Charter Document - 01449064
| Charter Number: | 01449064 |
|---|---|
| Cartulary Title: | Registrum Malmesburiense [Malmesbury] |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1230 |
| Date type: | Internal, Calendar, Papal |
| Resource Link(s): |
Reference Document for this Embedded Document Reference Document for this Embedded Document |
Charter:
Gregorius episcopus servus servorum Dei dilectis filiis cancellario magistris Willelmo de Purle et Willelmo de Sancte Marie ecclesia canonicis Londonie salutem et apostolicam benedictionem Dilectus filius magister Johannes persona ecclesie de Creddewelle clericus dilecti filii nostri J titulo Sancte Praxedis presbiteri cardinalis exposuit coram nobis quod orta olim inter abbatem et conventum monasterii de Malmesburia Sarum diocesis ejusdem ecclesie patronos ex parte una et episcopum et capitulum Sarum ex altera super exemptione monasterii questione ac aliquandiu coram judicibus delegatis a Sede Apostolica ventilata ex compositione tandem inita inter partes idem abbas et conventus predictis episcopo et capitulo pro eo quod eidem questioni cesserunt in bonis ipsius monasterii certos redditus assignarunt procedente vero tempore prefati abbas et conventus ex assignatione dictorum reddituum se graviter lesos esse conquerentes in recompensationem eorundem reddituum quasdam decimas ecclesie supradicte ab eisdem episcopo et capitulo sibi obtinuere concedi ut post obitum persone tunc eidem ecclesie presidentis adipiscendi possessionem earum haberent liberam facultatem Sicque dicti abbas et conventus occasione concessionis hujusmodi decimas ipsas temere occupare contendunt Quare nobis magister Johannes humiliter supplicavit ut indempnitati ejusdem ecclesie tam super eisdem decimis quam super aliis que de bonis ipsius alienata sunt illicite ac distracta providere misericorditer dignaremur Nolentes igitur eidem in suo jure deesse cui favorabiliter adesse tenemur discretioni vestre per apostolica scripta mandamus quatinus vocatis qui fuerint vocandi et inquisita super hiis diligentius veritate ea que in ipsius ecclesie prejudicium inveneritis temere attemptata in irritum revocantes quod canonicum fuerit appellatione remota statuatis facientes quod decreveritis per censuram ecclesiasticam firmiter observari Testes autem qui fuerint nominati si se gratia odio vel timore subtraxerint per censuram eandem appellatione cessante cogatis veritati testimonium perhibere Quod si non omnes hiis exequendis potueritis interesse duo vestrum ea nihilominus exequantur Datum Lateran idibus Martii pontificatus nostri anno iii
Source (click image below to view full size)
