Charter Document - 03169133
| Charter Number: | 03169133 |
|---|---|
| Cartulary Title: | Worcester 1218-1268 Volume 13 |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1248 |
| Date type: | Internal, Papal |
| Resource Link(s): |
Reference Document for this Embedded Document |
Charter:
Innocentius episcopus servus servorum dei venerabilibus fratribus Lincolniensi et Wigorniensi episcopis salutem et apostolicam benedictionem Pro sinceritate devotionis et fidei quod dilectus filius nobilis vir S comes Leycestrie ac progenitores eius ad ecclesiam Romanam habuisse noscuntur et idem comes continuis habet affectibus incessanter libenter in actum prumpta benignitate deducimus que sibi debeant merito complacere Sane cum ipse comes zelo fidei ac devotionis accensus proposuerit assumere signum crucis et in terre sancte subsidium transfretare nos considerantes ipsum tanto validioribus fore merito presidiis confovendum quanto inter ceteros ecclesie filios ad ipsam specialem gerit affectum reverentie filialis fraternitatem vestram attente rogamus per apostolica vobis scripta mandantes quatinus de redemptione votorum et aliis quocumque modo vel causa in regno Anglie ipsius terre subsidio deputatis que ad manus vestras pervenerint aut pervenient in futurum comiti memorato pro se ac aliis quos secum in sua duxerit comitiva sic plenarie sic habunde propter hoc subventiones dexteram porrigatis quod ex prumpta sinceritate ac devotione sincera quibus sedem apostolicam sibi matrem et dominam recognoscit experiatur ei sedis eiusdem gratiam magnificam et fecundam nosque propter hoc vestre diligentie studium cum gratiarum actionibus debeamus dignis in domino laudibus commendare Datum Lugduni ii idus Iunii pontificatus nostri anno quinto