Charter Document - 03409417
| Charter Number: | 03409417 |
|---|---|
| Cartulary Title: | Salisbury 1263-1297 Volume 37 |
| Charter Language: | Latin |
| Charter Origin: | Religious |
| Charter Type(s): | Agreement |
| Date: | 1290 |
| Date type: | Internal, A.D., Calendar |
| Resource Link(s): |
Reference Document for this Embedded Document |
Charter:
Universis sancte matris ecclesie filiis presentes litteras inspecturis Nicholaus Longespee rector ecclesie de Lacok Sarum dyoecesis salutem in domino Ad universitatis vestre notitiam tenore presentium volo pervenire quod cum suscitata esset querela inter me et religiosas dominas dominam Iulianam dei gratia abbatissam monasterii de Lacok et eius conventum super tertia parte decimarum garbarum de dominico suo provenientium videlicet de terris suis que iacent in le Hinhoc in Weteleye in Le Langeley Suthbyr in Asseleye in Le Inlonde super Cockeleye et in Monlesham quas infra limites parochie mee de Lacok percipiunt et se percipere debere dicunt abbatissa et conventus supradicte de dono venerabilis domine domine Ele Longespee comitisse Sar matris mee predicti monasterii fundatrices hec tandem ad perpetue pacis fundamentum compositio inter nos amicabilis intercessit Videlicet quod ego quoniam tenuis et exilis sit earum portio decimarum predictarum quas sine gravi detrimento predicte ecclesie de Lacok percipere possunt et habere quoniamque iugis et intensa sit earundem devotio apud deum devote perpendens de voluntate et assensu expresso reverendi patris domini Willelmi dei gratia episcopi ac venerabilium dominorum Symonis decani et capituli Sar pro me et successoribus meis sponte pure et absolute concedo ut dictum monasterium de Lacok et sanctimoniales inibi deo servientes et futuris temporibus serviture habeant percipiant et in perpetuum possideant integre pacifice et inconcusse tertiam partem decimarum predictarum de supradicto dominico suo provenientium sicut a tempore fundationis sue perceperunt et percipiunt in presenti renuntians simpliciter et expresse pro me et successoribus meis omni exactioni prosecutioni et iuri que michi et eisdem competunt in hac parte vel in futurum competere possunt quoquo modo In cuius rei fidem et testimonium presens scriptum sigilli mei impressione munivi Huius rei sunt testes dominus Iohannes de Schryvenham vicarius perpetuus de Lacok Willelmus de Wollesleye vicarius de Kalne Iohannes vicarius de Canyngg Benedictus de Lincoln clericus Willelmus scriptor Iohannes de Herterigg Lambertus de Roscumbe Nicholaus de Rudham et plures alii Datum apud Kalne tertio nonas Septembris anno domini MCC nonagesimo