Charter Document - 01941028

Charter Document - 01941028


Charter Number: 01941028
Cartulary Title: The Priory of Hexham
Charter Language: Latin
Charter Origin: Religious
Charter Type(s): Decree
Date: 1310
Date type: Internal, A.D., Episcopal
Resource Link(s): Reference Document for this Embedded Document

Charter:

Willelmus permissione Divina Ebor archiepiscopus Anglie primas [] Ut omnis status ecclesiasticus et sacre regule diligenter valeant custodiri statutum existit ut provincialia concilia convocentur in quibus emergentia negotia discutiantur et debite corrigantur que etsi secundum jura fieri debeant omni anno tunc tamen est precipue circa ea diligentiori studio laborandum cum emerserint negotia graviora presertim talia ex quibus in Christi populo enorme scandalum generatur Sane quantus clamor ascenderit hiis diebus contra ordinem Militie Templi ipsiusque ordinis singulares personas super heresi ydolatria perfidia et aliis enormibus jam satis est per mundi climata divulgatum Pater siquidem sanctissimus dominus Clemens Divina providentia papa Quintus hujusmodi clamore sepius excitatus a nonnullis fratribus ipsius ordinis coram se ad judicium evocatis super premissis diligentius inquisivit quorum multi coram eodem domino papa patribusque reverendis dominis cardinalibus predicta flagitiosa crimina sponte judicialiter sunt confessi Idem quoque dominus papa super premissis intendens ulterius procedere juxta canonicas sanctiones cum comode nequeat a singulis ordinis supradicti personis inquirere per se ipsum onera sua partiri volens cum aliis prelatis inferioribus qui in partem sollicitudinis sunt vocati nobis per apostolica scripta mandavit ut sub certa forma contra supradictum ordinem et ipsius singulares personas judicialiter procedamus Ut igitur tam predicta quam alia que nostro incumbunt officio cum consilio saniori plenius exequi valeamus disposuimus Deo duce vicesimo die mensis Maii in ecclesia nostra Ebor provinciale concilium celebrare Quocirca tenore presentium peremptorie vos citamus quod dictis die et loco cum dictus continuandis et prorogandis compareatis personaliter coram nobis super proponendis in concilio tractaturi salubre consilium impensuri necnon ea que statuta ordinata et facta fuerint humiliter admissuri ac etiam efficaciter impleturi facturi et recepturi quod consonum fuerit canonicis institutis Vos enim premunimus quod si absentes fueritis in termino secundo nisi propter evidentes causas et rationabiles de quibus legitime fidem facere oportebit vos tamquam inobedientes et contumaces juxta juris exigentiam puniamus De die vero receptionis presentium Et quicquid faciendum duxeritis in premissis nos dictis die et loco distincte et aperte certificare curetis per vestras patentes literas harum seriem continentes Data apud Cawod ij idus Aprilis anno Domini millesimo trecentesimo decimo et pontificatus nostri quinto

Source (click image below to view full size)