Charter Document - 03360010

Ego Wlstanus Dei gratia Wigorn[ensis] episcopus decrevi sinodum congregare in monasterio sancte Marie in criptis quas ego a fundamentis edificavi et per misericordiam Dei postea dedicavi Hec sinodus habita est anno dominice Incarnationis MXCII indictione xv Ad hanc sinodum invitati convenerunt omnes sapientissime persone de tribus comitatibus nostre dioceseos Wigracestrie Glaucestrie Wareuuiccie Eo quod ego longevus dierum imbecillitatem mei corporis sentiens et finem vite mee iam instare intelligens cupiebam res ecclesiasticas nostre cure commissas canonice tractare et queque emendanda forent illorum sapienti consilio corrigere et emendare Nostra itaque humilitate in hac sinodo presidente orta est questio inter duos presbyteros Ælfnothum scilicet presbyterum sancte Elene et Alam presbyterum sancti Albani de parrochiis et consuetudinibus ecclesiarum suarum Horum presbyterorum altercatio sanctam sinodum multum detinuit Hanc litem ego canonice discindere cupiens iussi seniores quosque et quibus notissime essent antique institutiones ecclesiarum seu parrochiarum Wigracestrie veritatem edicere tam de supradictarum quam de omnium ecclesiarum urbis Wigrac antiquissimis institutionibus et parrochiis earum Et quoniam inter supradictorum presbyterorum disceptationem auditus est a sancta synodo clamor filiorum ecclesie monachorum videlicet quod ipsi dampna paterentur suorum reddituum quos iuste habere debuissent de sua ecclesia sancte Elene scilicet propter tam diuturnam presbyterorum discordiam iussi ut sicut de institutionibus ceterarum ecclesiarum sic etiam de huius matris ecclesie institutione dicerent Ad harum rerum scrutinium ex nostro precepto fuerunt Thomas prior Ælfer secretarius Godricus Wirl camerarius Uhtred cantor Ægelric archidiaconus Edwine frater eius Frideric Ægelmer presbyter cum aliis quamplurimis quos ad hoc elegi Hii omnes igitur communi habito consilio reversi in sanctam synodum affirmaverunt nullam esse parrochiam in tota urbe Wigrac nisi tantum matris ecclesie Ecclesiam vero sancte Elene vicariam huius matris ecclesie extitisse a temporibus Ætheldredi regis et Theodori archiepiscopi qui locum hunc fundaverunt et ibi Boselum primum episcopum constituerunt anno Incarnationis Domini DCLXXX indictione vii Hec institutio a tempore supradicti Boseli per tempora omnium episcoporum huius sancte ecclesie per manus clericorum in hac sede servientium inconvulsa servata est usque ad tempora beati Oswaldi archiepiscopi qui opitulatione Ædgari regis et auctoritate pii patris Dunstani Cantuariensis archiepiscopi de irregulari conversatione clericorum in regularem conversationem et habitum monachorum transtulit et mutavit huius ecclesie congregationem anno dominice Incarnationis DCCCCLXIX indictione xii Huius pii patris Oswaldi temporibus Winsius sancte Elene presbyter vicarius huius sancte matris ecclesie extitit Hic idem monitis sancti Oswaldi cum ceteris qui in clericali habitu huic ecclesie ut cumque serviebant mundo posthabito monastice religionis habitum suscepit et claves ecclesie sancte Elene quarum ipse sicut vicarius custos extiterat cum terris decimis ceterisque redditibus ad communem usum monachorum reddidit Winsio proinde monacho facto cum ceteris qui secum sponte elegerunt converti tam supradicta ecclesia quam cetere que nunc usque monachorum sunt ecclesie terre decime sepulture vel quelibet alie consuetudines seu dignitates ecclesiastice que clericorum quasi propria hactenus extiterant in ius monachorum tunc transierunt et in communem usum illorum redacte sunt assensu regis Eadgari et beati Dunstani sanctique Oswaldi archiepiscoporum Anno tertio conversionis Winsii presbyteri beatus Oswaldus prioratum ei super monachos huius ecclesie concessit assensu eiusdem regis Concessit etiam illi omnibusque suis successoribus prioribus huius ecclesie decanos esse super omnes ecclesias suas et presbyteros ita videlicet quod nullus decanus nullus archidiaconus de monachorum ecclesiis seu clericis se intromittat nisi per priorem ecclesie omnes ecclesiasticas consuetudines prior sicut summus decanus episcopi pro suis ecclesiis episcopo persolvat Harum rerum sicut ab antecessoribus nostris didicimus et hiis nostris temporibus sub antecessore nostro Aldredo et nobis hactenus servatas vidimus testes sumus Horum igitur testimonium ego Wlstanus verum comprobans litem presbyterorum sedavi et veram comprobationem testimonio huius sancte synodi litteris nostris et sigillo corroboravi cavens ne amodo de hiis rebus in hac sancta et matre ecclesia inter monachos et alias quaslibet personas dissensio sive scandalum oriatur Servantibus hec vita eterna donetur in celestibus qui autem fregerit vel in peius mutaverit cum diabolo et angelis eius perpetuis dampnetur cruciatibus Amen