Charter Document - 99900071
| Charter Number: | 99900071 |
|---|---|
| Cartulary Title: | The Hospitaller Cartulary, London |
| Charter Language: | Latin |
| Charter Origin: | Religious |
| Charter Type(s): | Concession |
| Date: | 1359 |
| Date type: | Internal, Feast, Regnal |
| Resource Link(s): |
|
Charter:
Hec indentura testatur quod Frater Iohannes Pavley prior hospitalis Sancti Iohannis Ierusalem in Anglia et eiusdem domus Fratres concesserunt et ad firmam dimiserunt Iohanni Porter quoddam tenementum suum in vico de Trillemellestrete annexum domui dicti Iohannis ex parte australi habendum et tenendum dictum tenementum predicto Iohanni Porter et heredibus suis a die confeccionis presencium usque ad finem lx annorum proximorum sequencium et plenarie completorum Reddendo inde annuatim predicto priori et successoribus suis tres solidos argenti ad festa Sancti Michaelis Archangeli natalis domini et natalis Sancti Iohannis Baptiste per equales porciones et predictus Iohannes Porter sustentabit reparabit et manutenebit sumptibus suis propriis predictum tenementum per totum tempus supradictum ac aciam in fine termini sui predicti in bono statu dimittet ac sursum reddet et supportabit omnia alia onera dicto tenemento incumbencia per terminum predictum et si contingat ipsum Iohannem Porter in solucione predictorum trium solidorum annuorum ad aliquem terminum prenominatum per quindecim dies aretro esse aut si dictum tenementum in forma predicta non reparaverit vult et concedit predictus Iohannes Porter quod extunc bene liceat predictis priori vel successoribus suis dictum tenementum cum pertinenciis suis ingredi et retinere imperpetuum cum omnibus bonis in eodem inventis ut liberum tenementum hospitalis predicti sine contra diccione aliquali ad que omnia et singula fideliter faciend[o] et complend[o] predictus Iohannes Porter obligat se heredes et executores suos ac omnia bona sua per presentes et predictus prior et successores sui predictum tenementum in forma predicta predicto Iohanni Porter contra omnes gentes warantizabunt et defendent per presentes In cuius rei testimonium sigillum commune dictorum prioris et Fratrum et sigillum dicti Iohannis Porter huic indenture alternatim sunt appensa Datum London[] in festo Natalis Sancti Iohannis Baptiste anno regni Regis Edwardi tercii a conquestu tricesimo tercio