Charter Document - 02371383

In nomine patris et filii et spiritus sancti Amen Eustacio Eliensis episcopus Samsonus abbas Sancti Edmundi Rogerus decanus Lincolniensis loco domini Lincolniensis episcopi constitutus electi arbitri a domino Cantuariensi archiepiscopo Hubertus et priore et conventu Cantuariensis ecclesie iuxta formam compromissi pro bono pacis et tranquillitatis Cantuariensis ecclesie providimus et ordinavimus ut si placet domino Cantuariensi edificare ecclesiam apud Lamehe hoc modo fiat Edificet ubi voluerit in area illa dum modo non super fundamenta operis illius quod auctoritate domini pape dirutum est Instituantur in ecclesia illa canonici ordinis Premonstratensis ita quod non sint plures quam viginti nec pauciores quam tredecim Hanc ecclesiam poterit dotare dominus archiepiscopus usque ad quantitatem centum librarum annuatim de ecclesiis ad ipsum pertinentibus vel de aliis bonis que possidet nomine Cantuariensis ecclesie exceptis ecclesiis de Muneketun de Estreia de Einesford de Mapeham et ecclesiis que sunt in maneriis monachorum et exceptis aliis rebus que coram nobis in questionem deducte sunt Erit autem ecclesia illa mediocris iuxta prefatum numerum personarum et predictam dotem modificata habito respectu ad morem et mediocritatem edificandi ecclesiam quibus utuntur canonici eiusdem ordinis Sane ad tollendam omnem suspicionis materiam et scandali pro bono pacis et perpetue tranquillitatis providimus ut in ecclesia illa archiepiscopi ordines aut concilia aut consecrationes episcoporum aut benedictiones abbatum non celebrant aut chrisma conficiant Nec hoc in derogationem dignitatis archiepiscopalis aut iuris ordinatum est set pro commodo tranquille pacis presertim cum secundum auctoritatem canonum in quibusdam cenobiis misse publice non sint celebrande ne turbetur quies religiosorum Nec faciant archiepiscopi congregationem canonicorum secularium et dotent de bonis Cantuariensis ecclesie sine assensu conventus Cantuariensis aut sanioris aut maioris partis conventus Ad robur et firmitatem status illius in perpetuum observandi dominus archiepiscopus litteris suis patentibus approbabit hoc arbitrium nostrum et conventus similiter Procurabunt etiam dominus archiepiscopus et conventus bona fide et sine omni malo ingenio apud dominum papam et apud dominum regem ut et ipsi hoc ipsum confirment Procurabunt etiam cum omni diligentia bona fide apud suffraganeos Cantuariensis ecclesie et maiora collegia Cantuariensis provincie quod sigilla sua huic arbitrio apponent Hiis fideliter peractis et efficaciter procuratis procedat res sicut preordinatum est De ecclesiis autem ita disposuimus quod clerici qui eas tenent habeant eas quo advixerint scilicet Symon Wellensis archidiaconus ecclesiam de Muneketun sub annua pensione x aureorum magister Radulfus de Sancto Martino ecclesiam de Estreya sub annua pensione vi aureorum Virgilius ecclesiam de Mapeham sub annua pensione unius aurei elemosinarie Cantuariensis ecclesie solvendorum dominus archiepiscopus quondam Lugdunensis ecclesiam de Einesford tenebit pacifice quo advixerit Post mortem vero Symonis in ecclesia de Muneketun percipiet sumptibus suis et laboribus prefata elemosinaria nomine beneficii pro bono perpetue pacis medietatem decimarum et aliorum pertinentium excepto altaragio Reliqua vero medietas cum altaragio remanebit in donatione domini archiepiscopi et suorum successorum In ecclesia de Estreia similiter fiet post mortem Radulfi Virgilio autem decedente prefata elemosinaria percipiet sumptibus suis et laboribus in ecclesia de Mapeham similiter nomine beneficii terciam partem decimarum et aliorum pertinentium excepto altaragio quod cum residio remanebit in donatione domini archiepiscopi et suorum successorum In ecclesia de Einesford post obitum iam dicti Lugdunensis archiepiscopi similiter fiet Nomine autem altaragii intelligimus omnia mobilia ecclesie legata oblationes omnes et decimationes preter decimas bladi leguminis et feni Terras autem et terrarum redditus et capellarum pensiones ad altaragium dicimus non pertinere Capellarum autem cum vacaverint super hiis que eis vacantibus ad matricem ecclesiam pertinere noscuntur talis fiat distributio qualis et aliorum pertinentium predictarum ecclesiarum cum capelle sint de pertinentiis earumdem ecclesiarum Quod autem diximus de medietate vel de tercia predictarum decimarum ecclesiarum intelligimus tantum de illis que coram nobis in contentionem deducte sunt aliis in antiquo suo statu manentibus Omnia vero que percipient monachi in predictis ecclesiis in usus pauperum expendantur ita quod non minuantur aut subtrahantur ob hoc que prius assignata fuerant elemosinarie De xeniis quorumdam maneriorum conventus ita disposuimus ut dominus archiepiscopus H sit in possessione eorum quo advixerit salvo in omnibus iure monachorum post eius obitum si quod habent in petitorio seu possessorio super eisdem xeniis nisi communi assensu aliter inter se interim statuerint De mariscis et moris et piscariis sic erit Eligantur de communi assensu viri boni et fide digni xii aut plures qui veritatem super hiis melius noverint et fidelius voluerint testimonium perhibere veritati et iurati dicant ad quam pocius partium predicta de iure pertineant et stetur dicto omnium aut maioris partis Dominus archiepiscopus precipiet illis sub interminatione anathematis ut verum dicant bona fide et sine acceptione persone Hec arbitrati sumus salva in omnibus apostolice sedis auctoritate et reverentia Factum est autem hoc arbitrium anno incarnationis dominice MCC pontificatus domini Innocencii iii summi pontificis tercio regni regis Iohannis secundo viii idus Novembris apud Westmonasterium