Charter Document - 02381036

Innocencius episcopus servus servorum dei venerabilibus fratribus Lincolniensi et Eliensi episcopis et dilecto filio abbati sancti Edmundi salutem et apostolicam benedictionem Inter venerabilem fratrem nostrum archiepiscopum et predecessores eius ex una parte ac dilectos filios priores et monachos Cantuarienses ex altera super quibusdam capellis quas ipsi archiepiscopi erigere laborarunt in preiudicium partis alterius sicut monachi proponebant iam dudum grandis et gravis questio pullulavit pro qua predecessores nostros et nos ipsos sepius oportuit apostolicas litteras destinare Verum cum in ipso negocio auctoritate litterarum nostrarum usque adeo sit processum ut capella de Lameh dirruta sit penitus et consumpta prefatus archiepiscopus predecessorum suorum volens laudabile propositum adimplere capellam ad honorem gloriosorum martirum Stephani et Thome in qua canonicos prebendarios institueret de novo fundare volebat de nostra licencia speciali quod sibi per nuncios et procuratores suos de communi iure competere asserebat contradictione partis alterius non obstante cuius indempnitati per sufficientem et idoneam cautionem poterat provideri sed neque per demolitionem capelle prefate de Lameh suum dicebat desiderium retardandum cuius opus ea potissimum ratione fuerat condempnatum quod post denunciationem novi operis inhibitionem predecessorum nostrorum et appellationem ad sedem apostolicam interpositam fuerat attemptatum Ceterum pro monachis fuit propositum ex adverso quod cum mandatum nostrum ad ipsum archiepiscopum et vos directum circa exeniorum ecclesiarum et aliorum restitutionem adhuc non fuerit adimpletum nec sopitum scandalum ex ea causa subortum nec constaret adhuc de preiudicio in posterum auferendo eadem contradictionis causa durante non erat prefati archiepiscopi petitio admittenda Cum autem hec et similia fuissent utrinque in nostro auditorio allegata nos volentes utrique partium pastorali sollicitudine providere de communi fratrum nostrorum consilio causam eandem sub ea forma vobis duximus committendam ut ante omnia inter ipsos amicabiliter componere laboretis Quod si forte desuper datum non fuerit vos facta prius restitutione plenaria monachis memoratis eorum que ob hanc causam fuera subtracta inquiratis super hiis que premisimus remoto appellationis obstaculo plenius veritatem et si de partium voluntate processerit ad diffinitivam sentenciam procedatis facientes quod decreveritis per censuram ecclesiasticam a partibus irrevocabiliter observari Alioquin gesta omnia in scriptis fideliter redigentes ad nos ea sub vestrarum litterarum testimonio transmittatis diem assignantes partibus competentem quo recepture sentenciam nostro se conspectui representent ad quem siqua earum venire contempserit nos nichilominus in causa ipsa quantum de iure poterimus procedemus Ad hec volumus et mandamus ut ad locum ipsum pariter accedentes super statu Cantuariensis ecclesie tam interiori quam exteriori inquiratis appellatione remota plenius veritatem et quicquid super hiis inveneritis nobis fideliter intimetis ut per relationem vestram certiores effecti quod statuendum fuerit statuamus Nullis litteris obstantibus preter assensum partium a sede apostolica impetratis Quod si omnes hiis exequendis nequiveritis interesse duo vestrum ea nichilominus exequantur Dat Lateran xiiii kalendas Iunii pontificatus nostri anno secundo