Charter Document - 03671018
| Charter Number: | 03671018 |
|---|---|
| Cartulary Title: | The Register of Bishop Quivel. |
| Charter Language: | Latin |
| Charter Origin: | Religious |
| Charter Type(s): | Composition |
| Date: | 1280 |
| Date type: | Internal, A.D., Feast |
| Resource Link(s): |
Reference Document for this Embedded Document |
Charter:
Memorandum quod cum per Inquisicionem in Decanatu de Aylesbere per Magistrum J de Penbrok Commissarium nostrum auctoritate nostra legitime factam compertum esset quod Vicaria Ecclesie de Herpeforde tam tenuis et exilis existerat propter quod Adam ejusdem Ecclesie Vicarius hospitalitatem prout deceret tenere ac alia onera ordinaria dicte Vicarie incumbencia supportare non posset nos Philippus de Sancto Austolo Officialis Reverendi Patris Domini Cantuariensis Archiepiscopi tocius Anglie Primatis in Civitate et Dioecesi Exonie Sede vacante ex speciali potestate nobis a dicto Domino in hac parte commissa Officii nostri debitum exequentes et Porcionem dicti Vicarii augmentare volentes Fratrem Ricardum dictum Jordan Priorem de Otreytone Rectorem Ecclesie supradicte ad diem Mercurii proximam post Festum Beati Michaelis in Majori Ecclesia Exoniensi coram nobis in judicium fecimus evocari raciones si quas haberet quare Porcio dicti Vicarii augmentari non deberet precise et peremptorie ostensurum Quo die dictis Priore et Vicario personaliter in judicio comparentibus coram nobis eedem Partes pacem inter se reformari pocius cupientes quam super augmentacione dicte Vicarie ex Officio nostri debito Sentenciam expectare amicis communibus intervenientibus pro bono pacis inter se composuerunt amicabiliter in hunc modum videlicet quod dictus Vicarius habeat Vicarie nomine perpetuo totum altilagium dicte Ecclesie de Herpeforde et Capelle de Fenotery et totam decimam garbarum in Orientali parte bosci Domini de Herpeforde scilicet decimam tocius Ville de Boghewode cum decima tocius Ville de Stoweforde et cum dominico Domini ex eadem parte bosci ita quod dictus Vicarius amodo non percipiet a dicto Priore quatuor marcas quas ab eo in partem Vicarie sue annuatim percipere consuevit dictus eciam Vicarius dictis Ecclesie et Capelle honeste more solito et debite faciet de serviri onera ordinaria agnoscat et Prior predictus extraordinaria sustentabit Necessariaque relacione hujusmodi in judicio nobis facta nolentes ipsorum pacem seu Composicionem infringere quin pocius fraudis materiam amputare eandem Composicionem ratam habentes pariter et acceptam ipsam auctoritate qua fungimur in hac parte tenore Presencium confirmamus et inter Partes ut premittitur fore exsequendam finaliter pronunciamus In cujus rei testimonium sigillum Officialitatis Exoniensis Sede vacante est appensum Datum Exonie die Jovis proxima post Festum Sancti Michaelis Archangeli Anno Domini Millesimo CC octogesimo