Charter Document - 01399200

Robertus miseratione Divina Karliolensis Ecclesiae Minister humilis dilectis in Christo filijs de Kirkeland de Neubyggin et de Kirkebithore Ecclesiarum Presbyteris Parochialibus Salutem Gratiam et Benedictionem Nonnulli iniquitatum filij sicut intelleximus accedentes ad molendinum de Culgayth et aquam per quam idem molendinum molere consuevit pura et perpetua Elemosina Domini Abbatis Sanctae Mariae Eboraci et Monachorum de Wederhal parietes ejusdem molendini et rotas et stagnum quoddam eorundem Monachorum factum ad conservationem dictae aquae temere diruerunt et quo voluerunt contra justitiam asportaverunt in animarum suarum periculum plorum et praejudicium dictorum Monachorum non modicum et gravamen ob quod delictum Excommunicationis sententiam latam per constitutionem Domini Legati nuper in Anglia existentis in malefactores hujusmodi incurrerunt Hinc est quod vobis mandamus firmiter injungentes quatinus ad Ecclesiam de Kirkeland per litteras accedentes ibidem tribus diebus festivis moveatis in genere et efficaciter inducatis omnes dirutores et asportatores praedictos et alios quoscunque qui dampna aliqua praefatis Monachis in dicto molendino vel aqua intulerint quominus idem molendinum molere possit prout consuevit eorumque auctores et fautores ut Domino Priori de Wederhal qui quoad hoc pro praedicto Abbate est in partibus istis et Monachis de Wederhal infra quindecim dies a dato praesentium de praedictis commissis satisfaciant competenter quod si facere contempserint aut non fecerint ex tunc eosdem dirutores asportatores dampna alia praedicta inferentes auctores et fautores eorum in dictam sententiam Excommunicationis denuntietis singulis diebus Dominicis et festivis in genere sollempniter et pupplice incidisse Ad haec quia dicti Prior et Monachi praefatum molendinum nituntur reficere et aquam purgare ac timeant sibi impedimentum in futurum per aliquos latenter in praedictis quominus ea compleant ut deberent Vobis mandamus ut prius quatenus in dicta Ecclesia vice et autoritate nostra pupplice inhibeatis omnibus et singulis sub poena Excommunicationis in eos ferendae si impedimentum aliquod praestiterint ne impedimentum aliquod praestent nec praestare volentibus consentiant Et si qui non obstante prohibitione nostra impedimentum aliquod praestiterint in praemissis quominus opus praedictum effectui debito mancipetur eosdem impedientes et eisdem consentientes auctoritate nostra Excommunicationis vinculo generaliter innodetis Inquirentes nihilominus praefatorum dirutorum asportatorum et alia dampna praedicta inferentium auctorum fautorum impedientium et eis consentientium et cum ea inveneritis Citetis eos peremptorie quod compareant coram Nobis vel Commissarijs nostris in Crastino Sancti Marci Evangelistae in Karliolo Ecclesia Cathedrali Priori et Monachis super praefatis commissis responsuri et [] suadebit Et quid de praemissis feceritis Nobis vel Commissarijs nostris per litteras vestras patentes harum seriem continentes ad dictos crastinum et locum fideliter intimetis Datum apud Rosam xvi Kal Aprilis Anno Domini mcclxxiv