Charter Document - 02371556
| Charter Number: | 02371556 |
|---|---|
| Cartulary Title: | Canterbury 1193-1205 Volume 3 |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1189 - 1193 |
| Date type: | Assigned |
| Resource Link(s): |
Reference Document for this Embedded Document |
Charter:
Omnibus ad quos presens carta pervenerit H dei gratia Saresberiensis episcopus eternam in domino salutem Iustis religiosorum petitionibus gratum prelatos ecclesie favorem decet impertiri et hiis que ad illorum profectum faciunt et sustentationem animum misericorditer inclinare Inde est quod nos consideratione religionis et honestatis fratrum domus dei de Nogento concessionem illis ab illustri viro Rotrodo comite Perticensi factam de ecclesia de Audeburn et de ecclesia de Wanberga prout in ipsius comitis carta continetur expressum ratam habemus et eam suscepte administrationis auctoritate confirmamus Eisdem etiam fratribus et deinceps domino in prefata domo perpetuo servituris communicato virorum venerabilium consilio paterne pietatis indulgentia concessimus ut vicarii perpetui ad eorundem fratrum presentationem per nos vel successores nostros in illis instituantur ecclesiis quorum vicarie in utraque ecclesia decem marcarum erunt iuxta nostram vel successorum nostrorum dispositionem et de toto fructuum ecclesiarum illarum residuo ipsis fratribus respondebunt salvis nobis et successoribus nostris et illorum officialibus et nostris episcopalibus consuetudinibus que et nobis et illis per vicariorum illorum manus et ministeria persolventur