Charter Document - 03411009

Uniuersis Christi fidelibus presens scriptum inspecturis Dei gratia abbas de Lesnes ejusdemque loci subprior gerens uices prioris de Ledes salutem eternam in Domino Nouerit uniuersitas uestra nos mandatum domini Pape Gregorii noni in hec uerba suscepisse [] Cum igitur tertio con judice nostro ad totam causam legitime excusato mota esset coram nobis questio auctoritate earundem litterarum inter abbatem et conuentum Sancti Johannis Colecestrie ex una parte et Magistrum Willelmum de Lichefeld canonicum Londoniensem ecclesie de Bercqueia rectorem ex altera super ecclesia de Bercqueia quam idem abbas et conuentus ad se pertinere dicebant tamquam sibi ab antiquo in usus proprios concessam et cujus possessione se dicebant contra justitiam spoliatos et esset coram nobis super eadem ecclesia inter partes diutius ligatarum utraque pars tandem super lite predicta inter ipsas mota ordinationi nostre se supposuit liberaliter et benigne Ita quod quicquid circa predictam questionem et litem canonice duceremus ordinandum ratum maneret et firmum et futuris temporibus inuiolabiliter obseruandum Ad quam quidem ordinationem recipiendam et tenendam et bona fide obseruandam prefatus abbas de Colecestria personaliter comparens et ejusdem loci conuentus per fratrem J ejusdem loci priorem ad hoc negotium prosequendum per litteras conuentus specialiter constitutum et prefatus Magister Willelmus personaliter comparens se coram nobis sponte et liberaliter obligarunt subjicientes se quantum ad obseruationem ordinationis nostre inter partes perpetuam jurisdictioni nostre et nostrorum qui pro tempore erunt successorum Nos igitur inspectis instrumentis dictorum abbatis et conuentus non solum ueteribus sed etiam nouis per que didicimus prefatam ecclesiam ipsis in proprios usus per venerabilem uirum episcopum Londoniensem qui nunc precidet et ejusdem loci capitulum saluo tamen jure prefati Magistri Willelmi de nouo fuisse concessam auctoritate commisse nobis delegationis et tamquam illi quorum ordinationi utraque pars se supposuit ita duximus ordinandum ut prefatus Magister Willelmus prefatam ecclesiam de Berqueia in manus nostras resignaret qui secundum quod ordinauimus in manus nostras ecclesiam predictam resignauit liberaliter et benigne Cujus resignatione recepta auctoritate qua fungebamur ordinauimus de mandandum fore domino Londoniensi episcopo vt admissa prefati Magistri Willelmi resignatione prefatos abbatem et conuentum in ejusdem ecclesie corporalem inducat possessionem et quia prefatus Magister Willelmus huic nostre paruit ordinationi quantum in se fuit eandem humiliter acceptando nolentes hanc ejus liberalitatem eidem omnino dampnosam existere auctoritate premissa qua fungebamur disposuimus et ordinando decreuimus ut idem abbas et conuentus prefato Magistro Willelmo annuatim quamdiu uixerit ciuiliter seu etiam naturaliter sexaginta marcas sterlingorum exsoluant Londonie in ecclesia Sancte Trinitatis Canonicorum ad duos anni terminos videlicet triginta marcas infra quindenam Pasche proximo future et xxx marcas infra quindenam Sancti Michaelis proximo uenturi et ita successiue de anno in annum quamdiu uixerit prefatus Magister Willelmus ut predictum est Ita quod quotienscumque prefatus Magister Willelmus diem Pasche expectauerit in tota pecunia pretaxata terminis predictis eidem uel ejus certo procuratori seu nuntio litteras prefati Magistri Willelmi deferenti super prefata pecunie receptione satisfiat et quocumque tempore post Pascha humanitus de se contingat liceat ei de tota predicta summa pecunie condere testamentum uel eandem de eodem anno cuicumque uoluerit assignare Et quia hanc nostram ordinationem perpetuam habere uolumus firmitatem auctoritate premissa qua fungebamur ita decreuimus ordinando ut quotienscumque prefati abbas et conuentus in solutione prefate pecunie loco et terminis superius assignatis facienda defecerint liceat prefato Magistro Willelmo presentiam domini Londoniensis episcopi qui pro tempore erit adire et capitulum Londoniense