intendemus Vt autem de premissis omnibus a nobis fideliter obseruandis fides cercior et certitudo fidelior habeatur presentes litteras exinde conscribi et sigillorum nostrorum appensione voluimus communirj Datum Wienne in vigilia beate Margarete virginis presentibus Reuerendo patre domino Gotfrido patauiensis ecclesie episcopo domino Vlrico de Tavuers magistro Chunrado scriba austrie et magistro Benzone jllustris domini alberti ducis supradicti prothonotario Anno domini millesimo ducentesimo octogesimo tercio