Charter Document - 03440345
| Charter Number: | 03440345 |
|---|---|
| Cartulary Title: | Norwich 1289-1299 Volume 41 |
| Charter Language: | Latin |
| Charter Origin: | Religious |
| Charter Type(s): | Provision |
| Date: | 1297 |
| Date type: | Internal, A.D., Calendar |
| Resource Link(s): |
|
Charter:
Radulphus permissione divina Norwicensis episcopus dilectis in Cristo filiis priori et conventui sancte Trinitatis eiusdem loci salutem gratiam et benedictionem Litteras domini pape provisorias quas vobis mittimus inspiciendas nobis fideliter et ilico per latorem presentium remittendas pro Gilberto dicto Lamberd de Lenn clerico nuper recepimus in nulla sui parte viciatas quarum auctoritate nos volentes ut decet mandato apostolico reverenter obedire intendimus predicto clerico de aliquo beneficio ecclesiastico ad vestram collationem seu presentationem in civitate seu diocesi nostra Norwic spectante si quod vacat ad presens vel quam cito vacare contigerit providere cum effectu Et quia ex relatu quorumdam fidedignorum accepimus quod ecclesia de Alderford predicte nostre diocesis ad vestram presentationem spectans ut asseritur de iure et de facto ad presens vacare dinoscitur ipsam auctoritate qua fungimur in hac parte si ita sit alioquin aliud quodcumque beneficium nunc vacans vel quod primum vacare contigerit ad vestram ut premittitur collationem spectans seu presentationem in civitate predicta seu diocesi nostre collationi seu provisioni ad opus clerici supradicti reservamus per presentes vobis inhibentes in virtute obedientie qua tenemini sacrosancte sedi apostolice et nobis eiusdem auctoritate in premissis quatinus contra hanc reservationem nostram predictam ecclesiam conferendo seu ad eam presentando [procedatis] quod in aliis beneficiis ecclesiasticis ad vos spectantibus in forma supradicta cum eorum aliquod primum vacare contigerit inviolabiliter observare volumus et mandamus [ut] nichil omnino attemptetis seu attemptare faciatis quoquo modo quousque clerico supradicto de beneficio ecclesiastico competenti in forma mandati apostolici supradicti per nos provisum fuerit ut est iustum habentes pro constanti quod si contra ea vel eorum aliquod contemptibiliter venire presumpseritis quod per vos minus iuste factum fuerit seu attemptatum pro loco et tempore auctoritate supradicta infirmabimus et in irritum revocabimus vestram inobedientiam canonica districtione cohercendo Valete Dat London octavo kalendas Decembris anno Domini MCC nonagesimo septimo