Charter Document - 03671015

Clemens Episcopus servus servorum Dei dilectis filiis Generali Ministro et Fratribus universis Ordinis Fratrum Minorum salutem et Apostolicam benediccionem Quidam temere sencientes et ad sobrietatem sapere nescientes impudenter asserere presumunt quod de Licencia vel Commissione ac Concessione Romanorum Pontificum seu Legatorum Sedis Apostolice vel Ordinariorum Locorum vos sine Sacerdotum Parochialium licencia et assensu non potestis libere predicare populis audire confessiones absolvere penitentes ac penitencias injungere salutares Nos volentes assercionem tam temerariam penitus confutare et elucidare in talibus veritatem deliberacione provida declaramus quod si vobis detur Licencia committatur seu concedatur a Legatis predicte Sedis aut Ordinariorum Locorum ne dum a Romano Pontifice de quo procul dubio est erroneum dubitare an in omnes sine alicujus consensu immo eciam invitis quibuslibet hujusmodi concedere possit potestatem populis Legatis et Ordinariis subjectis eisdem libere predicare potestis audire confessiones absolvere vobis confitentes ac penitencias vobis confitentibus injungere salutares aliorum inferiorum Prelatorum et Rectorum Ecclesiarum ac Sacerdotum Parochialium assensu nullatenus requisito illis casibus exceptia qui de jure consuetudine seu retencione ab eis specialiter facta Sedis Apostolice Legatis et Ordinariis predictis specialiter relinquuntur ad quos non licet vos extendere nisi vobis specialiter committatur Ideoque Auctoritate Apostolica districcius inhibemus ne quisquam super hiis vel eorum aliquo vos vel aliquem vestrum aut eciam confitentes vobis vel ad predicaciones vestras forsitan accedentes contra predicte Declaracionis formam aliquatenus molestare presumat decernentes nihilominus irritum et inane quicquid a quoquam contra Declaracionem et Inhibicionem hujusmodi contigerit attemptari Nulli ergo hominum liceat hanc paginam nostre Declaracionis et Constitucionis infringere vel ei ausu temerario contraire Si quis autem hoc attemptare presumpserit indignacionem Omnipotentis Dei et Beatorum Petri et Pauli Apostolorum Ejus se noverit incursurum Datum Perusia xij Kalendas Julii Pontificatus nostri Anno Primo