Charter Document - 03409347

Frater I permissione divina Cant ecclesie minister humilis totius Anglie primas venerabilibus fratribus et coepiscopis Cant provincie suffraganeis ac eorum officialibus salutem et sinceram in domino caritatem Licet dudum fratrem W de Ledebur gerentem se pro priore Maioris Malvern Wygorn diocesis suppriorem precentorem sacristam celerarium et camerarium loci eiusdem propter eorum multiplicatas contumacias et manifestas offensas exigente iusticia excommunicationis maioris sententia innodaverimus eosque in omnibus et singulis ecclesiis ac aliis locis sollempnibus in dicta diocesi undique constitutis nuntiari fecerimus pulsatis campanis et candelis accensis puplice et sollempniter sic ligatos ac inhiberi etiam universis et singulis iurisdictioni Wygorn predicte qualitercumque subiectis ne quis cum eis aut eorum aliquo emendo vendendo comedendo bibendo seu quovis alio communicationis genere nisi in casu a iure patenter expresso sub pena excommunicationis maioris quam in contravenientes in scriptis tulimus presumeret communicare ne ceteri forsan insontes suo contactu nephario inficerentur ex macula quam perniciose et dampnabiliter contraxerunt ipsi tamen qui non re set tantum nomine religiosi censentur in suis rebellionibus et erroribus in ecclesiastice discipline contemptum non absque gravi animarum periculo ac scandalo plurimorum eo hucusque perseverarunt dampnabilius quo ad eorum medelam cogitando ferventius operam impendimus salutarem Quocirca nos eorum statum dampnabilem tam vobis quam aliis bono zelo volentes fieri magis notum ut artius evitentur ab omnibus et pre rubore saltem maturius redeant ad viam salutis cuius ex toto immemores hactenus extitisse verisimiliter presumuntur vobis omnibus et singulis committimus et in virtute obedientie tenore presentium districtius iniungendo mandamus quatinus fratrem Willelmum qui pro priore monasterii memorati se gerit suppriorem precentorem sacristam celararium et camerarium supradictos in singulis ecclesiis cathedralibus conventualibus seu collegiatis parrochialibus ac aliis locis sollempnibus vobis seu vestrorum alicui qualitercumque subiectis per singulos dies dominicos et festivos intra missarum sollempnia coram cleri et populi multitudine faciatis pulsatis campanis candelis accensis excommunicatos puplice et sollempniter nuntiari a denuntiationibus huiusmodi minime desistentes quousque de absolutionis beneficio per nos impenso eisdem in forma iuris vobis omnibus et vestrum cuilibet constiterit evidenter vestris subditis similiter inhibentes sub pena excommunicationis maioris quam ex nunc in contravenientes in hiis scriptis proferimus ne quis cum religiosis predictis seu eorum aliquo emendo vendendo comedendo bibendo seu alias ut premittitur eis vel eorum alicui participando communicare presumat quousque per nos in forma iuris absolutionis beneficium meruerint optinere Ad hec si religiosi predicti in vestris diocesibus seu earum aliqua pensiones seu portiones fructuum vel decimarum eis debitas asserant a quibuscumque personis sub vestro seu vestrum alicuius districtu existentibus seu in parrochiis alienis posse percipere se pretendant seu etiam ecclesias parrochiales possideant vel teneant eis in usus proprios assignatas pensiones portiones ac fructus ecclesiarum huiusmodi parrochialium sub arto sequestro et tuta custodia faciatis servari quousque super relaxatione sequestri huiusmodi mandatum a nobis receperitis speciale ipsos religiosos peremptor[ie] nichilominus facientes citari quod proximo die iuridico post festum beate Margarete virginis ubicumque tunc fuerimus in nostra provincia compareant coram nobis ius si quod habeant speciale quo ad premissas pensiones portiones et ecclesias exhibituri precise et responsuri similiter quare huiusmodi ecclesias parrochiales quas in usus proprios se asserunt optinere non debeamus pronuntiare seu decernere de iure vacantes eisque ex officii nostri debito de personis ydoneis providere Quilibet autem vestrum ei mandato presenti exhibito et inde sub sigillo proprio retenta copia premissa omnia et singula celerius exequatur et de executione facta certificet nos ad plenum et quas pensiones portiones et ecclesias religiosi prefati sibi qualitercumque debitas seu assignatas pretendunt distincte et aperte sub expressione locorum dictis die et loco per suas patentes literas harum tenorem habentes nobis exprimendo rescribat Valete Dat apud Bell[um] xv kl Iulii anno [domini MCCLXX octogesimo tertio ordinis nostre quinto]