Charter Document - 03381041

Henrici dei gratia rex Anglie dominus Hibernie dux Normannie Aquitanie et comes Andegavie omnibus presentes literas visuris vel audituris salutem Noveritis nos fecisse constituisse et ordinasse procuratores nostros et sollempnes nuntios dilectos et fideles nostros venerabilem patrem Petrum Herefordensem episcopum et Iohannem Maunsell prepositum Beverlaci ad tractandum de pace et ad firmandum eandem inter illustrem principem Alfonsum regem Castelle et Legionis et suos heredes ex una parte et nos et heredes nostros ex altera gratum et firmum habituri quicquid per eosdem nuntios vel eorum alterum si eorum alterum quod deus avertat abesse contigerit firmatum fuerit vel etiam ordinatum dantes in solidum eisdem et cuilibet eorum separatim plenam et liberam potestatem tractandi pacem et firmandi eam ut dictum est et iurandi in animam nostram et obligandi per iuramentum nos et heredes nostros si viderint expedire ad servandum omnia que iidem nuntii super premissis duxerint pro nobis et heredibus nostris ordinanda et etiam promittenda In cuius rei testimonium has litteras fieri fecimus patentes Teste me ipso apud Vasatum octavo die Februarii anno regni nostri tricesimo octavo Harum igitur auctoritate literarum pro predicto domino nostro rege et heredibus suis inivimus fedus perpetue amicitie cum illustri domino Alfonso dei gratia rege Castelle et Legionis et heredibus suis isto modo Quod dominus rex Anglie et heredes sui ab hac hora in antea sint amici et imprisii ipsius regis Castelle et heredum suorum contra omnes homines de mundo inperpetuum ita quidem quod idem dominus noster rex Anglie et heredes sui iuvabunt eundem dominum Castelle et heredes suos bona fide cum toto posse suo contra omnes homines de mundo salva fide ecclesie Romane Promittimus etiam et concedimus pro predicto domino nostro rege quod dominus Edwardus primogenitus et heres suus veniat apud Burg suscepturus cingulum militie a prefato rege Castelle et Legionis usque festum beate Marie in augusto proximo venturum Promittimus etiam et concedimus pro prefato domino nostro rege Anglie quia idem rex est cruce signatus quod mittat filium suum Dominum Edwardum ad guerram Navarr cum magna et bona potentia in auxilium Domini regis Castelle et Legionis et si forsitan prefatus Edwardus aliquo iusto impedimento detentus ad guerram Navarr in auxilium prefati regis Castelle et Legionis venire non potuit quod mittat senescallum suum simili modo Promittimus etiam et concedimus pro prenominato domino nostro rege Anglie quod idem rex det operam bona fide erga dominum papam ad convertendum exercitum cruce signatorum ad partes Marrochianas vel Affricanas et si dominus rex Anglie hoc per se potuit impetrare vel dominus rex Castelle et Legionis per se vel per alios hoc idem potuit impetrare quod idem rex eat cum predicto exercitu ad partes prenominatas in societate regis Castelle et Legionis et quicquid lucrati fuerint in dictis partibus inter eos equaliter dividatur Promittimus etiam et concedimus pro sepe dicto domino nostro rege Anglie quod omnia dampna que illata sunt domno Gastoni baronibus militibus et aliis de Vasconia causa predicti domini regis Castelle et Legionis a tempore quo idem Gasto recepit militiam a prenominato rege Castelle et Legionis et fuit eius vascellus sive in castris sive in hereditatibus sive aliis rebus quod omnia ad rogatum domini regis Castelle et Legionis dominus rex Anglie restituat et melioret eisdem et parcat eis de querimoniis omnibus quas habet de eis Et si aliqui illorum de Vasconia aliquid habeant sive in castris sive de villis sive de terris sive de aliis rebus que debent esse domini regis Anglie vel Edwardi filii sui vel ad eos pertineant quod statim restituant ea eidem regi vel Edwardo filio suo In aliis causis que stent iudicio curie domini regis Anglie secundum quod consuevit iudicari cum curia Vasconie et si ipsi voluerint vel non potuerint iudicium sustinere dominus rex Castelle debet rogare pro eis sicut amicus rogat amicum et dominus rex Anglie faciat pro domino rege Castelle et Legion tanquam pro amico Promittimus etiam et concedimus pro sepe dicto domino nostro rege Anglie quod idem dominus rex Anglie faciet cum consilio domini regis Castelle et Legionis in facto Domni Gastonis quoad senescalcium Vasconie similiter et de facto vicecomitis Lemoviensis quod faciat prout videbitur esse honestum Promittimus insuper et concedimus pro sepe fato domino nostro rege Anglie quod idem dominus rex det filiam suam prefato regi Castelle et Legionis maritandam uni ex fratribus suis germanis cui voluerit dummodo idem rex Castelle et Legionis det eidem fratri suo tales divitias ex quibus possit illam honorifice dotare et sustentare secundum quod decebit filiam regis et hoc debet fieri infra annum Et hec omnia fecimus propter multas et bonas rationes et multa alia que illustris rex Castelle et Legionis predictus per se et procuratores et nuntios suos sollempnes Lupum dei gratia Marrochitan episcopum et dominum Garsiam Martini sepe fato domino nostro regi Anglie et heredibus suis concessit prout continetur in scriptis suis sigillis eorum sigillatis