Charter Document - 03169064

Universis presentes litteras inspecturis vel audituris Philippus permissione divina prior totusque conventus sancte Barbare Lexovien diocesi salutem in domino Noveritis quod pensata utilitate monasterii nostri et monasterii beate Marie de Cormel dicte diocesis cepimus ad firmam perpetuam a viris religiosis Ricardo permissione divina abbate et conventu dicti monasterii Cormel ecclesiam suam de Bekeford cum capella de Eston et cum omnibus aliis capellis et cum omnibus pertinentiis earundem videlicet terris pratis decimis redditibus et cum omnibus aliis iuribus ad predictam ecclesiam et capellas pertinentibus et cum omnibus aliis que infra metas parrochie de Bekeford ad eos pertinebant et poterant pertinere retento sibi tantummodo uno homine videlicet Willelmo Besant cuius feodum et hommagium habuerunt ab antiquo sed omnes decimas predicti hominis et feodi eiusdem dicti abbas et conventus nobis quietaverunt et omnino dimiserunt Reservata vicario portione dicte ecclesie de Bekeford Wigorn diocesis qui de iuribus episcopalibus et archidiaconalibus integre respondebit et cum dictam vicariam vacare contigerit licebit nobis libere episcopo loci personam ydoneam presentare pro sexaginta marcis bonorum novorum et legalium sterlingorum dictis abbati et conventui et successoribus suis annuatim a nobis et successoribus nostris hiis terminis integre persolvendis ad monasterium suum de Cormel videlicet triginta marcas infra octabas resurrectionis dominice et triginta infra octabas beate Marie Magdalene tredecim solidis et quatuor denariis pro marca qualibet computandis et si dicti denarii prout superius est expressum boni novi non fuerint et legales vel si forte sterlingos non attulerimus pro qualibet marca quinquaginta duos solidos Turon vel equivalentis monete reddere tenebimur ad terminos supradictos Si vero abbatem Cormel vel successores suos contigerit moram facere in Anglia prior vel custos manerii de Bekeford qui pro tempore fuerit dum dicti abbatis vel successorum suorum adventus sibi fuerit duobus diebus precedentibus nuntiatus procurabit semel in anno per unum diem cum decem evectionibus vel ballivum suum de Newent cum quinque evectionibus quando dictus abbas vel successores sui in Anglia non fuerunt commorantes et dicti abbas et conventus et successores sui nobis et successoribus nostris dictam ecclesiam de Bekeford Wigorn diocesis ad usus et consuetudines Anglie garantizare tenentur cum omnibus supradictis Et sciendum est quod si casu fortuito nuntius noster in mari vel in via dictas sexaginta marcas amitteret per unum mensem a solutione dicte pecunie inpune cessabimus si nostre sederit voluntati De omnibus autem extraordinariis oneribus a domino papa vel rege vel loci episcopo super dictam ecclesiam impositis vel imponendis tenemur indempnes conservare abbatem et conventum superius nominatos Preterea si per factum prioris vel custodis manerii de Bekeford vel alicuius de gremio monasterii nostri dicta ecclesia de Bekeford vel eiusdem bona per episcopum loci vel per aliquem alium fuerint sequestrata vel impedita nihilominus tenebimur dictas sexaginta marcas solvere terminis supradictis Preterea si venerabilis pater Wigorn episcopus super dictam ecclesiam de Bekeford aliquod onus imposuerit utpote in procuratione vel in aliis indempnes conservare tenemur abbatem et conventum superius nominatos preterea si prout dictum est prelibatam pecuniam non solverimus ad terminos antedictos bene volumus et concedimus quod per quamlibet septimanam per quam detinuerimus ultra dictos terminos quod teneamur dictis abbati et conventui ad penam unius marce sterlingorum bonorum novorum et legalium tredecim solidis et quatuor denariis pro illa computandis et sibi reddendis et in principali debito nullatenus computandis Omnia autem supradicta et singula in veritate promisimus et fideliter confessi sumus nos fideliter servaturos abrenuntiantes omnibus litteris impetratis vel impetrandis et omni beneficio et auxilio constitutionis et iuris canonici et civilis et omnibus exceptionibus que contra presentes litteras possent apponi et beneficio petende restitutionis in integrum supponentes nos et monasterium nostrum iurisdictioni venerabilis patris Willelmi dei gratia Lexoven episcopi et successorum suorum vel eorum officialium et bona nostra mobilia et inmobilia presentia et futura ecclesiastica et mundana ita quod si pro defectu solutionis pecunie supradicte traxerint nos in causam dicti abbas et conventus vel successores coram dicto episcopo vel eius officiali vel successoribus eorundem quod presens instrumentum sufficiat ad cassandas et evacuandas sine alio litis strepitu omnes rationes et allegationes que pro nobis possent proponi nobis valiture et notiture abbati et conventui supradictis nec poterimus dicere nos in hoc contractu fuisse circumventos ab abbate et conventu superius nominatis et ut hec omnia et singula in veritate compleantur et fideliter observentur presenti scripto sigilla nostra duximus apponenda Actum anno gratie MCCXLVII mense Martii Valeat universitas vestra semper in domino