Charter Document - 00720250

Johannes miseratione divina Karliolensis episcopus dilectis in Christo filiis priori et conventui ecclesie de Lanrecost ordinis sancti Augustini nostre dioecesis salutem graciam et benedictionem Licet ex officii pastoralis debito ac paterne compassionis affectu subditorum oppressionibus succurrere teneamur pro veris tamen incommodis amovendis eo cogitare propensius astringimur quo vos in vinea Domini per regulares observancias Deo placabiles hospitalitatem honorabilem et alia multiplicia caritatis opera novimus vigilancius laborare Sane ad lamentabilem statum ecclesie vestre de Lanrecost predicte per repentini incendii voraginem iam consumpte nec non ad alia loca vestra nonnulla per sevientem Scotorum incursum depredationes innumeras et hostiles invasiones eorundem multiplices in favillam et cineres pro dolor iam redacta aliis bonis vestris sic consumptis que ad sustentationem vestram et onera incumbentia facultates quas in presenti habetis sufficere non poterunt ut decet oculos nostros compassionabiliter dirigentes intimeque pensantes quod ob cotidianum adventum regalis exercitus per vos ac frequentem aliorum supervenientium concursum onerosum vestra hospitalitas que ad premissa minus sufficit plus solito aggravatur inducimur obnixius et hortamur ut in tanta necessitate ob sustentationem vestram per bonorum temporalium incrementum vobis et ecclesie vestre predicte quatenus possumus congrue succurramus Habito igitur super hiis tractatu sollempni et diligenti qui in talibus requiritur invocato Christi nomine ecclesiam de Carlaton parochialem et curatam nostre dioecesis cuius estis advocati et patroni prout apparet per cartam clare memorie domini Edwardi filii regis Henrici nuper regis Anglie vobis inde confectam cuius etiam ecclesie dominus Robertus de London rector est in presenti cum suis juribus et pertinenciis universis in usus vestros proprios perpetuo habenda tenenda et possidendam vestre ecclesie ac domui predicte vobisque ac successoribus vestris ob causas predictas auctoritate pontificali conferimus concedimus donamus et appropriamus per presentes volentes et concedentes quod cedente vel decedente eiusdem ecclesie qui nunc est proprietatem et possessionem eiusdem ecclesie de Carlaton auctoritate vestra libere ingredi et in usus vestros proprios integraliter retinere valeatis consensu nostro vel successorum nostrorum aut aliorum quorumcunque cuiuscunque conditionis sint vel status minime requisito Salva in omnibus vicaria dicte ecclesie ac sustentatione competenti vicarii eiusdem qui pro tempore fuerit de fructibus eiusdem ecclesie et proventibus per nos aut successores nostros facienda et ordinanda pariter taxanda Cuius quidem vicarie ordinationem ipsiusque taxationem et collationem quandocunque ipsam vacare contigerit in recompensationem lesionis quam ecclesiam nostram cathedralis Karlioli ex huiusmodi appropriatione patitur seu futuris temporibus pati posset nobis et successoribus nostris de vestro expresso consensu specialiter reservamus jure et auctoritate tam nostra dioecesana quam alia ordinaria quacunque per omnia semper salvis In cuius rei testimonium has literas nostras vobis fieri fecimus patentes sigilli nostri munimine roboratas Datas apud Rosam xiii kalendas Octobris anno Domini mccc octavo et pontificatus nostri septimo decimo