Charter Document - 02195418

Bonifacius Episcopus servus servorum ad perpetuam Rei memoriam Inter cetera mundi cenobia et alia pia loca in agro plantata dominico venerabile Monasterium Cluniacense Romane Ecclesie immediate subjectum a longis retro temporibus dum cura nobis minoris incumbebat officii speciali quadam affectione dileximus illud precipuis prosequendo favoribus ejusque statum sollicitis studiis promovendo Novimus etenim et facti experimento didicimus quod in Monasterio ipso personis decorato solemnibus divinis laudibus ferventer insistitur operibus intenditur sanctitatis honestatis exercentur studia conversationis et vite mundiciis cura solers impenditur vacatur virtutibus vitiis profugatis ideoque digna nos movet affectio charitas laudanda sollicitat piaque sedulitas excitat nostre mentis arcanum ut circa statum Conventus Monasterii supradicti accuratius et vigilantius intendamus ut eo liberius et quietius immorari valeat cultui divinorum quo ejus necessitatibus et indigentiis plurimis abundantius et decentius prout expedire dignoscitur contigerit subveniri Dudum Siquidem ante nostre promotionis auspicia in ultra montanis partibus ad quas nos Apostolica Sedes pro quibusdam negotiis exequendis transmiserat constituti ad Monasterium ipsum causa devotionis accessimus et de statu atque conditionibus prelibati Conventus attentius inquirentes ac ejus refectorium et dormitorium propriis subiicientes aspectibus fide perpendimus oculata nobisque indiciis evidentibus patuit quod idem Conventus multos defectus multasque penurias et indigentiarum onera gravia licet sub laudande humilitatis officio quibusvis murmure querelaque cessantibus predicta pertulerit hactenus et perferre non desinat patienter Unde nos extunc cepimus cogitare sollicite ut super hoc per nostre diligentie studium opportunum remedium contingeret adhiberi Et ideo indignum et indecens ac rationi contrarium minime congruum arbitrantes ut memoratus Conventus qui diei et estus in divinis exequendis laudibus portat pondus cujusvis defectus aut indigentie seu penurie onere pregravetur aut si Monasteriorum eidem Cluniacensi Monasterio subjectorum personis necessariorum ubertas arrideat dictumque Conventum indigentie moles premat Sive si membra deliciis affluant caput vero sarcina deprimat egestatis Apostolica auctoritate statuimus facimus et ordinamus perpetuis futuris temporibus observandum ut ad supplendos defectus hujusmodi et penurias ac indigentias quaslibet Conventus relevandas ejusdem necnon ad exonerationem Abbatum Cluniacensis Monasterii supradicti quatuor millia librarum Turonensium parvorum de fructibus reditibus et proventibus aliquorum prioratuum Monasterio subjectorum eidem annis percipienda singulis deputentur que per discretos aliquos et fideles ipsius Ordinis Monachos per dilectum filium Guillelmum Abbatem Cluniacensis qui nunc est et successores ipsius qui pro tempore fuerint ordinandos integre colligi et percipi volumus et mandamus Nos igitur sperantes firmiter per orationum Conventus memorati suffragia de quibus grandem utique fiduciam gerimus perpetuis temporibus adjuvari decernimus et ad hec auctoritate predicta concedimus donamus et deputamus omnino de Lehuno in sanguine terso Ambianens de Nogento Retrodi et de Gacicuria Carnoten de Gaya Trecen de Vergeyo Eduen de Vendopera de Monstereto et de Marmissa Lingonen de Turribus super Maternam Remen de Carennaco Caturcen de Moyraco Agennen de Roncenaco Petragoricen et de sancto Cosma Constantien Diecesum Prioratus eidem Monasterio Cluniacensi subjectos cum omnibus Prioratibus Domibus membris grangiis bonis juribus et pertinentiis eorumdem in quibuscumque Diecesibus constitutis ut de ipsorum fructibus Redditibus et proventibus universis hujusmodi Summa pecunie per illos qui super hoc premisso modo deputati fuerint percipiatur integre annis singulis ac etiam colligatur non obstante si prioratus ipsi domus membra seu grangie vel eorum aliqua per quoscumque regulares sive seculares cujuscumque dignitatis conditionis aut status fuerint aut Pontificali seu Archiepiscopali vel alia quacumque prefulgeant dignitate Apostolica vel alia quavis concessione seu collatione aut alio quovis modo forsitan teneantur Volumus insuper ut Prioratus predicti appellentur et habeantur de cetero decanatus et quod ipsi decanatus seu fructus et proventus et redditus eorumdem ab omni decime aut cujuslibet procurationis impositionis et subventionis prestatione sint exempti perpetuo et penitus habeantur immunes salvis dumtaxat censibus et aliis juribus Cluniacensi Monasterio debitis in quibus Prioratus predicti immo jam potius decanatus predictis Abbati et ejus successoribus sunt prout asseritur obligati Preterea volumus et etiam ordinamus ut in quolibet decanatuum predictorum decens et competens numerus Monachorum et servientium jugiter habeatur qui perpetuo in eo pro divinis exequendis Officiis commorentur quibusque de jam dictis proventibus et reditibus vite necessariis congrue ministratis de ipsorum residuo predicta quatuor millia librarum colligi et percipi pro Conventu valeant supradicto Ut autem hujusmodi nostra dispositio seu Ordinatio inviolabiliter et inconcusse futuris temporibus observetur auctoritate predicta sub pena excommunicationis quam ex nunc in eos qui scienter contra ipsam venire aut eam quomodo libet turbare presumpserint cujuscumque dignitatis conditionis aut status existant seu quacumque prefulgeant dignitate proferimus et districtius inhibemus ne aliquid adversus illam quovis quesito colore occasione vel causa quomodo libet attentetur Non obstantibus quibuslibet contrariis predicti Ordinis consuetudinibus vel statutis juramentis confirmationibus Sedis predicte seu quibusvis aliis firmitatibus roboratis aut quibuscumque Privilegiis indulgentiis et litteris Apostolicis quorumcumque tenorum existant per que prefate dispositionis seu Ordinationis effectus impediri quomodo libet valeat vel differri et de quibus plenam et expressam ac de verbo ad verbum oporteat in presentibus fieri mentionem Predictam vero excommunicationis penam ad Abbatem Cluniacensis et successores ipsius ac etiam Conventum Cluniacensis prefatos aut aliquem seu aliquos ex eodem extendi nolumus quoquomodo sed ab ea sint penitus liberi et omnino habeantur immunes Nulli ergo omnino hominum liceat hanc paginam nostrorum statuti factionis ordinationis constitutionis concessionis donationis deputationis et inhibitionis infringere vel ei ausu temerario contraire Si quis autem hoc attentare presumpserit indignationem omnipotentis Dei et Beatorum Petri et Pauli Apostolorum ejus se noverit incursurum Datum Anagnie V Idus Julii Pontificatus nostri anno primo