Charter Document - 03351141
| Charter Number: | 03351141 |
|---|---|
| Cartulary Title: | Norwich 1244-1266 Volume 32 |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1256 |
| Date type: | Internal, Calendar, Papal |
| Resource Link(s): |
Reference Document for this Embedded Document |
Charter:
Alexander episcopus servus servorum Dei dilectis filiis abbati et conventui monasterii sancti Aedmundi ad Romanam ecclesiam nullo medio pertinentis ordinis sancti Benedicti Norwicensis diocesis salutem et apostolicam benedictionem Religionis vestre meretur honestas ut vos favore benivolo prosequentes petitionibus vestris quam cum Deo possumus annuamus Hinc est quod nos vestris precibus inclinati ut ecclesiam de Pakeham Norwicensis diocesis in qua tu fili abbas ut asseritis ius optines patronatus et de cuius proventibus valorem xxx marcarum annis singulis secundum communem et antiquam estimationem patrie excedentibus filii conventus annuam certe quantitatis pecunie percipitis pensionem cedente vel decedente rectore ipsius in usus proprios et perpetuos filii conventus pro sustentatione hospitum ad vos declinantium convertere valeatis et ipsius possessionem corporalem ingredi auctoritate propria diocesani loci assensu minime requisito reservata de proventibus ipsis vicario in ecclesia perpetuo servituro congrua portione pro sustentatione sua et oneribus episcopalibus et aliis supportandis vobis felicis recordationis A pape iii predecessoris nostri vestigiis inherendo auctoritate presentium indulgemus non obstante quod post huiusmodi predecessoris nostri indulgentiam vobis factam ad presentationem abbatis monasterii vestri per loci diocesanum plures clerici seculares rectores instituti fuerunt in eadem representandi vicarium pro tempore in eadem instituendum ecclesia tibi fili abbas tuisque successoribus qui fuerint pro tempore iure salvo Nulli ergo homini liceat hanc paginam nostre concessionis infringere vel ei ausu temerario contraire Si quis autem hoc attemptare presumpserit indignationem omnipotentis Dei et beatorum Petri et Pauli apostolorum eius se noverit incursurum Dat Anagn vii kalendas Octobris pontificatus nostri anno secundo