Charter Document - 00910487
| Charter Number: | 00910487 |
|---|---|
| Cartulary Title: | The Cartulary of the Abbey of Eynsham |
| Charter Language: | Latin |
| Charter Origin: | Royal |
| Charter Type(s): | Inquest |
| Date: | 1290 |
| Date type: | Internal, Calendar, Regnal |
| Resource Link(s): |
Bodleian Library - Christ Church MS 341 (f111r) |
Charter:
Edwardus dei gracia rex Anglie dominus Hibernie et dux Acquitannie uicecomiti Oxonie salutem Ex parte dilecti nobis in Christo abbatis de Egnesham nobis est ostensum quod cum ipse percipere et habere debeat et ipse et predecessores sui abbates de Egnesham a tempore quo non extat memoria semper hactenus percipere et habere consueuerunt fines et amerciamenta de uisu franciplegii hominum et tenencium suorum de Egnesham prouenient[ia] tu occasione octo solidorum tibi et balliuo nostro de Wodestoke pro uisu illo tenendo per manus balliuorum predicti abbatis soluendorum asserens fines et amerciamenta predicta ad te et balliuum nostrum pertinere ipsum abbatem et homines et tenentes suos predictos pro finibus et amerciamentis illis tibi et balliuo nostro predicto reddendis grauiter distringis et ea occasione multipliciter inquietas et molestas minus iuste in ipsius abbatis dispendium non modicum et grauamen Et quia tam super iure quod predictus abbas in premissis habere clamat quam super iure quod inde ad te et ad eundem balliuum nostrum pertinet uolumus certiorari tibi precipimus quod per sacramentum proborum et legalium hominum de comitatu tuo per quos rei ueritas melius sciri poterit diligenter inquiras super singulis articulis uisum predictum contingentibus plenius ueritatem et inquisicionem inde distincte et aperte factam sub sigillo tuo et sigillo eorum per quos facta fuerit nobis sine dilacione mittas et hoc breue ut comperta ueritate premissorum eidem abbati inde debitam iusticiam exhiberi faciamus Teste me ipso apud Westmonasterium sexto die Februarii anno regni nostri xviii