Charter Document - 02224017
| Charter Number: | 02224017 |
|---|---|
| Cartulary Title: | Cartulaire de Hugues de Chalon (1220-1319) |
| Charter Language: | Latin |
| Charter Origin: | Royal |
| Charter Type(s): | Decree |
| Date: | 1291 |
| Date type: | Internal, A.D., Calendar, Regnal |
| Resource Link(s): |
Reference Document for this Embedded Document Patrimoine numérisé de Besançon - MS Droz 21 - Tome 1 (p.48) |
Charter:
Licet cunctos populos quos Romanum ambit imperium sub alis nostre protectionis satagamus alacriter amplecti maxime tamen religiosos qui mundi spretis illecebris serviunt Regi regum desideramus ardentius sub tranquillitate pacis et quietis beatitudine respirare Ad hoc habito respectu guardiam seu custodiam monasterii Sancti Eugendi dicti de Jou cum omnibus suis possessionibus jurisdictionibus pertinentiis dominiis et juribus quibuscumque quocumque nomine censeantur quas vel que idem monasterium nobis et imperio immediate subjectum a nobis et dicto imperio tenere et possidere dignoscitur vel habere spectabili viro Johanni de Cabilone domino de Arlato fideli nostro dilecto cujus multiformia meritorum insignia preclara didicimus evidentia pro tuitione protectione nec non viciniori deffensione eo quod nos propter longa locorum intersticia ipsius monasterii negociis intendere commode non valemus nostrorum principum de consilio a nobis et imperio possidendas vel possidenda im perpetuum titulo feodali concedimus et donamus volentes ut dictus Johannes de Cabilone et ejus heredes nostra et imperii auctoritate guardiam seu custodiam predicti monasterii cum omnibus suis pertinentiis et juribus prout superius sunt expressa in feodo a nobis et imperio teneant habeant et possideant pacifice et quiete et nobis ac successoribus nostris in imperio debite fidelitatis homagium faciant de eisdem Preterea premissis adjungimus quod prefatus Johannes de Cabilone et sui heredes ac successores sepefatum monasterium Sancti Eugendi cum omnibus suis possessionibus et pertinentiis debent ab omnibus injuriis gravaminibus et turbationibus quorumcumque fideliter preservare et contra molestatores et injuriatores quoslibet defensare protegere ac tueri In cujus rei testimonium presens scriptum exinde conscribi et majestatis nostre sigillo fecimus communiri Datum in Maguntia IIII kalendas junii indictione IV anno Domini MCCLXXXXI regni vero nostri anno XVIII