Charter Document - 03210164
| Charter Number: | 03210164 |
|---|---|
| Cartulary Title: | Salisbury 1078-1217 Volume 18 |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1189 - 1190 |
| Date type: | Assigned |
| Resource Link(s): |
Reference Document for this Embedded Document |
Charter:
Omnibus ad quos presens carta pervenerit Hubertus dei gratia Saresburiensis episcopus eternam in domino salutem Ut ea que in presentia nostra gesta sunt noverca memorie semper infida non absorbeat oblivio scripture testimonio duximus ut moris est commendanda Proinde ad universitatis vestre volumus devenire notitiam quod venerabilis frater noster Ricardus abbas Cirencestrie de assensu et conniventia canonicorum suorum iuri suo si quod habuit in ecclesiam et canonicos de Bradenestok in presentia nostra penitus renuntiavit et in manus nostras presentibus illustri comite Willelmo Saresburiensi et canonicis de Bradenestok resignavit eiusdem etiam domus canonicos a subiectione obedientia et professione siqua illi vel ecclesie sue debuere prorsus absolvit Cartas etiam et munimenta que super hoc habuerat et assertioni sue fidem facere videbantur in medium producta in manus liberavit comitis memorati constanter in verbo domini repromittens quod siquid aliud munimentum vel privilegium penes ecclesiam suam retentum esset huic emancipationi contrarium eo de cetero vel ipse vel aliquis successorum suorum non utetur nec aliquid inposterum vel per se vel per alium machinabitur quod illorum futuris temporibus tranquillitati obesse debeat et quieti Nos autem ad utriusque partis instantiam ut quod in presentia nostra super hiis actum est presentibus innotescat et posteris et litterarum nostrarum testimonio et sigilli auctoritate roboravimus Hiis testibus domino Hugone abbate Rading Galfrido archidiacono Berkes magistro Bartholomeo et aliis