Charter Document - 99909113
| Charter Number: | 99909113 |
|---|---|
| Cartulary Title: | The Hospitaller Cartulary, London |
| Charter Language: | Latin |
| Charter Origin: | Religious |
| Charter Type(s): | Court Record |
| Date: | 1301 |
| Date type: | Internal, A.D., Feast |
| Resource Link(s): |
Reference Document for this Embedded Document |
Charter:
Universis ad quos presens scriptum pervenerit Frater Willelmus de Tothale Sancte Domus Hospitalis Sancti Iohannis Ierusalem prior humilis in Anglia et fratres eiusdem domus salutem in domino Noveritis nos assensu communi et voluntate unanimi fratrum capituli nostri dedisse concessisse et presenti scripto nostro confirmasse Roberto Frere et Cecilie uxori sue unum mesuagium cum pertinenciis suis quod situm est in vico de Temese apud le Watergate inter tenementum abbatis et conventus de Fescampo quod nominatur tenementum ballivi de Fescampo a parte orientali et tenementum Rogeri le Corder et Willelmi Wastell[] a parte occidentali abuttans super viam regiam a parte australi et super tenementum magistri Rogeri de Rodenhale a parte boriali habendum et tenendum dictum mesuagium cum suis pertinenciis de nobis et successoribus nostris predictis Roberto et Cecilie et heredibus dicti Roberti libere quiete bene et in pace reddendo inde nobis et successoribus nostris viginti et unum solidos sterlingorum ad quatuor anni terminos videlicet ad pascha quinque solidos et tres ad festum nativitatis Sancti Iohannis Baptiste quinque solidos et tres denarios ad festum Sancti Michaelis quinque solidos et tres denarios et ad festum Natalis Domini quinque solidos et tres denarios pro omnibus serviciis secularibus et quibuscumque exaccionibus et demandis Nos vero et successores nostri priores et fratres predictum mesuagium cum suis pertinenciis contra religiosos viros abbatem et conventum de Sancto Albano et contra omnes homines prefatis Roberto et Cecilie et heredibus ipsius Roberti ut supradictum est warantizabimus acquietabimus et inperpetuum defendemus ut autem hec nostra donacio concessio et presentis scripti confirmacio firmitatis robur optineat presens scriptum sigillo communi capituli nostri una cum nostro fecimus communiri Hiis testibus fratre Roberto de Somerdeby fratre Nicholao de Acombe fratre Iohanne de Bixlisham fratre Willelmo de Hampton[] priore ecclesie fontis clericorum fratre Ricardo de Panely thesaurio eiusdem domus fratre Willelmo de Helles fratre Rogero de Mertone et aliis Datum apud Melchebourn[] in celebracione capituli nostri Sancti Barnabe apostoli anno gracie millesimo tricentesimo primo