Charter Document - 02371411

Lucius episcopus servus servorum dei venerabilibus in Christo fratribus archiepiscopis episcopis et dilectis filiis abbatibus et prioribus archidiaconis et decanis presbiteris et universis ecclesiarum prelatis ad quos presentes litere pervenerint salutem et apostolicam benedictionem Audivimus et audientes mirati sumus quod cum dilectis filiis nostris fratribus ordinis Cisterciensis a patribus et predecessoribus nostris concessum sit ut de laboribus quos propriis manibus aut sumptibus excolunt nemini decimas solvere teneantur quidam ab eis nichilominus contra apostolice sedis indulgenciam decimas exigere et extorquere presumunt et prava ac sinistra interpretatione apostolicorum privilegiorum capitulum pervertentes asserunt de novalibus debere intelligi ubi de laboribus est inscriptum Quoniam igitur manifestum est omnibus qui recte sapiunt interpretationem huiusmodi perversam esse et intellectui sano contrariam universitati vestre per apostolica scripta precipiendo mandamus quatinus parrochianis vestris auctoritate apostolica prohibere curetis ne ullatenus contra predictos fratres materiam accipiant malignandi nec de aliquibus terris quas propriis manibus aut sumptibus excolunt non tantum de novalibus set eciam de terris antiquitus excultis quomodocumque teneantur ab illis sive de nutrimentis animalium suorum quisquam ab eis vel ab aliis pro eo quod animalia ipsorum in pastura vel custodia sua habeant decimas exigere vel quomodolibet extorquere presumat Nam si de novalibus tantum vellemus intelligi ubi ponitur de laboribus de novalibus poneretur sicut in privilegiis quorumdam aliorum apponitur Quia vero non est conveniens ut contra sedis apostolice indulgencias temere veniatur que optinere debent immobilem firmitatem vobis per apostolica scripta mandamus precipiendo ut si qui monachi canonici clerici vel laici contra privilegia sua memoratos fratres super decimarum vel aliarum libertatum exactione gravaverint apellatione remota clericos ab officio suspendatis laicos autem excommunicationis sententia percellatis et tam suspensionis quam excommunicationis faciatis usque ad dignam satisfactionem sententias observari Quod si a sede apostolica litere impetrate fuerint quarum occasione quis ab illis decimas exigere vel aliud contra privilegia vel indulgencias eorum ab ipsis extorquere nitatur respondere illis minime teneantur in quibus eciam si inhibita fuerit appellatio nichilominus appellandi habeant facultatem nisi pro bono pacis spontanea cum aliquibus composuerint voluntate Quod si alique conpositiones inter eos et aliquos pacis intuitu et utrorumque consensu facte fuerint illas perpetuis temporibus ratas et inconcussas permanere faciatis si tamen de conscientia et approbatione abbatis et fratrum constiterit processisse Ad hec presencium auctoritate precipiendo mandamus quatinus si quis eorundem parrochianorum vestrorum in sepedictos fratres violentas manus iniecerit eum candelis accensis excommunicatum publice denuncietis et tanquam excommunicatum faciatis ab omnibus evitari J donec eisdem fratribus congrue satisfaciat et cum literis diocesani episcopi rei veritatem continentibus apostolico se conspectui representet Dat Vern xiiii kal Aprilis