Charter Document - 02061158

Universis presentes litteras inspecturis Robertus dux Burgundie et Agnes ejus uxor filia bone memorie Ludowici quondam regis Francie salutem in Domino Expediens rei publice et animabus nostris salubre fore credimus si statum ducatus nostri et terre nobis subjecte in melius deducamus Hinc est quod universis presentibus et futuris serie presentium intimamus quod cum tractatus esset habitus pro communi utilitate et prelocutus inter nos Robertum ducem predictum ex una parte et reverendos patres Eduensem Lingonensem et Cabilonensem episcopos et capitula ecclesiarum cathedralium Eduensis et Cabilonensis et quedam alia capitula earumdem diocesium necnon et quosdam abbates priores et alias personas ecclesiasticas tam religiosas quam seculares ducatus nostri Burgundie super eo quod persone ecclesiastice predicte requirebant a nobis quod nos et heredes nostri ac successores universi et singuli et a nobis causam habentes a monetarum mutatione frequenti que prelatis capitulis conventibus et personis ac ecclesiis monasteriis et locis eisdem et universaliter omnibus incolis ipsius ducatus asseritur esse dampnosa cessaremus omnino et quod decetero nos et heredes nostri et successores vel a nobis causam habentes monetam immutabilem forma lege et pondere cudi ac fabricari faceremus sub certo valore habendam tenendam et perpetuo immutabiliter observandam In recompensationem vero hujus monete immutabilis faciende tam prelati quam capitula abbates conventus et alie persone ecclesiastice in nostro ducatu predicto existentes de omnibus proventibus reditibus et obventionibus ecclesiasticis darent nobis decimam per biennium continuum colligendam et solvendam per episcopos in suis civitatibus et diocesibus vel per viros ydoneos ab ipsis episcopis deputandos ad valorem et taxationem quibus taxati fuerunt in decima concessa subsidio terre sancte nobiles viri et innobiles clerici et laici conditionis libere existentes de suis proventibus et reditibus darent nobis similiter decimam per biennium continuum tantummodo Populares vero laici talli abiles quilibet locum et focum tenens daret nobis quinque solidos per biennium similiter continuum summi pontificis super premissis bene placito reservato Tandem accedente consensu excellentissimi domini nostri Philippi Dei gracia Francie regis accedente etiam consensu episcoporum prelatorum ac personarum ecclesiasticarum tam religiosarum quam secularium ducatus nostri super premissis tenendis hinc inde et complendis nos Robertus et Agnes predicti promittimus nos facturos decetero et imperpetuum monetam immutabilem et eam facere cudi ac fabricari legitimam forma lege et pondere scilicet quod moneta nostra decetero immutabilis continebit impressionem solitam item erit talis ponderis videlicet quod decem et novem solidi et octo denarii Divionensium faciant marcham Trecensem item quod in ipsa marcha decem et novem solidorum et octo denariorum erunt due uncie argenti puri de Montepesulano et sex uncie metalli quando exibunt de fabrica et hec erit lex item valor et status monete erit talis scilicet quod quindecim denarii Divionensium valebunt duodecim parvos Turonensium communiter currentes et sic immutabilis perpetuo permanebit item quod de moneta sub forma lege et pondere predictis tantum faciemus quod sufficiet ad usum patrie item volumus et consentimus quod moneta hujusmodi de biennio in biennium examinetur quando exibit de fabrica per Eduensem et Cabilonensem episcopos vel alterum eorumdem convocatis duobus castellanis ducatus nostri predicti quos viderint ad hoc ydoneos et si inveniatur suo pondere lege vel aliquo predictorum defraudata volumus et consentimus quod dicti episcopi seu alter ipsorum nos et successores nostros et a nobis causam habentes possint sine strepitu judiciario excommunicationis vinculo innodare et terram nostram supponere ecclesiastico interdicto Volumus etiam et consentimus quod potestatem faciendi et fabricandi monetam ac ipsam monetam amittamus et ad regem Francie devolvatur moneta in suo statu et robore permanente item promittimus in omnibus quod super hoc non petemus gratiam nec recipiemus eam si nobis vel successoribus nostris facta fuerit a regia majestate item promittimus omnia dampna restituere que incole ducatus nostri propter hoc sustinebunt omni strepitu et lite semotis Volumus etiam et consentimus quod si in premissis vel aliquo premissorum deficeremus quod absit per dictum dominum regem per captionem bonorum nostrorum et sasinam ducatus nostri nos et successores nostri possimus compelli ad observationem premissorum item volumus et consentimus quod sanctissimus ac dominus papa qui pro tempore fuerit nos et heredes nostros ac successores valeat excommunicare et ducatum nostrum supponere ecclesiastico interdicto item volumus et consentimus quod heredes nostri et successores qui pro tempore fuerint in novitate sua prestent juramentum hujusmodi de premissis observandis episcopis predictis vel eorum capitulis sedibus vacantibus infra tres menses postquam ducatum intraverint et litteras suas tribuant duplicatas super premissis inviolabiliter observandis item promittimus nos daturos litteras duplicatas domini Pape ac etiam litteras domini nostri Philippi Dei gratia regis Francie seriem presentium continentes de premissis omnibus et singulis inviolabiliter observandis item volumus et consentimus quod heredes nostri et successores qui pro tempore fuerint in novitate sua renovent litteras presentes duplicatas cum a predictis episcopis vel eorum altero fuerint requisiti et litteras regis Francie qui pro tempore fuerit renovare procurent item volumus et consentimus quod nullus usus nulla consuetudo nulla prescriptio possit nobis prodesse et incolis ducatus nostri obesse in premissis seu aliquo premissorum Et hec omnia nos Robertus et Agnes prenominati promittimus ad sancta Dei evangelia nos firmiter fideliter et legitime servaturos et pro premissis omnibus et singulis observandis obligamus nos et heredes et successores nostros universos et singulos et omnia bona nostra mobilia et immobilia presentia et futura necnon et nostrum ducatum et omnes proventus et exitus ipsius et omnia feuda nostra et retro feuda et alia jura personalia et realia ubicumque sint et in quibuscumque locis existant et super hiis omnibus et singulis supponimus nos jurisdictioni domini Pape ac domini Regis Francie et episcoporum predictorum ubicumque fuerimus commorantes Renuntiantes quo ad premissa et singula premissorum omnibus privilegiis et indulgentiis concessis et concedendis ac omnibus exceptionibus juris et facti ac consuetudinis que nobis et nostris possent in hac parte prodesse et incolis ducatus nostri obesse In cujus rei testimonium et munimen sigilla nostra presentibus litteris duximus apponenda Datum Parisius die jovis post Assumptionem beate Marie Virginis anno Domini MCC octogesimo quarto mense augusti