aut etiam nos et successores nostros qui pro tempore erunt in quos utraque pars consensit in episcopum scilicet Londoniensem tamquam ordinarium et capitulum Londoniense tamquam alias habens ordinariam jurisdictionem in nos tamquam habentes jurisdictionem delegatam et de consensu partium prorogatam ut per episcopum aut capitulum aut nos nostrosque successores diuisim seu conjunctim secundum quod prefato Magistro uidebitur expedire ad predicte pecunie solutionem compellantur per sententias excommunicationis in personam abbatis qui pro tempore erit et personas aliorum de gremio ejusdem monasterii quas prefatus Magister Willelmus duxerit nominandos sollempniter promulganda aut etiam per interdictum monasterii Colecestrie secundum quod ipsi Magistro videbitur expedire Ita quidem quod post primam ammonitionem ipsis factam ex parte episcopi aut capituli aut nostra successorumque nostrorum conjunctim seu diuisim coram episcopo aut capitulo aut nobis successoribusque nostris de plano probatam liceat prefato Magistro Willelmo penam de superius expressis quam uoluerit eligere ita quod nullatenus relaxetur citra quam prefato Magistro fuerit plenaria satisfactum tam in prefata pecunia quam in suo interesse aut quod post primam ammonitionem probatam ut predictum est ipsa ecclesia de Bercquei denuntientur ipso jure priuati ita quod ex tunc cedat predicta ecclesia de Berquei in donationem episcopi Londoniensis qui pro tempore erit et nihilominus prefato Magistro teneantur ad suum interesse quod coram ipso aut capitulo aut nobis conjunctim seu diuisim secundum quod supradictum est per sententias excommunicationis et interdicti consequatur aut etiam coram aliis judicibus a domino Papa delegantis secundum quod sepe dicto Magistro uidebitur expedire et si forte contingat prefatum Magistrum aut ejus procuratorem loco et terminis superius assignatis pro predicta pecunia recipienda non comperere decreuimus ut prefati abbas et conuentus predictam pecuniam deponant consignatam in prioratu Sancte Trinitatis Canonicorum prefato Magistro aut ejus procuratori cum uenerint et pecuniam petierint exsoluendam ut sic possint prefati abbas et conuentus penas superius expressas euitare Et ne contra hanc nostram ordinationem ullo unquam tempore uenire possint inposterum ordinando decreuimus ipsos debere renuntiare rescriptis apostolicis et priuilegiis impetratis et impetratis regie prohibitioni et cuilibet impetrationi necnon etiam cuilibet exceptioni que huic nostre possit obstare ordinationi et ne possint allegare ecclesiam suam per hanc ordinationem et consensum in aliquo fore deceptam et ne possint allegare tempus hostilitatis aut guerre aut per mortem abbatis qui pro tempore erit se esse acephalos aut sub regia potestate constitutos ut eo pretextu antedicta solutio differatur nisi forte dominus rex tempore vacationis fructus ecclesie de Bercqueia occupauerit quod si contingat statim infra mensem a tempore suscepte administrationis maneriorum et prefate ecclesie de Bercqueia computando eidem Magistro satisfaciant ad plenum in omnibus arreragiis sub penis superius expressis et sub forma superius in ordinatione contenta Decreuimus etiam ne possint pretendere quod prefatus Magister Willelmus predictam pecuniam remiserit aut huic ordinationi renuntiauerit nisi per litteras domini Londoniensis episcopi qui pro tempore erit et ejusdem loci capituli hoc probetur Decreuimus etiam ad majorem ipsius securitatem ut huic nostre ordinationi signa sua apponerent et sigilla episcopi Londoniensis et ejusdem loci Capituli eidem apponi procurarent Partes igitur supradicte in nostra presentia sub forma suprascripta constitute hanc nostram ordinationem humiliter acceptarunt et deuote receperunt futuris temporibus inuiolabiliter obseruandam et nos igitur utramque partem ad presentiam domini Londoniensis episcopi ire decreuimus cum processu coram nobis habito ut idem episcopus in hac parte quantum ad hanc ordinationem attinet exequatur In hujus rei testimonium huic nostre ordinationi sigilla nostra apposuimus